Mediku jeneralistak greban dira Frantziako osasuneko lege proiektuaren aurka

Zuzeneko ordainketarik gabeko sistema orokortzearen kontra daude, bereziki.

Larrialdietakoek ordutegiak murrizteko akordioa lortu dute
Erietxe publikoetan ez ezik, klinika pribatuetan ere eginen dute protesta.
Erietxe publikoetan ez ezik, klinika pribatuetan ere eginen dute protesta. B. EDME

Maddi Ane Txoperena Iribarren -

2014ko abenduak 24
Larrialdi zerbitzuetako medikuek «akordio historikoa» erdietsi dute Marisol Touraine Frantziako Osasun ministroarekin. Izan ere, astelehenetik greban ziren, lan denbora 48 ordura murriztea eta oren gehigarriak ordainaraztea galdegiteko. Eskariei kasu egin die Parisek, eta, hala, protesta bertan behera uztea erabaki dute. Larrialdietakoei, ordea, jeneralista eta espezialistek hartu diete segida. Hain zuzen, Frantziako osasuneko lege proiektuaren aurkako greban daude atzotik azken horiek. Zuzeneko ordainketarik gabeko sistema pertsona guzientzat orokortu nahi izateak sortzen die kezkarik handiena.

2015eko apirilean onartu nahiko luke osasun arloko lege berria parlamentuak —urrian aurkeztu zuten proiektua—, eta, ordaintzeko modua aldatzeaz gain, farmaziei txertoak egiteko eskumena eman eta Eskualdeko Osasun Agentziei (EOA) botere handiagoa emanen lieke. Horien aurka jo du MG mediku jeneralisten sindikatu nagusiak, eta, bertzalde, eskatu du kontsulten prezioa 23 eurotik 25era igotzeko.

Ordainketa sistema, ezbaian

Gaur egun osasun sistema publikora jotzen duten eriek zerbitzuaren zati bat aitzinetik ordaindu behar dute, eta ondotik Gizarte Segurantzak itzuli egiten die dirua. Estatuaren laguntza jasotzen dutenek, ordea, ez dute diru hori aitzinatu behar, eta Frantziako Gobernuak osasun publikoaren erabiltzaile guzientzat jarri nahi du funtzionamendu bera. Hain zuzen, zuzeneko ordainketarik gabeko sistema orokortu egin nahi du. Sendatzeko erraztasun gehiago lortzea da helburua, hau da, diru eskasia ez izatea sendagilearengana ez joateko arrazoia. Mediku jeneralistak, ordea, ez daude ados aldaketarekin. Haien iritziz, eriarekiko «arduragabekeria» eta osasun zerbitzuen «kontsumo gehiegizkoa» ekarriko lituzke zuzenean ordaindu behar ez izateak. Horrez gain, ordainketak gibelatuko ote diren beldur dira, eta lan administratiboetan denbora sobera galduko dutela uste dute. Frantziako medikuen %95 daude ordainketa sistema orokortzearen aurka.

Tourainek jeneralistei erran die prest dagoela urte berritik aitzina aldaketen inguruan eztabaidatzeko, «baina ez orain». Halere, ohartarazi du ez duela sistemaren zilegitasunari buruz hitz egiteko asmorik, herritarrek onetsia baitute jada, haren iritziz. Orokortzera pasatzeko moduari buruz soilik mintzatuko direla adierazi du, ordainketak «fite eta sinpleki» eginen direla berma dadin.

Mediku espezialistak ere kexu dira gobernuaren lege proiektuarekin, eta gaurtik landa jeneralisten grebara elkartzekoak dira. Protestak abenduaren 31ra arte jarraitzea espero dute, baina Claude Leicher MGko presidenteak jada iragarri ditu mobilizazioak urtarrilaren 6 eta 21erako.

Bertzalde, osasun sistema publikotik haratago joanen dira protestak urtarrilean. Izan ere, FHP ospitale pribatuetako federazioak mugagabeko mobilizazio batera deitu du, urtarrilaren 5etik aitzina. Klinika pribatuetako medikuak ere lege proiektuaren aurka dira, baina bertze arrazoi batengatik: EOAei boterea ematean klinika pribatuak baztertuko direla salatu dute, hain zuzen. Touraineren arabera, klinika pribatuak «sobera» eskatzen ari dira, baina akordiorako borondatea erakutsi du horiekin ere. Dena den, FHPk jakinarazi du gobernuak lege proiektua kentzen ez duen artean protestei eutsiko dietela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna