Hendaiako Sasiko gaztetxea hustea galdegin du prokuradoreak

Iazko ekainean gaztetxea okupatu zutenak epaitu dituzte Baionako Auzitegian: isun ekonomikoa eskatu dute haientzat
Elkarretaratzea egin zuten atzo, Baionako epaitegi aitzinean.
Elkarretaratzea egin zuten atzo, Baionako epaitegi aitzinean. ISABELLE MIQUELESTORENA

Eneko Etxegarai -

2017ko maiatzak 4
Hendaiako (Lapurdi) gaztetxeak ekainaren 7ra arte zabalik segitzen ahalko du. 2016ko ekainaren 11n sartu zen Hendaitz gazte asanblada Orioko Etxea izenez ezaguna den eraikinera; urte bat bete lezake, beraz; baina geroa zalantzan du. Izan ere, gaztetxea okupatu zutenak epaitu zituzten atzo Baionako Auzitegian, eraikinaren jabeak —APHP Frantziako osasun instituzio publikoa— haien aurka jarri salaketaren ondorioz; ekainaren 7an emango dute epaia. Prokuradoreak eraikina hustea eta isun ekonomikoak galdegin ditu gazteen aurka: 1.500 euro kalte moralengatik, 500 euro okupazioak iraun duen hilabete bakoitzeko, eta alde zibilaren abokatuen ordainketa. «Jaso ditzakegun isunak eta gure abokatuari zor dioguna kontuan hartuz, 10.000 eurora iritsi daiteke zor izango duguna», adierazi zuen atzo Irati Fernandez gaztetxeko kideak.

Ekitaldi ugari antolatu ditu Sasiko gaztetxeak sortu zenetik honat. Hamaika jarduera eta bizipenek «herriaren zerbitzurako gune autogestionatu» baten eraikitzeko balio izan dutela zehaztu dute. «Horrelako proiektu askatzaileak posible direla erakutsi dugu, eta ez da gutxi», azpimarratu du Oneka Jauregi gaztetxeko kideak. «Urtebetez etxe huts eta abandonatu bat berritzea eta hari bizia ematea gaizki omen da, ilegalak omen gara». Hala eta guztiz ere, «txarretan ere positiboa ateratzen ere jakin behar delako», okupazioaren erabakiarekin eta izan ibilbidearekin «boteredun eta diruzaleei hordagoa bota» dietela adierazi dute, eta haien alde «gauza gutxi egiten duten herriko politikariak inplikarazi» dituztela. «Sasiko gaztetxea zoritxarrez hiltzen badute, bederen Euskal Herrian beste proiektu askoren sortzeko balio dezala», esan dute.

Richard Irazusta izan zen epaitegira hurbildutako Hendaiako Herriko Etxeko ordezkari bakarra. Hendaia Biltzen abertzale plataformako kide eta herriko etxeko hautetsia da. «Hendaiako gazteekin aterabide normal bat asmatu nahi dugu; ideia batzuk baditugu», azaldu du. Epeen aldetik, xehetasun askorik ez du eman, baina zehaztu du ez dutela «afera» bere horretan utziko. «Baditugu etxe batzuk konpontzeko, aldatzeko; orduan, beste lokal horietan posible izango da aterabide bat aurkitzea, baina ezin da egun batetik bestera egin. Proiektu batzuk badira, eta mintzatzen ari gara», argitu du. Haren iritziz, Hendaian gaztetxe bat izatea «gauza normala» da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna