Albistea entzun

Imanol Alvarez. Super Amara Bera Berako entrenatzailea

«Jokoen osteko munduko txapelketetan ezusteak egon ohi dira»

Gaur hasiko da Eskubaloiko Munduko Txapelketa. Imanol Alvarez lehen aldiz arituko da Espainiako selekzioko entrenatzaile laguntzaile. Maitane Etxeberria eta Ainhoa Hernandez jokalariak ere lehian izango dira.

JUAN CARLOS RUIZ / FOKU Tamaina handiagoan ikusi

Ainara Arratibel Gascon -

2021eko abenduak 1

Lan saioak prestatu, aurkariak aztertu... Imanol Alvarez Super Amara Bera Berako entrenatzaileari (Ermua, Bizkaia, 1967) ez zaio lanik falta Espainiako selekzioko bigarren teknikari gisa. «Lan polita da», nabarmendu du.

Halako txapelketa baten aurrean, gauzak lasaiago bizi dira bigarren entrenatzaile gisa?

Egia esan, oso lasai nago, gustura eta disfrutatzen. Arreta guztia lanean dut jarrita, jokalariei ahalik eta gehien laguntzeko. Jose Ignaciok [Prades, Espainiako hautatzailea] eta nik lanak banatu eta partekatzen ditugu: aurkariak aztertu, entrenamenduak eta partiden planteamenduak prestatu... Lan polita da.

Zu bertan egoteak zer ekarpen egin diezaioke Bera Berari?

Jokalari asko ikusteko aukera izango dut, eta, baten bat interesgarria iruditzen bazait, haren inguruko informazioa klubari pasatuko diot. Nahiz eta horretaz batez ere Tati [Garmendia kirol zuzendaria] eta Alex [Nogues] arduratuko diren, nik nahikoa lan izango dudalako bigarren entrenatzaile moduan.

Ikusiko dituzuen jokalarien artean egon daiteke taldea utzi berri duen Adriana Cardosoren ordezkoa?

Oraindik ez dugu erabakirik. Ez dugu fitxatu nahi fitxatzeagatik, baina adi egongo gara. Eskuin hegala oso postu zehatza da, eta bakarrik Maitane [Etxeberria] dugu. Nahiz eta Malenak [Cavo] eta Mariak [O'Mullonyk] hor joka dezaketen.

Bera Berako bost jokalari egongo dira Munduko Txapelketan: Etxeberria, Eli Cesareo, Laura Hernandez, Cavo eta Mariane Fernandez. Zer esan nahi du horrek klubarentzat ?

Harro egoteko zerbait da, eta seinale jokalari onak ditugula eta lan ona egiten ari garela. Gainera, gurekin jokatu duten beste hainbat jokalari daude: Elke Karsten, Renata Arruda, Adriana Cardoso, Silvia Arderius, Merche Castellanos...

Etxeberriaren, Cesareoren eta Hernandezen egunerokoa aztertzen ari zara. Zer moduz daude?

Maitane oso sasoi onean dago. Lasai ikusten dut, eta oso maila handian entrenatzen. Nabari da gero eta garrantzitsuago sentitzen dela, eta taldekideen konfiantza sentitzen duela. Denbora luzez egindako lan onaren saria jasotzen ari da. Cesareok denbora gehiago darama halako txapelketetan parte hartzen, eta uste dut haren ekarpena garrantzitsua izango dela. Laurak, berriz, estrainekoa du. Behetik gora ari da, eta gero eta egokituago ikusten dut. Hirurek minutuak izango dituztela uste dut, eta lehiaketa erritmoarekin segitzeak on egingo die bai haiei, baita Bera Berari ere liga itzultzen denean.

Eta Cavo eta Fernandes?

Biak oso ondo ikusten ditut, eta ilusioz beren selekzioekin jokatzeagatik.

Eta nola ikusten duzu Ainhoa Hernandez, txapelketan izango den beste euskal jokalaria?

Primeran. 2019ko Munduko Txapelketan oso jokalari garrantzitsua izan zen. Egokitu da jada Errumaniara, eta han izugarri gozatzen ari da. Izan ere, jokatzeaz gain, bere taldea lehen postuan dago.

Nerea Pena ez duzu deialdian sartu. Zer dela eta?

Azken hilabeteetan ez du jokatzeko aukera askorik izan, min hartuta egon delako. Eta halako txapelketa batera sasoi betean dauden jokalariak ekarri behar dituzu. Baina denek dakigu nolako maila duen Nereak.

Txapelketaz zer espero duzu?

Olinpiar Jokoen osteko Munduko Txapelketetan ezusteak egon ohi dira. Baina, Japonian bezala, Norvegia eta Frantzia iruditzen zaizkit selekziorik indartsuenak. Hortik harago, tekniko-taktikoki ez dut uste defentsa ireki asko ikusiko direnik, nahiz eta ondo eginez gero etekin handia eman. Selekzio gehienek defentsa itxien alde egingo dutela iruditzen zait. Erritmo aldetik bizia izatea nahiko nuke, eta ahalik eta baloi galera gutxienekin, hori baita emakumeen eskubaloiak duen gabezia handienetako bat. Gainera, telebista emankizunak ikusgarriak izatea nahi dut, zaleak erakartzeko.

Eta zuen multzoa?

Uste dut Austria dela aurkaririk zailena. Urtetik urtera gero eta hobeto jokatzen ari da, eta ligarik indartsuenetan jokatzen ari diren jokalariak ditu. Argentinak ere talde ona du, eskarmentu handikoa. Adi egon behar dugu defentsan, eta haien lehen lerroa ondo zaindu behar dugu, jaurtitzaile petoak baititu. Erasoan bizkor jokatu behar dugu, eta ondo kudeatu lehen partidako urduritasuna. Jokalari multzo handiagoa dugu, eta hor ere egon daiteke gakoa. Txina apenas ezagutzen dugu, baina, haien aurka azken jardunaldian jokatuko dugunez, nahikoa informazio izango dugu. Ez genuke arazorik izan behar sailkatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Beti Onakeko jokalariak Arrecifen (Espainia), asteburuan jokatu duten igoera fasean. ©Beti Onak

Gurpea Beti Onak Ohorezko Mailara igo da estreinakoz

Paulo Ostolaza

Asteburu honetan jokatu dute igoera fasea Arrecifen (Espainia), eta lehen bi neurketak irabazita lortu dute igoera. Datorren urtean hiru euskal talde arituko dira lehen mailan.

Eibarreko jokalariak, atzo, garaipena ospatzen. ©Jaizki Fontaneda / Foku

Eibarrek ez du huts egin, baina oraindik ez du igoera ziurtatu

Aitor Manterola Garate - Paulo Ostolaza

Teneriferi irabazi dio bart Ipuruan, baina Valladolidek ere irabazi egin duenez, azken jardunaldira arte itxaron beharko dute Lehen Mailara itzultzeko. Reala B eta Amorebieta jaitsi egin dira.

Amandine Henry Lyoneko jokalaria, berak sarturiko partida lehen gola ospatzen, atzo Turinen. ©KIKO HUESCA/ EFE

Berea egin, eta besteari utzi ez

Aitor Manterola Garate

Olympique Lyonek zortzigarren aldiz irabazi du Txapeldunen Liga, Bartzelona gainditu eta gero Turineko finalean (1-3). Damaris Egurrola da lehen euskal emakumezkoa txapelketa irabazten

Athleticeko jokalariak Lezaman, lan saio batean, Marcelinoren azalpenak entzuten. ©MIGUEL TOÑA / EFE

Europa, ospakizuna, eta agurrak

Haritz Gallastegi

Athleticek Vila-Realen emaitza hobetu beharko du Conference ligan jokatzeko. Realak, Osasunak eta Alavesek ez dute ezer jokoan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...