Mikel Albisu libre utzi dute Paristik Madrilgo aireportura iristean

Euskal presoa larunbatean irten zen Reauko kartzelatik, Frantziako zigorra osorik beteta, eta ordutik atxikitze zentro batean izan dute
Mikel Albisu, duela urte batzuetako argazkian.
Mikel Albisu, duela urte batzuetako argazkian. PERU IPARRAGIRRE

Enekoitz Esnaola -

2019ko urtarrilak 23
Mikel Albisu Iriarte libre da. Frantziako Estatuko zigorra osorik beteta, euskal presoa joan den larunbat goizean Reauko espetxetik atera zuten, baina handik Parisko atxikitze zentro batera eraman zuten. Han eduki zuten atzo arratsaldeko hiru eta erdiak ingurura arte, Espainiaratu ahal izateko kudeaketa administratiboak egiteko zeudela eta. Ondotik, Parisen hegazkin batean sartu, eta Albisu (Donostia, 1961) 20:00 aldera iritsi zen Barajasko (Madril) aireportura. Heldu bezain pronto poliziek esan zioten joan zitekeela etxera. Ez zuten pasatu aireportuko komisariatik; hegazkinetik jaistean jakinarazi zioten erabakia. Haren familia Barajasen zain zegoen, eta etxerako bidaiari ekin zioten.

2004ko urriaren 3an atxilotu zuten, Saliesen (Biarno), ETArekin lotuta. 2010 bukaeran Parisen epaitu, eta hogei urtera zigortu zuten. Halaber, kondenaren amaieran Frantziatik kanporatzeko agindua ezarri zioten, eta atzo Espainiaratu zuten. Espainiako Estatuan ez zeukan auzibiderik irekita, eta, gainera, Xantiana Cachenaut abokatuak atzo BERRIAri esan zionez, Frantziak 2005ean atzera bota zuen Madrilen euroagindu eskaera bat. Azkeneraino «zuhurtzia» izan beharra zegoela zioen, ordea, defentsa abokatuak.

Sortuk larunbatean zioen «kalean» egon beharko lukeela Albisuk, eta Espainiako eta Frantziako estatuei eskatu zien «joko errepresiboak alde batera» uzteko. Albisu atzo aske geratu ondoren, «ongi etorri etxera, Mikel!» idatzi zuen txio batean Arkaitz Rodriguez Sortuko idazkari nagusiak.

Azkeneko urteetan, Reauko espetxean egon da preso, eta EPPKren bozeramaile lanak egin ditu, Marixol Iparragirre bikotekidearekin batera. Orain, 46 euskal preso daude Frantziako Estatuan.

1985eko uztailean alde egin zuen etxetik, Joseba Sarrionandia eta Iñaki Pikabea presoek Martuteneko (Donostia) kartzelatik ihes egiteko lagundu zuenean. Poliziaren esanetan, Bidarteko (Lapurdi) 1992ko operazioaren ondoren ETAko zuzendaritzan sartu zen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna