Albistea entzun

Giza eskubideen nazioarteko eguna

Instituzioen konpromiso aktiboaren bila

Presoen eskubideak errespetatu daitezen, «hitzak eta ekintzak» eskatu dizkie Etxerat-ek politikariei, Giza Eskubideen Egunean
Ehunka lagunek parte hartu dute Etxerat-ek Iruñean, Gasteizen eta Baionan antolatutako zapi kateetan. Argazkian, Nafarroako Parlamentu aurrean, Eusko Jaurlaritza ondoan eta Baionako Herriko Etxean.
Ehunka lagunek parte hartu dute Etxerat-ek Iruñean, Gasteizen eta Baionan antolatutako zapi kateetan. Argazkian, Nafarroako Parlamentu aurrean, Eusko Jaurlaritza ondoan eta Baionako Herriko Etxean. ARGAZKI PRESS / BOB EDME

Aitziber Laskibar Lizarribar -

2014ko abenduak 11

Giza Eskubideen Nazioarteko Egunean, «hitzak eta ekintzak» eskatu dizkie Etxerat euskal presoen senideen elkarteak instituzioei, politikariei eta eragileei. «Arduraz» jokatzeko. «Giza eskubideen urraketa guztiak amaitzeko konpromiso aktiboa» hartzeko. Euskal presoei urratzen ari zaizkien eskubideen aurrean irmo jarduteko.

Gasteizen, Iruñean eta Baionan zabaldu du aldarria Etxerat-ek, leku esanguratsuen aurrean egin dituen mobilizazioetan. Etxerat-en bereizgarri diren zapi zuriekin lotuta, giza katea egin dute ehunka lagunek hiru hiriburuetan. Espainiako Gobernuak duen ordezkaritzaren aurretik atera da protesta Gasteizen, eguerdian. Ajuria Enea aurretik igaro, eta Legebiltzarrerainoko bidea egin du. Eguerdian egin du protesta Iruñean ere, Nafarroako Parlamentuaren aurrean. Baionan, berriz, arratsaldean egin dute zapi katea, Giza Eskubideen Aldarrikapen Unibertsala egin zuen Renne Casinen etxetik herriko etxera.

Hain zuzen, adierazpen horren jatorria ekarri du gogora Etxerat-ek, haien protestaren zergatia azaltzeko: «Gizartea estatuen gehiegikeriengatik defendatzeko jaio zen Giza Eskubideen Aldarrikapen Unibertsala».

Eta, presoen senideen esanetan, estatuen gehiegikeriak urtetan pairatzen ari dira Euskal Herrian. «Urte mordoa daramagu oinarrizko eskubideak kontzienteki bortxatzen dituen legedi baten menpe». Frantziako eta Espainiako estatuak euskal herritarren eskubideak «sistematikoki, une oro» bortxatzen ari direla salatu, eta, gaur-gaurkoz, Giza Eskubideen Aldarrikapen Unibertsala «inoiz baino beharrezkoagoa» dela aldarrikatu du.

Haren senideek jasan dutena jarri dute adibide: «Salbuespeneko espetxe politika». Osasunerako eskubidea hizpide hartuta, esaterako, ohartarazi dute agintariena dela herritarren osotasun fisiko zein psikologikoa bermatzeko ardura; eskubide horiek modu larrian zapaltzen ari diren estatuena, hain zuzen.

«Egoera larria da oso», esan dute Etxerat-eko kideek. «Urraketa horiek berehala bukatzeko pauso sendoak emateko garaia da; hitzetatik ekintzetara pasatzekoa, alegia».

Hartara, «konponbideak mahai gainean jartzera» deitu ditu instituzioak eta eragile politikoak, «Euskal Herriko biztanle askoren eskubideak zapalduak dituen egoera honi amaiera ematea premiazkoa delako».

Espetxe politikak eragiten dituen egoerez ohartarazteko azaldu dute euskal preso politikoen %42 etxetik 800 eta 1.100 kilometro bitartean dituztela, eta, horren eraginez, 36 egunetik behin istripua izan dutela presoak ikustera zihoazen senide eta lagunek. Oso gaixotasun larriak eta sendaezinak dituzten bederatzi herritar espetxean mantentzen dituztela ere salatu dute, eta Espainiako Gobernua «tranpak» egiten ari dela presoen espetxealdiak legez kanpo luzatzeko. Horren guzti horren aurrean, «arduraz» jokatzeko eta egoera iraultzeko «konpromiso aktiboa» eskatu diete presoen senideek instituzioei zein eragile politikoei.

Jonan Fernandez: «Tranpa»

Hain zuzen, euskal presoak kartzelan mantentzeko «tranpa» egitea aurpegiratu dio Jonan Fernandez Eusko Jaurlaritzaren Bake eta Bizikidetza idazkariak ere Espainiako Gobernuari. Frantzian zigorra bete duten euskal presoei Espainiako zigorrak gutxitzea saihesteko PPk hartu dituen neurriak salatu ditu: «Espainiak bizi osoko zigorra ezarri nahi badu, esan dezala, alda ditzala legeak eta Konstituzioa, eta utz diezaiola tranpak egiteari».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

GKS-k manifestazioak abiatu ditu Bilbon eta Iruñean

GKS-k manifestazioak abiatu ditu Bilbon eta Iruñean

Berria

'Enpresarien eta agintarien erasoaldiaren aurrean, gazte langileok borrokara!' leloa ozenduko dute, gazteen artean «borrokarako borondatea» hedatzeko asmoz

 ©JON URBE / FOKU

«Adostasun berriek ahalbidetu dute bake prozesua»

Irati Urdalleta Lete

Foro Sozialaren bidea ixtear da, baina hor dago eginikoa: hamabi aholkuetatik 11 beteta edo betetzear. Eta egitekoak: adibidez, biktimen «asimetria» gainditzea. Balorazio «ona» egin dute.
Bizkaiko Batzar Nagusietan Usansoloren desanexioa bozkatu zen momentuan ©Marisol Ramirez/ FOKU

Galdakaoko Udalak demandatu gisa aurkeztea erabaki du Usansoloko auzian

Berria

Bizkaiko Batzar Nagusiek lurraldeko 113. udal gisa onartu zuten Usansolo, galdeketaren ostean, eta estatuko abokatutzak helegitea aurkeztu zuen. Galdakaoko Udalak demandatu gisa aurkeztea erabaki du, prozesu honetan egindako bidea defendatzeko.

 ©MARISOL RAMIREZ / FOKU

«Madrilen berme» mahaian

Jon Ordoñez Garmendia - Xabier Martin

PSE-EEn bide luzea eginikoa da Ares: sozialisten ordezkari 2005etik 2007ra bitarteko bake elkarrizketetan eta Jaurlaritzako Barne sailburu, besteak beste. Karguan zela hil zuen Ertzaintzak Cabacas. 68 urte zituela hil da.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...