Ertzaintzak taser pistolak erabiliko ditu, «salbuespen kasuetan soilik»

Suzko armen «alternatiba» gisa erabil ditzake. AIren txosten batek dio 500 hildako eragin zituztela AEBetan 2001 eta 2012 bitartean
Beltran de Heredia sailburua eta Gabirondo Ertzaintzako zuzendaria.
Beltran de Heredia sailburua eta Gabirondo Ertzaintzako zuzendaria. J. H. / ARP

Edurne Begiristain -

2017ko abuztuak 4
Joan den martxotik, taser pistola elektrikoak ditu Ertzaintzak, suzko armen erabileraren «alternatiba» gisa. Estefania Beltran de Heredia Segurtasun sailburuak joan den maiatzean Elkarrekin Podemos koalizioak egindako galdera bati erantzunez emandako argibideen arabera, taser pistola elektrikoak egoera «larrietan» eta «salbuespenezkoetan» bakarrik erabiliko ditu Ertzaintzak, eta «formakuntza berezitua» jasoko duten ertzainek bakarrik erabiliko dituzte.

Elkarrekin Podemoseko Jose Ramon Becerrak Eusko Legebiltzarreko kontrol saioan gogoratu zion pistola elektrikoek heriotzak eragin dituztela. Otsailean, idatzizko galdera batean, berriz, arma horiek osasun arazo jakin batzuk dituzten pertsonen aurka erabiltzeko arriskuaz galdetu zion, baina Segurtasun sailburuak apenas eman zuen argibiderik bere erantzunean. Horrela zioen hitzez hitz Beltran de Herediaren erantzunak: «Taserrak fabrikatzaileak homologatuta daude emango zaien erabilerarako, eta horri buruzko egiaztagiriak izan badira».

Segurtasun Sailak emandako datuen arabera, aurten 50.687 euroko diru saila bideratu du taser pistolak erosteko, eta soilik brigada mugikorretan berehalako erantzunetarako patruilen zerbitzuan lan egiten duten ertzainek erabili ahal izango dituzte.

Pistola elektrikoaren erabilera defendatu du Erne sindikatuak, baldin eta «modu egokian eta logikoan» erabiltzen bada eta«ahalik eta min gutxiena» eragiten badu.

Hiltzen duen arma

50.000 volteko deskarga elektriko bat botatzen dute arma horiek, deskarga jasotzen duena zenbait denboraz geldi-geldi uzteko. Arma «ez-hilgarri» gisa kalifikatuta badago ere, AIk argitaratutako txosten baten arabera, 2001 eta 2012 bitartean gutxienez 500 pertsona hil ditu poliziak AEBetan arma hori erabilita. Erresuma Batuan, azken hamar urteetan, ehundik gora pertsona hil dituzte horrelako armekin, hango Gobernuz Kanpoko Erakundeek emandako datuen arabera. Besteak beste, Dalian Atkinson Realeko jokalari ohia taser pistola batekin hil zuen Ingalaterrako Poliziak iazko abenduan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna