Sailkapen nagusian ere bada aldaketarik. Izan ere, eroriko bat izan zen helmugarako bost kilometro falta zirela; Richard Carapazek (Movistar) 46 segundo galdu zituen, eta Tao Geoghegan Hartek (Ineos), 1.28. Azken hori zazpigarrena zen sailkapen nagusian etapa hasi aurretik. Beraz, Pello Bilbaok (Astana) postu bat egin du gora, eta bederatzigarren da orain, Primoz Roglic liderrarengandik (Jumbo) 42 segundora.
Sure Hatsuyama (Vini Fantini) izan zen eguneko beste protagonista. Japoniarrak aurrera egin zuen etapa hasi eta gutxira, eta makina bat kilometro egin zituen ihesean. Baina tropelak harrapatu egin zuen 72 kilometro falta zirela; hura bakarrik saiatu zen tropelaren zaintzari iskin egiten.
Esprinterrek beste aukera bat izango dute gaur, atzokoaren antzeko saioa baita laugarren etapa, Orbetello eta Frascati artekoa, luzea (228 kilometro) eta gorabehera handirik gabekoa. Vivianik aukera du atzoko kolpea arintzeko; amorru biziz ariko da.
