Albistea entzun

Lluis Arcarazo. 'El judici' dokumental saioko zuzendaria

«Espainian ez dute gaia programatu nahi»

Kataluniako buruzagi independentisten aurkako epaiketaren inguruko dokumental saio bat ematen ari da TV3. Arcarazok dio saioak ikuspegi kritikoa duela afera politiko bati Espainiak emandako erantzunarekiko.
MEDIAPRO Tamaina handiagoan ikusi

Urtzi Urkizu -

2021eko maiatzak 5

Makina bat telesail eta filmen gidoiak idatzi ditu Lluis Arcarazok (Bartzelona, 1959). 2007an Goya sari bat jaso zuen, Salvador (Puig Antich) filmaren gidoiarengatik. Kataluniako gidoilarien elkarteko presidentea izana da.

Kataluniako prozesu independentistaren epaiketa eta 400 ordu baino gehiagoko grabaketak. Nolako prozesua izan da zuretzat El judici egitea?

Lan handia egin behar izan dugu, baina aberasgarria izan da. Lantaldea txikia zen: gidoietan, Marc Fernandez de la Vargarekin batera aritu naiz. Sistema bat antolatu behar izan genuen epaiketako ordu guztiak digeritu ahal izateko. Epaiketa bera sailaren hanka bat da, baina defentsako abokatuei egin genien jarraipenak garrantzi handia dauka. Auzipetuen senideekin ere egon ginen. Eta 30 pertsona elkarrizketatu ditugu, tartean zuzenbidean adituak.

Zortzi atal dira, bakoitza ordubetekoa. Laburpen osatua da, horrenbestez?

Hasieran pentsatzen genuen laburragoa izango zela, hiru edo gehienez lau atalekoa. Gaia lantzen ari ginela, jabetu ginen ondo kontatzeko atal gehiago behar genituela. Ordena pixka bat jartzen saiatu gara, eta arlo garrantzitsuenetan jarri dugu arreta.

Defentsako abokatuak askotan azaltzen dira. Nolakoak izan ziren grabaketak haiekin?

Garapen bat izan zuen. Hasieran, haien jardunari erreparatzea eskatu genienean, kontua ez zen erraza izan, abokatuak ez baitira aktoreak, futbolariak edo telebistako izarrak. Pixkanaka, ateak ireki zizkiguten, zenbait gauza interesgarri ikus genitzan. Defentsa une jakin batzuetan nola planteatu eta enfokatu behar zuten azaldu ziguten, eta horrek dramatikoki pertsonaiak erretratatzeko aukera eman zigun. Thriller judizial bat da saioa. Abokatuen estrategia desberdinak ere ageri dira: Jordi Cuixarten abokatuena politikoagoa zen, eskubide zibilei lotua; eta Quim Fornen abokatuarena, guztiz teknikoa.

Dokumental saioa ikusle datu onak ari da lortzen.

Lehen egunean bi atal eman zituen TV3ek, eta %16,5eko kuota izan zuen; hirugarren atalak, %14,6koa. Epaiketa politiko bat da Europaren bihotzean, eta saioak ikuspegi kritikoa du Espainiako Estatuak afera politiko bati eman dion erantzunarekiko.

Auzipetuen senideek zer esan dizuete?

Hainbat senidek atalak ikusi ahal izan zituzten TV3eko estreinaldiaren aurretik. Interesatu izan zaigu senide batzuek izan duten transformazioa ere: pertsona anonimoak izateari utzi, eta publikoki aurpegia ematen dute orain, mitinetan parte hartzen dute. Dolors Bassaren ahizpa diputatua da orain Espainiako Kongresuan, eta Raul Romevaren bikotekidea eurodiputatu hautatu zuten. Garapen pertsonal horrek badu interesa.

Zer ondorio atera duzu epaiketan hainbeste orduz sakondu ostean?

Ondorio gazi-gozoa da. Lantaldean hasiera-hasieratik genuen sentipena zen presoek kanpoko zelaian jokatu behar zutela partida, eta hori giroan dago une oro. Erronka politiko baten aurka, non Kataluniako gizartearen parte handi batek independentzia nahi duen, Espainiako Estatuak neurri judizial batzuk artikulatu ditu. Beraz, Madrildik erantzun juridiko bat egon da auzi politiko baten inguruan, aurrerantz ostiko bat emanda. Ikusiko dugu hemendik urte batzuetara Estrasburgoko auzitegian zer esaten duten epaiketaz. Baina konponbideak hitzartua eta demokratikoa izan behar du.

TV3eko estreinaldiaren ostean, El judici-k bidaiatu dezake beste toki batzuetara?

Proiektua pentsatua dago ez dadin soilik TV3en geratu; espero dut nazioartean bidea egitea. Ingelesezko bertsioa egina daukagu, eta off-eko ahotsa Brian Cox aktore eskoziarrak jarri du. Ideala litzateke Espainian ikustea eta eztabaida piztea. Baina Mediaprorekin egin ditugun beste dokumental batzuekin ikusi dugu Espainiako kateek ez dutela gaia programatu nahi.

Procés-aren inguruan fikzioak egiteko oso goiz al da oraindik?

Bai, goiz da. Badakit saiakera batzuk egon direla Urriaren 1aren inguruan fikzioak egiteko. Interesa badago fikzio bat telebistara edo zinemara eramateko, baina itxaron egin beharko da apur bat.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Miren Jone Azurza, artxiboko irudi batean. ©Jon Urbe/ FOKU

Miren Jone Azurza kazetaria hil da, 92 urterekin

Berria

'Zeruko Argia' zuzendu zuen 1969 eta 1975 bitartean. Gero, 'Deia' egunkarian aritu zen lanean. 2011n Ohorezko Rikardo Arregi Saria jaso zuen, eta 2018an ohorezko euskaltzain izendatu zuen Euskaltzaindiak.

 ©JAIZKI FONTANEDA / FOKU

«Herriaren ondarea da auzolana, gizartea osasuntsuagoa izan dadin aberasgarria»

Amaia Ramirez de Okariz Kortabarria

Mozambiketik bueltan erabaki zuen Gabilondok gertuko zuen Garaioneko proiektua berriz hartzea. Sorkuntza, ondare soziala eta natura ditu ardatz, baina baita euskara eta feminismoa ere, zuzenki aipatu ez arren «halabeharrez» egon behar dutelako hor.
Emakume bat, Bilboko Konpartsek, atzo, Bilboko Plaza Barrian antolatutako Kapela Egunean. ©ARITZ LOIOLA / FOKU

Bilbok buruan darabilena

Iñigo Astiz

Aste Nagusia hasteko ehun egun baino gutxiago falta direla gogoratzeko Kapela Eguna antolatu dute Bilboko Konpartsek, eta atzerako kontagailu bat ere jarri dute Plaza Barrian.
Svenja Jung aktoreak bi rol jokatzen ditu telesailean: bi ahizpa biki protagonistena egiten du. ©COSMO

Cosmo kateak 'Der Palast' telesaila emango du bihartik aurrera

Urtzi Urkizu

Alemanian 6,23 milioi ikus-entzule izan ditu (%20,1). Crossover jaialdian lehen atala eman zuten

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...