Albistea entzun

Eneko Oroz. Eduki sortzailea

«Twitter Spaces erabilgarria da zenbait unetarako»

Twitter Spaces izeneko audio gelak euskaraz erabiltzen hasi diren lehen txiolarietako bat da Oroz. Iruditzen zaio profil desberdinetako euskaldunek egin behar dutela saiakera bera.
JON URBE / FOKU Tamaina handiagoan ikusi

Urtzi Urkizu -

2022ko urtarrilak 21

Twitterren 2009an hasi zen Eneko Oroz (Lasarte-Oria, Gipuzkoa, 1984). Bakarrik edo bi izeneko podcast esperimentala jarri du martxan.

Twitter Spaces erabiltzen hasi diren lehen txiolari euskaldunetako bat zara. Zer da zehazki Twitter Spaces?

Twitter espazioak audio gela batzuk dira. Clubhouse tresnarekin alderatu daiteke, baina horrek arazo bat zuen: mugatua zen, gonbidapen bidez sartu behar zuen jendeak. Twitterrek aukera ikusi du halako tresna bat sortzeko. Gela horietan hamar pertsona egon daitezke hizketan, eta entzuten, nahi bezainbeste.

Zer moduz joan dira zure saiakerak?

Emaitza desberdinak izan ditut. Saiakera bat Pantailak Euskaraz egitasmoa eta #3000Twitz kanpainari buruzkoa izan zen, eta horrek ikusmin handia piztu zuen; jende asko sartu zen. Beste saiakera batzuetan jende gutxiago egon da, eta kostatu egin da sartu direnek parte hartzea. Gerta daiteke gai batzuk ez izatea interes talde oso zabalentzat.

Youtuben bideo tutorial bat jarri duzu tresnaren berri emateko. Azaldu duzunez, Twitterren ez daudenak ere sar daitezke gela horietan.

Twitter Spacesen hitz egiteko, Twitterren aplikazioa izan behar duzu sakelako telefonoan. Baina nabigatzailetik entzun daiteke, eta ez da beharrezkoa Twitterreko kontua izatea. Hartaz, zuzeneko podcast bat balitz bezala egon zaitezke entzuten beste zerbait egiten duzun bitartean.

Euskal Herritik kanpoko zenbait hedabidetan ere hasi dira erabiltzen. Noiz iruditzen zaizu izan daitekeela erabilgarria?

Adibide bat jarriko dizut: Europako futboleko Superliga martxan jarri ala ez jarri eztabaida piztu zenean, gatazka handia egon zen sareetan. Zuzeneko eztabaida asko egon ziren, eta damutzen naiz ez nuelako euskaraz halakorik sortu. Twitter espazio batek arrakasta izateko, zerbait esateko duen jendea izan behar duzu inguruan. Kazetari edo komunikatzaileek sortzen badituzte, bereziki harreman asko dituztenek, funtzionatu dezakete. Aktualitateko zenbait unetan tresna erabilgarria izan daiteke. Komunitateen kontuetarako interesgarria da.

Korrika datorrenerako izan al daiteke, adibidez?

Korrika etortzen denerako nik ilusioa dut Twitch plataforman zerbait egiteko. Aurtengo Korrika desberdina izango da, teknologikoki egoera aldatu delako eta itxaronaldi baten ostean datorrelako. Sarean zerbait desberdina egiteko momentua izan daiteke.

Euskal komunitatearentzat zer aukera ekar ditzakete Twitter Spaces delakoek?

Interesgarria izan daiteke, baldin eta ahots desberdinak animatzen baldin badira. Espazio oso gutxi ikusi ditut euskaraz, baina, gero eta jende gehiago hasten bada halakoak egiten, formatu berriak irits daitezke. Euskara praktikatzeko Solaskide egitasmoarekin egin nuen ahalegin bat, eta agian horretarako ere balio dezake. Katalanezko adibide bat bada: Gerard Querolek sortutako #TinderCat egitasmoak sekulako tiradizoa izan du. Sortu zuen azken espazioan 1.200 herritar egon ziren. Ondo legoke profil desberdinetako euskaldun askok egitea saiakera. Twitterren, gainera, sareak eginak daude.

Bakarrik edo bi podcasta ikus-entzunezkoetara pasatzeko lehen saiakera egin duzu. Horretan jarraitzeko asmotan zabiltza?

Ikus-entzunezkoetan eroso sentitzen naiz. Podcasta ikus-entzunezkoetara eramateko lehen saiakera Lasarte-Oriako euskararen maratoiaren ingurukoa izan zen: berezia da lasartearrentzat, eta audioa motz gelditu zitekeela iruditzen zitzaidan. Gainera, euskararen maratoiaren inguruko halako kontu gutxi daude Interneten. Saiakera ez zen guztiz ondo atera, baina asmoa dut berriro saiatzeko.

Zer desberdintasun nabarmenduko zenituzke Twitcheko eta Twitterreko euskal komunitateen artean?

Twitcheko euskal komunitatea txikia da, eta identifikatuta dago. Twitter askoz zabalagoa da, eta aniztasun handia dago. Munduan gorroto raid-ak izenekoak ematen dira Twitchen, eta pertsona jakin bat seinalatzen eta iraintzen dute; euskal komunitatean, ordea, ez dago halakorik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Gizon bat arrain kontserbei begira, Bermeoko arrain azokako postuetako batean. ©ARITZ LOIOLA / FOKU

Itsasoa berriro erakusmahaietan

Amaia Igartua Aristondo

Bermeoko arrain azoka aurrez aurre antolatu dute ostera ere, bi urtez online egin ondoren. Jende andana batu da Lamara inguruan, eta, erosketak ez ezik, ilusioa ere izan da nabarmen.
Mantangorri, sortzaileekin solasean

Pinporten atzeko ezkutuko lana

Ane Insausti Barandiaran

1000. zenbakia argitaratuko du gaur zortzi 'Mantangorri'-k, BERRIAren haurrentzako gehigarriak, eta festa batekin ospatuko dute, Txillida Lekun. Bertako langile izandakoek eta gaur egun bertan dabiltzanek, atzera begira jarrita, maitasunez hitz egiten dute egunkariko «kuttunaz».
 ©MAIALEN ANDRES / FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...