Albistea entzun

KSIgune sortu dute, kultur eta sormen industriak bultzatzeko

Eusko Jaurlaritzak sortu du klusterra, eta sektoreko enpresa, erakunde eta ikastegiak batuko ditu. Prestakuntzako gabeziei erantzun nahi die
Bingen Zupiria eta Jokin Bildarratz sailburuak, atzo, Donostian.
Bingen Zupiria eta Jokin Bildarratz sailburuak, atzo, Donostian. JON URBE / FOKU Tamaina handiagoan ikusi

Aitor Biain -

2021eko uztailak 2

Eusko Jaurlaritzak KSIgune klusterra eratu du: kultur eta sormen industrien unibertsitate kluster bat da, sektoreko enpresen, erakundeen eta goi mailako ikasketa zentroen arteko topagune izan nahi duena. Katalizatzaile lana egin nahi du, hau da, kultur eta sormen industrien sektorean prestakuntzaren, ikerketaren, eta berrikuntzaren alorrean egon daitezkeen gabeziak identifikatzea eta horiei erantzutea du xede.

Kultura eta Hizkuntza Politika Sailak eta Hezkuntza Sailak sustatu dute ekimena, eta kultur eta sormen industriak bultzatzeko Jaurlaritzaren estrategiaren barruan sartu dute. Hiru eginkizun izango ditu klusterrak, Jokin Bildarratz Hezkuntza sailburuak azaldu duenez: kultura eta sormen industrietako goi mailako hezkuntzaren gaitasunen mapa aldian-aldian eguneratzea, sektoreko enpresek erronkak planteatzea eta ikasleek erronka horiek ebaztea, eta sektorearen beharretara konektatutako prestakuntza programa bat bultzatzea.

Bingen Zupiria Kultura sailburuaren hitzetan, horri esker «zubi berriak» eraiki ahal izango dira unibertsitateen eta kultura eta sormen industrien artean. Izan ere, horiei lotutako 16.000 enpresa daude Araban, Bizkaian eta Gipuzkoan, eta 48.000 lanpostu baino gehiago dituzte, Kulturaren Euskal Behatokiak 2019an egindako ikerketaren arabera.

Denera, hamabost sektore hartzen dituzte: kultur ondarea, ikusizko arteak, musika, edizioa eta inprimatutako bitartekoak, arte eszenikoak, ikus entzunezkoak, artisautza, arkitektura, publizitatea eta marketina, bideo jokoak, eduki digitalak, diseinua, moda, hizkuntzaren industriak eta gastronomia. Horien inguruko 111 gradu, master eta doktoretza programa eskaintzen dira egun, eta beste 44 ikerketa talde eta bost institutu eta katedra ere badaude.

KSIgune klusterra Jaurlaritzak zuzenduko du, baina Euskampus Fundazioa arduratuko da kudeatzeaz eta dinamizatzeaz. BDCC Euskadiko Kultura eta Sormen barruti sortu berrian integratuko da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jose Ignazio Ansorena eta Eneko Goia, gaur goizean, Donostiako udaletxeko prentsa aretoan. ©Gorka Rubio / Foku

Herritarren «zerbitzura» jotako doinuak

Itziar Ugarte Irizar

Hiru Txulo: Donostia eta txistua liburua ondu du Aritz Gorrotxategik, Donostiako Udalaren eta Ereinen eskutik. Isidro Ansorena goratu dute, Donostiako Udalaren Txistulari Taldearen zuzendari ohia.

Herritar bat, asteon, Donostiako areto bateko karteldegiari begira. ©GORKA RUBIO / FOKU

LEKUA EGIN NAHIAN

Ainhoa Sarasola - Ainize Madariaga

Zinema areto, jaialdi eta ziklo gehienetan, euskarazko filmen eta azpidatzien presentzia txikiagoa da beste hizkuntzetakoekin alderatuta. Hainbat eragilek azaldu dute pixkanaka kopuru hori handituz doala, baina ehunekoei erreparatuta, salbuespenak salbuespen, oreka lortzetik urrun dago oraindik.

Cordal, erakusketako lanetako batekin. ©Aritz Loiola / Foku

Egunero, atsedenik hartu gabe

Amaia Igartua Aristondo - Bizkaiko Hitza

Isaac Cordal artistak etengabe produktiboak izatearen beharra jorratu du ’24/7′ erakusketan. Bilboko SC Gallery aretoan dago ikusgai, hilaren 28ra arte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.