Albistea entzun

Iritzia emateko mugak BBCn

Tim Davie BBCko zuzendari nagusiak iragarri du Twitterren iritzi politikoak ematen dituzten kazetariek diziplina neurriak jasango dituztela. Twitterreko kontua kenduko dietela esan du.
BBCren Londresko egoitzako irudi bat.
BBCren Londresko egoitzako irudi bat. WILL OLIVER / EFE Tamaina handiagoan ikusi

Urtzi Urkizu -

2020ko urriak 14

Erresuma Batuko irrati-telebista publikoan albisteen arloan eta aktualitateko gaien berri ematen ari diren kazetari eta aurkezleek nekez eman ahalko dituzte iritzi politikoak Twitterren hemendik aurrera. Egunotan jakinaraziko ditu BBCk sare sozialetan aritzeko protokolo berriak, baina Tim Davie zuzendari nagusi berriak egina du iragarpena: «Aplikatuko ditugun neurriak oso zehatzak izango dira; iritzi politikoak ematen dituzten kazetariak Twitterretik aterako ditugu. Adierazpen alderdikoiak egiten dituzten langileentzat, BBC ez da lan egiteko tokirik egokiena».

Arau berriak albistegietan, aktualitateko gaietan eta informazioko beste alor batzuetan lan egiten dutenei eragingo die, eta Daviek azaldu du «berehalakoan» hartuko dituztela neurriak. Zuzendari nagusiaren arabera, jendeak «ekintza gogorrak» ikusi nahi ditu esparru horretan.

Kazetari guztiak ez dira iritzi horretakoak, ordea: Erresuma Batuan hainbat ahots azaldu dira neurri horien kontra.

Euskal Herrian, zenbait komunikabidek gidaliburuak landu dituzte sare sozialen erabilerarako gomendioekin. Baina, oraingoz, ez dute BBCk iragarritakoen moduko neurririk hartu.

Jesus Coteron Kazetarien Euskal Elkargoko dekano eta presidentearen iritziz, BBCren zuzendaritzaren debekuak murriztu egiten du kazetarien adierazpen askatasuna: «Sare sozialak pertsonalizatuak dira, eta, horrenbestez, kasu horretan, kazetaritza enpresak ez luke sartu behar erredaktoreen iritzietan».

Txema Ramirez de la Piscina EHUko ikerlari eta irakasleak gogorarazi du sare sozialak eta Twitter sortu zirenean komunikabide askok beren kazetariak animatu zituztela sare horretan kontu bat irekitzera, era horretan komunikabidearen marka «inplementatzen» zelako. «Areago, hedabide batzuek kazetariak behartu zituzten hori egitera». Neurri batean, askatasun eremuak ere baziren eta badira sareen kontu horiek. «Bertan profesionalak askeago senti daitezke beren kazetatan normalean egingo ez zituzten iruzkinak edo ñabardurak egiteko. Eta hori, berez, ona da. Kazetariari eta komunikabideari ere mesede egiten dio (normalean), balio erantsi bat baita».

Baina arriskuak ere egon daitezke. Izan ere, hartzaile askok pentsa dezakete kazetariak Twitterren idazten duena eta komunikabidearen iritzia gauza bera direla. «Eta horrek ez du zertan beti horrela izan».

Toryen ahalegina?

Ramirez de la Piscinak, edonola ere, gaur egungo egoeraren testuinguruan jarri du BBCko zuzendari berriaren erabakia: «Planteatzen ari den eztabaida beste bataila handiago baten barruan kokatu behar da: toryak [kontserbadoreak] BBCren kontrolaz jabetzeko egiten ari diren ahaleginen barruan, alegia». BBCko zenbait kazetari esanguratsu brexit-aren aurka posizionatu izan dira, eta Erresuma Batuko Gobernua ez da fio haien joera ideologikoarekin, EHUko irakaslearen aburuz. «Horregatik, gobernuak, BBCko zuzendari berri Tim Davieren bitartez, konpainiako kazetarien adierazpen askatasuna murriztu nahi du».

Kazetarien Euskal Elkargoko presidenteari ez zaio justifikagarria iruditzen BBCren erabakia: «Komunikabideen eguneroko borroka informazio askatasuna lortu eta horretan jardun ahal izatea baldin bada, debeku hori inkoherentzia erabatekoa da».

Kazetariak Twitterren aritzean, zenbaitek aipatzen dute bereizi behar dela hedabide publikoetakoak diren ala ez. Ramirezen ustetan, ez litzateke bereizketarik egin behar, eta arauek denentzat balio beharko lukete. «Baina hedabide publiko batean ari bazara, ardura handiagoa duzu, zalantzarik gabe». Iritzietan, bestalde, irakasleak argi du arazo gehien sortzen dituztenak politikoak eta ekonomikoak izaten direla. «Kirol, kultura edo gizarte gaietan, kazetariek askatasun handiagoa izaten dute iritziak plazaratzeko».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

<b><em>Perseverance</em>.</b> NASAk bidalitako ibilgailua, Marten. ©NASA/JPL-CALTECH

Marte iritsi da Euskal Herrira

Jakes Goikoetxea

Euskal Herriko Unibertsitateko ikerketa taldeak hasi dira Marteko lehen datuak eta irudiak jasotzen. Hala ere, Marten lur hartu eta bi hilabete eta erdira, 'Perseverance' ibilgailuko ikerketa tresnak doitzen ari dira oraindik ere, eta benetako ikerketa ez dute abiatu.

Elkano, mundu osora

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna