Albistea entzun

Sei hilabeteko epea, Gernikako Estatutua nola bete azaltzeko

Gotzon Hermosilla -

2018ko apirilak 13

Eusko Legebiltzarrak sei hilabeteko epea eman dio Espainiako Gobernuari, Gernikako Estatutua betetzeko eta oraindik eman gabe dauden eskumenak EAEko instituzioen esku uzteko egutegi bat aurkez dezan. EAJk, EH Bilduk eta Elkarrekin Podemosek babestu dute proposamena, eta PSE-EEk eta PPk kontrako botoa eman dute.

Onartutako proposamenean, legebiltzarrak salatu du oraindik zenbait eskumen eman gabe jarraitzen duela Espainiako Gobernuak, nahiz eta eskumen horiek Gernikako Estatutuan jasota egon eta estatutu hori onartu zenetik ia 40 urte igaro. Gizarte Segurantzaren erregimen ekonomikoaren kudeaketa eta espetxeetakoa daude eskumen horien artean.

Legebiltzarrak «alde bakarreko blokeoa» salatu du onartutako testuan, eta azaldu du estatutua betetzea ezin dela egon «beste akordio edo baldintzen pentzudan». Era berean, argi uzten du estatutua betetzeak ez duela zertan baldintzatu «esparru juridiko politiko berri bat» lortzea, hori baldin bada legebiltzarraren eta herritarren gehiengoaren borondatea.

«Beharra duenean» baino ez

EAJren Joseba Egibarrek esan du Espainiako Gobernuak «EAJren botoen beharra duenean» baino ez diela deitzen eskumenen auziaz hitz egiteko, baina erantsi du EAJk aukera hori baliatu egiten duela «estatutua betetzen» jarraitzeko.

Horixe izan da, hain zuzen ere, EH Bilduk eta Elkarrekin Podemosek deitoratu dutena. EH Bilduko Larraitz Ugartek esan du tamalgarria dela Araba, Bizkai eta Gipuzkoarako eskumen berriak «EAJk eta PPk konpontxo egitearen ondorioz» iritsi behar izatea, eta Elkarrekin Podemoseko Edurne Garciak esan du EAJ dela estatutuari «balio politiko eta soziala» kentzen diona PPrekin edo PSOErekin dituen negoziazioetan «trukerako txanpon gisa» erabiltzen duenean.

Oso bestelakoa izan da PSE-EEren eta PPren balorazioa. PSE-EE prest agertu da proposamenaren zenbait puntu babesteko —horien artean, Espainiako Gobernuari estatutua betetzeko egitaraua eskatzearena—, baina beste zenbait puntutan agertzen zenarekin ados ez zegoenez eta proposamena osorik bozkatu behar zenez, kontrako botoa eman du.

PPko Borja Senperrek, berriz, esan du Gernikako Estatutuak «osasun bikaina» duela, eta ziur agertu da datozen hilabeteetan Espainiako Gobernua eta Eusko Jaurlaritza ados paratuko direna eskumen gehiagoren inguruan.

Legebiltzarraren bilkura amaitutakoan, EH Bilduk «garrantzitsutzat» jo du Espainiako Gobernuari «ultimatuma» eman izana estatutua betetzeko plangintza aurkez dezan. Eztabaidan PPk eta PSE-EEk izan duten jarreratik EH Bilduk ondorioztatu du bi alderdi horiek direla «estatus berria adosteko oztopo nagusia».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Unai Fernandez de Betoño eta Rocio Vitero. ©

EH Bilduk Rocio Vitero aurkeztuko du Gasteizko alkatetzarako

Jon O. Urain

Indar subiranistak atzo jakinarazi zuen Eva Lopez de Arroiabe izango dela Arabako ahaldun nagusi izateko proposatuko duen hautagaia.

Frantziako Asanblearako bozak izanen dira ekainean. ©Guillaume Fauveau

Diputatu izateko 32 hautagai izanen dira Ipar Euskal Herrian

Oihana Teyseyre Koskarat

Ipar Euskal Herriko hiru hautesbarrutietan, orotara, 32 hautagai lehiatuko dira Frantziako Asanblearako bozetan. Kanpaina ofiziala heldu den astelehenean hasiko dute.

Espainiko koroaren aurka Sortuk antolatutako protesta bat. ©JAGOBA MANTEROLA/FOKU

Monarkiaren aurkako adierazpenak despenalizatzeko proposamena egin dute EH Bildu eta ERC-k

Berria

Gaur egun, sei hilabete eta bi urte arteko espetxe zigorrarekin zigortuta daude koroaren aurkako adierazpenak

Martuteneko kartzelako irudi bat, kanpotik, joan den astean. ©Idoia Zabaleta / FOKU

Bertze hiru euskal preso jarri dituzte hirugarren graduan

Maddi Ane Txoperena Iribarren

Gorka Martinez Ahedori, Gorka Lupiañez Mintegiri eta Aitor Esnaola Dorronsorori eman diete erregimen irekia. Martuteneko eta Basauriko espetxeetan daude.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...