Guardia zibilek Terribas kazetariari jarritako salaketa artxibatu dute

Iraileko gertaeretan Catalunya Radion Poliziaren mugimenduen berri zabaltzea egotzi zioten
Monica Terribas Carles Puigdemont elkarrizketatzen, Bruselan, urriaren 7an, <em>El Matí</em> saioan.
Monica Terribas Carles Puigdemont elkarrizketatzen, Bruselan, urriaren 7an, El Matí saioan. CATALUNYA RADIO / EFE

Edu Lartzanguren -

2018ko uztailak 13
Guardia Zibilen Elkarte Batuak (AUGC) Catalunya Radioko kazetari Monica Terribasen aurka jarritako salaketa artxibatzea erabaki du Bartzelonako auzitegi batek. Urriaren 1eko erreferendumaren kontrako operazioetan, Guardia Zibilaren eta Espainiako Poliziaren mugimenduen berri emateko eskatu zien Terribasek entzuleei El Matí goizeko magazinean, salaketaren arabera. Epaileak ez du lege-hausterik ikusi Terribasen jokabidean.

Salatzaileek esan zutenez, Guardia Zibilaren eta Espainiako Poliziaren ibilgailuak non zeuden kontatzeko eskatu zien Terribasek entzuleei irratian. Catalunya Radioren arabera, ordea, jendea sare sozialetan ordurako jartzen ari zen informazioaren berri eman zuen Terribasek, besterik gabe. Bartzelonako 14. instrukzio auzitegiko Cristina Ferrando epaileak ebazpenean idatzi duenez, ez dago lege-hausterik, Terribasek eginikoa ez delako sartzen «zigor kodeak zehazturiko tipoetan».

Erreferendumaren kontra

Egun beroak izan ziren irailaren 20a, 21a eta 22a Katalunian, batez ere Bartzelonan. Urriaren 1eko erreferenduma prestatzeko lanetan ibiltzea egotzita, hamabost pertsona atxilotu zituen Guardia Zibilak 20an, Generalitateko goi kargudunak tartean. Ekonomia Kontseilaritzan sartu ziren, Bartzelonako Rambletan. ANC Biltzar Nazional Katalanak eta Omnium Culturalek Rambletara joatera deitu zuten, eta milaka pertsona elkartu ziren egoitzen aurrean: 40.000, Bartzelonako Udaltzaingoak emaniko datuen arabera.

Hurrengo goizean, protesta bilkurak egin zituzten Kataluniako hainbat hiritan. Unibertsitateko ikasleek hiriburuko Diagonal hiribidea itxi zuten, adibidez, eta jendetza elkartu zen Justizia Auzitegi Nagusiaren atarian, atxilotuak aska zitzatela eskatzeko.

Irailaren 22an, Espainiako Poliziaren egoitzen aurrean egin zituzten protestak. Epailearen arabera, Terribasek irratian zabaldu zuen Figueresko Trave hotelaren aurrean Poliziaren autoak zeudela. Hurrengo egunetan, protestak egin zituzten hiritarrek horren aurrean, eta han ostatua hartua zuten hainbat poliziak alde egin behar izan zuten.

Epailearen arabera, ez dago frogarik esateko «harreman zuzena» dagoela Terribasek irratian eginiko eskaeraren eta protesten artean. Edonola ere, kazetariaren lanaren inguruko balorazioak egin ditu Ferrandok ebazpenean. Haren arabera, «bazirudien» kazetariak Poliziaren operazioa «oztopatu nahi zuela». Gaineratu duenez, «ikertuaren jokabidea arduragabea izan zen etika profesionalaren ikuspuntutik».

Ebazpenaren berri izanda, poza adierazi du Terribasek Catalunya Radion, bi arrazoirengatik: alde batetik, salaketa artxibatu dutelako, eta, bestetik, erabakiak erakutsi duelako «zerbitzu publikoa egin behar zen bezala» egin dutela, «sasoi gatazkatsu honetan».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna