Albistea entzun

Kataluniako hauteskundeak. Auzibideak

Puigdemonten aurkako ikerketa ere bere gain hartu du Gorenak

Pablo Llarena epaileak baliogabetu egin ditu Auzitegi Nazionalak presidentearen eta bost kontseilarien aurka jarritako euroaginduak. Bueltatuz gero, atxilotu egingo lituzkete
Rull eta Turull, atzo, ekitaldi batean, Puigdemont, Puig, Ponsati eta Comin bideokonferentziaz agurtzen.
Rull eta Turull, atzo, ekitaldi batean, Puigdemont, Puig, Ponsati eta Comin bideokonferentziaz agurtzen. TONI ALBIR / EFE Tamaina handiagoan ikusi

Igor Susaeta -

2017ko abenduak 6

Kataluniako Gobernuko kideek ustez egindako delituek —matxinada, sedizioa eta diru publikoaren erabilera okerra— «izaera plurisubjektiboa» dute, Pablo Llarenan esanetan. Espainiako Auzitegi Goreneko epaileak joan den azaroaren 24an hartu zuen bere gain kausa guztiaren kontrola, eta ikertu guztiek delituak «era bateratuan» egin zituztelakoan dago. Horregatik, abenduaren 21eko hauteskundeetarako lehen kanpaina egunean, Carles Puigdemont presidentearen eta bost kontseilarien kontra Auzitegi Nazionaleko Camen Lamela epaileak joan den azaroaren 3an ezarritako euroaginduak baliogabetzea ebatzi du. Belgikako lehen auzialdiko epaile bat ari zen horien kontrako auzia ikertzen, eta hilaren 14an zen ebaztekoa estradizio eskaera onartu ala ez. Llarenak atzo kaleratu zuen ebazpenaren autoa, eta auziari «erantzun bateratua» eman ahal izateko inputatu guztiak auzitegi berak ikertu behar dituela argudiatu du. Belgikako justiziak kendu dizkie kautela neurriak.

Baina bozetarako Junts Per Catalunyaren zerrendaburua izanagatik, Puigdemontek ez du Belgikako erbestetik itzultzeko asmorik. Halaxe jakinarazi du Paul Bekaertek, haren defentsako abokatuetako batek. Bederatzi orrialdeko autoan jasotakoaren arabera, euroaginduak eta nazioarteko atxilotze aginduak bertan behera utzi ditu magistratuak, bai, baina, Espainiara itzuliz gero, Puigdemont eta Antoni Comin, Clara Ponsati, Meritxell Serret eta Lluis Puig atxilotzea aginduko luke.

L'Echo Belgikako egunkariak Bekaert elkarrizketatu zuen atzo, eta hark argi dauka Llarenak zergatik egin duen hautu hori: «Espainiako epailea beldur da Belgikako erabakiak ez ote dituen ezberdintasun onartezinak edukiko Espainian, egun, espetxean dauden independentisten epaiketarekin parekatuta». Izan ere, Belgikako Zigor Kodeak ez ditu jasotzen sedizio eta matxinada delituak Espainiakoak bezala, eta, beraz, gerta zitekeen Belgikako epaileak, fiskaltzak eskatu bezala, estradizio eskaera onartzea, baina soilik diru publikoaren erabilera okerraren delitua onartuta, sedizioarena eta matxinadarena baztertuta. Kasu horretan, inhabilitatuz zigortuko lituzkete.

Hori guztia kontuan hartuta, Jaume Alonso-Cuevillas Puigdemonten defentsako beste abokatuetako batek adierazi zuen, atzo, Llarenak erabakia hartu duela nazioartean «irrigarri ez geratzeko»; gehitu zuen, gainera, «normalena» litzatekeela Belgikak kasua artxibatzea. Llarena magistratuak berak ondokoa dio autoan: «(...) posible denez eskaera egin zaion estatuak [Belgikak] atxilotze aginduak partzialki ukatzea (...) zeinak zailduko luke kausen bateratzeari erantzun homogeneoa ematea (...)».

Haren esanetan, Lamelak atxilotze aginduak ezarri zituenarekin konparatuta, diferentea da egoera. Eta hori justifikatzeko, Belgikan erbesteratutakoak bozetan hautagaiak izango direla dio. «Hautagai izateko aurkeztu direnez, auzipetuek Espainiara itzultzeko intentzioa agertu dutela dirudi».

Oraingoz, ordea, eta abokatuen hitzak aintzat hartuta, ez dute horretarako asmorik. Puigdemontek behin baino gehiagotan nabarmendu izan du bi arrazoirengatik jo zuela Bruselara. Batetik, ez zelako Espainiako justiziaz fio; eta, bestetik, Kataluniako auzia nazioartekotzea asmo zuelako. Azkenean, baina, ez dute Belgikan epaituko. Hango justiziak kendu dizkio azaroaren 5ean aurrenekoz deklaratu zuenean instrukzio epaile batek ezarritako kautela neurriak. Presidenteak eta kontseilariek ezin izan dute Belgikatik atera azken hilabetean; beren bizitokiaren berri eman behar izan dute; eta hala exijitu dietenean epaitegi batera aurkeztu behar izan dute.

Zenbait iturriren arabera, ANC Biltzar Nazional Katalanak eta Omnium Culturalek biharko Bruselan deitutako manifestazioan parte hartzekoak dira Puigdemont eta kontseilariak. 11.00etan hasiko da, eta Wake Up Europe (esnatu Europa) lelopean, Kataluniarentzat demokrazia eskatuko dute.

Forn eta Sanchez

Joaquim Forn kartzelan mantentzea erabaki zuen, herenegun, Llarena epaileak. Baina, Kataluniako egunkari batek atzo argitaratutakoaren arabera, Kataluniako Gobernuko Barne kontseilariak idatzi bat bidalio dio Gorenari, berriro«ahalik eta azkarrena» deklaratu nahi duela jakinaraziz. Horretan dioenez, Llarenari, aurrez, deklaratzeko eskatu zionean, auzian guztiz sakontzeko asmoarekin egin zuen, baina epaileak haien egoera pertsolaz soilik galdekatu zituen. Jordi Sanchezek ANCko buruak ere berriro deklaratu nahi du, eta Oriol Junqueras Kataluniako presidenteordeak kartzelaldiaren kontrako helegitea jarriko du

Jordi Turull eta Josep Rull dira aske geratutako sei kontseilaretako bi, eta atzo, Junts Per Catalunyaren ekitaldi batean esan zuten Espainiako Estatuak ez duela lortu haiek «umiliatzea».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Erreskatea, Diyarbakirren.

5.000tik gora dira oraingoz Ekialde Hurbileko seismoetan hildakoak

Arantxa Elizegi Egilegor - Mikel O. Iribar

Gau osoan zehar lanean jarraitu dute erreskate taldeek, baina toki askotan laguntzaren zain daude oraindik. Ohartarazi dute biktima kopurua handitu egingo dela datozen orduetan. Milaka dira kaltetuak, eta 20.000tik gora zaurituak. Erdoganek hiru hilabeteko larrialdi egoera ezarri du hamar probintziatan.

«Herrialdearen historiako lurrikararik okerrena izan da hau»

«Herrialdearen historiako lurrikararik okerrena izan da hau»

Orsola Casagrande

Kurdistanen krisi mahaia eratu du HDP alderdiak, laguntza kudeatu eta kaltetutako eremuetara iristeko. Aterpeak lortzea da orain lehentasuna Sancarrentzat.

Greziako kostazainen ontzi bat, artxiboko irudi batean. ©HELLENIC COAST GUARD / EFE

Gutxienez hiru migratzaile hil eta hogeitik gora desagertu dira Lesbostik gertu

Mikel O. Iribar

Kostazainek hamasei pertsona erreskatatu dituzte. Bizirik atera direnen esanetan, haien ontzia haitzen aurka jo ostean hondoratu da.

Palestinar bat astelehenean Jeriko hirian izandako tiroketen arrastoei begira. ©EFE

Israelgo armadak adin txikiko palestinar bat hil du tiroz

Berria

Gazteak haien kontra tiro egin zuela adierazi dute armadaren iturriek. Urte hasieratik gutxienez 42 palestinar hil ditu Israelek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.