'Streaming' plataformetako edukien %30ek Europakoak izan beharko dute

Europako Batasunak abenduan onartuko du legea. Herrialde bakoitzak kuotak ezar ditzake

Reed Hastings Netflix plataformaren sortzailea eta Ted Sarandos eduki arduraduna, Marseillan. GUILLAUME HORCAJUELO / EFE.
urtzi urkizu
2018ko irailaren 14a
00:00
Entzun
Ikus-entzunezko merkatuan eragin handia izaten ari dira Netflix, HBO, Amazon Video eta halako streaming plataformak. Testuinguru berriari erantzuteko asmoz, Europako Parlamentuan, Europako Kontseiluan eta Batzordean akordio politiko bat egin dute uda honetan, eta, horren bitartez, lege bat onartuko dute nahieran zerbitzuetako obra europarren sustapenaren inguruan. Roberto Viola Europako Batzordeko ordezkariak berriki esan duenez, abenduan onartuko dute legea parlamentuan, eta bozketa «formalitate hutsa» izango da. Araudi berriaren eraginez, aipatutako plataformetako katalogoetan edukien %30 gutxienez Europan ekoitziak izan beharko dira.

Goiz da oraindik esateko nolako eragina izan dezakeen ikus-entzunezkoen tokiko industrietan. Eiken ikus-entzunezkoen klusterreko presidente Aletxu Etxebarriaren iritziz, neurria «beharrezko» saiakera bat izan daiteke «tokiko industria garatzeko eta sustatzeko». Nabarmendu duenez, AEBetako plataformek ikus-entzunezko edukiak zabaldu eta kontsumitzeko arauak aldatu dituzte. «Gelditzeko etorri dira, gainera».

Etxebarriaren ustez, Europako fikzioak «osasun bikaina» du. «Baina horrek lanpostu gehiago sorrarazi beharko lituzke; tokiko industriak nazioartekotzea lortu beharko luke, eta sektoreak are gehiago hazi beharko luke».

Europako lege berria onartu eta gero, estatu bakoitzak hogei hilabeteko epea izango du betetzeko, eta kuota %40ra igotzeko aukera izango du. Horrez gain, plataformei beste azpikuota bat ezartzeko aukera izango dute, herrialde bakoitzeko ekoizpenei dagokiona. «Beste kuota hori nola ezarriko den ikusi beharko dugu», esan du Etxebarriak. «Operadoreei ezartzen bazaie, zinemaren finantzaketan bezala, tresna erabilgarria izan daiteke». Tarifen gehigarri bat irits daiteke tokiko filmen eta telesailen ekoizpenean; Alemanian, esate baterako, Netflixek jada ordaintzen du gehigarri hori.

Aipatutako plataformetan euskarazko edukiak oso gutxi izan ohi dira, eta batzuetan ez dago bakar bat ere. Katalunian, Plataforma per la Llenguak bi urte baino gehiago daramatza Netflixi eta beste plataformei katalanezko eduki gehiago sartzeko eskatzen; Euskal Herrian ez da halako eskaerarik zabaldu.

Etxebarriak uste du sortzaile eta ekoizleentzako finantzaketa «espezifikoa» sortu beharko litzatekeela, fikzioa euskaraz egin dezaten. «Jaurlaritzak euskarazko zinemarentzako laguntzak ematen dituen moduan, telesailentzako diru laguntza bat egituratu beharko litzateke».
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.