Albistea entzun

EITBk ziberjazarpenari buruzko websail bat emango du

Txekiar Errepublikako '#Martyisdead' atalka emango dute webean, eta ETBn osorik hilaren 27an
Emmy International sari bat jaso du <em>#Martyisdead</em> websailak. EITBk euskarara bikoiztuta emango du.
Emmy International sari bat jaso du #Martyisdead websailak. EITBk euskarara bikoiztuta emango du. EITB Tamaina handiagoan ikusi

Urtzi Urkizu -

2022ko martxoak 19

Interneteko bullying-aren inguruko kanpaina bat jarriko dute martxan EITBko hedabide guztiek datorren astelehenean. Askotariko edukiak eskainiko dituzte gaiaren inguruan, eta webgune propio bat ere prestatuko dute. Edukien artean, bereziena Txekiar Errepublikako #Martyisdead websaila izango da: hilaren 21etik aurrera, egunero atal bat jarriko dute EITBren webgunean, 15:30ean —EITBren Youtubeko kanalean ere ikusgai egongo da—; eta ETB1ek zortzi atalak errenkadan emango ditu, hilaren 27an, 21:30ean. Atal bakoitza 10-12 minutu ingurukoa da.

#Martyisdead websaila Pavel Soukupek sortu eta zuzendu du. Iaz atal laburretako telesail onenaren Emmy International saria irabazi zuen. Istorioak ziberjazarpenaren gaiari zuzenean heltzen dio: ustekabean hil da Marty izeneko 15 urteko mutil bat. Zendu aurretik grabatutako bideo beldurgarri sorta bat utzi du. Minak atsekabetuta, Martyren aita semearen bizitza digitalaren zatiak berreraikitzen saiatuko da, bere amaiera tragikoaren nondik norakoen berri izateko. Websailaren arduradunek nerabeekin lan egiten duten psikologoen esperientzia baliatu dute fikzioa sortzeko, eta zibersegurtasuneko adituen eta beste profesional batzuen laguntza izan dute. Egileak beste proiektu batean ari dira lanean: #Annaismissing. Merkatu beltzean bideoak eskaintzeko lan egiten duen talde baten eta neska baten bahiketaren istorioa kontatuko dute.

Hilaren 27an, websailaren emanaldiaren ostean, ETB1ek saio berezi bat eskainiko du. Xabier Madariagak aurkeztuko du, eta ziberjazarpenaren inguruko gakoak ematen saiatuko dira gonbidatu hauek: Esti Linares Deustuko Unibertsitateko ikertzailea, Tamara Martinez gizarte langilea, Alexander Rodriguez orientatzaile eta psikologoa, eta Ageda Laraudogoitia irakaslea. Ondotik Interneten ere ikusi ahalko da programa hori.

Matxismoa sarean

Madariagak berak aurkezten du Ur handitan saioan, eta bertan Matxismoa sarean gaiari helduko diote datorren asteartean. Itsaso Cañada Peña sexologoak tailer bat antolatu du sei gazterekin, eta haien lekukotzak jasoko dituzte. Bestetik, Madariagak Esti Linares elkarrizketatuko du —sareetako indarkeria matxistan aditua da Linares—. Erreportajeak, bestetik, Interneteko sare sozialen alde onak ere nabarmenduko ditu, eta mugimendu eraldatzaile gisa zer funtzio izan dezaketen aztertuko dute.

Telebistako emanaldiaren aurretik, erreportajearen aurrestreinaldia egingo dute asteartean bertan, 12:00etan, Gasteizko Ekialdea II institutuan. Solasaldi bat egingo dute gero.

Interneteko bullying-aren gaineko hogei bideo didaktiko zabalduko ditu EITBk datozen egunetan. Go!azen eta Irabazi arte telesailetako aktoreek gaiaren inguruko aholkuak emango dituzte lan horietan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©MAIALEN ANDRES / FOKU

«Operak egokitu egin du bere mezua»

Enekoitz Telleria Sarriegi

Opus Liricak sasoi berria aurkeztu du. Emakumeak jarri dituzte «erdian», eta indarkeria matxistari buruzko «eztabaida kritikoa» proposatu. «Bai noski: egin daiteke hori operaren bidez», ziurtatu du Garmendiak.
1 ©IDOIA ZABALETA / FOKU

Infusio tantak loratzeko

Olaia L. Garaialde

Josenea enpresak hogei urte daramatza lanean, eta infusioak eta teak egiten dituzte batez ere. Nafarroan egiten dute ekoizpena, hasieratik amaierara arte. Ekonomia zirkularraren Europako lehenengo parkea izateko bidean da.
Urtantan parte hartuko duten musikarietako batzuk, antolatzaileekin eta babesleekin batera. ©AMAIA JIMENEZ LARREA

Musika eta natura uztartuz

Amaia Jimenez Larrea

Uztailaren 22tik 24ra Urtanta jaialdia egingo dute, Urmugaren bertsio murriztua. Mendia eta itsasoa lotuko ditu ibilaldiak, eta Pasaiatik Azkainera sei musika emanaldi izango dira
Ehun urte igaro dira Howard Carter arkeologoak Tutankamonen hilobiaren sarrera aurkitu zuenetik. ©JAIZKI FONTANEDA / FOKU

Faraoiaren lehen bisitariak

Unai Etxenausia

Tutankamonen hilobia aurkitu zutenean hainbat lagun joan ziren Euskal Herritik hura bisitatzera. Gasteizko Bibat museoak bildu ditu haien ingurukoak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...