Zaldun bat abesti zaharren bila

Xabaltxek 'Kantuen kontrabandista' aurkeztuko du. Kanaldudek eta France3k ekoitziko dute
Xabaltx musikaria eta Inda behorra, <em>Kantuen kontrabandista</em> saioaren grabaketa batean.
Xabaltx musikaria eta Inda behorra, Kantuen kontrabandista saioaren grabaketa batean. CATHERINE GREL Tamaina handiagoan ikusi

Urtzi Urkizu -

2020ko urriak 17

Xabaltx musikariak eta Inda behorrak bidaia bat hasi dute, zeharkaldi bat Euskal Herriko zenbait herritan barna, desagertuak edo galtzekotan diren kantuen bila. Lehen grabaketak Hondarribian (Gipuzkoa) egin dituzte, eta datozen asteetan euskal kantuen ondare zaintzako lanetan arituko dira zenbait txokotan. Zeharkaldi horren emaitza Kantuen kontrabandista dokumental saioa izango da. Kanaldudek datorren urtean estreinatuko du —ez dago estreinaldirako datarik—, eta France3k 2022an emango du —euskaraz, frantsesezko azpidatziekin—. Kestu ekoizpen etxearen lan bat da. Saioa egiteko ideia Iban Rusiñolena da, eta bera da zuzendari eta gidoilaria. Atzo aurkeztu zuten, Baionan.

Rusiñolek azaldu duenez, joan dira bospasei urte Xabaltxekin abentura bat grabatzeko ideia piztu zitzaionetik. «Ideia aipatu nion musikariari, eta hark ere halako zerbait egin nahi zuen». Ondotik, Xabi Berraondo ekoizlearekin jarri ziren harremanetan, eta hark kantu zaharrak biltzearen ideia eraman zuen proiektura.

Saioak «abentura kutsu nabaria» izango duela aurreratu du Rusiñolek. «Noizbehinka, Xabaltxek hitz egingo dio kamerari. Etengabe inprobisatzen ari dela emango du, nahiz eta ez den ezer inprobisatua egongo».

Metodologia bat hartu dute lana aurrera eramateko: Resurreccion Maria Azkueren kantu zaharren liburu bat baliatu dute oinarritzat —digitalizatuta dagoen datu basea, hain zuzen—, eta herri jakin bakoitzean Azkuek zein kantu zahar bildu zituen begiratzen dute. «Ekin diezaiogun abenturari, ea norbait aurkitzen dugun kanta ezagutzen duena». Hartara, atal bakoitzean transmisore bat dago, «gehienetan, adin jakin batekoa», eta, gero, kantu zaharra gaur egungo musikari batzuei pasatzen diete.

Kontzertu bat, bukatzeko

Sei etapa izango ditu zeharkaldiak, eta Larrainera (Zuberoa) iritsiko dira. Programako zazpigarren eta azken atalerako, berriz, kontzertu bat antolatuko dute. Saioan bildutako kantu zahar guztiak eskainiko dituzte kontzertuan bidelagun izan dituzten musikariek. Udaberrian egin nahiko lukete kontzertu hori.

Horrez gain, Rusiñolek aipatu duenez, Facebook sare sozialean talde bat sortu dute, herritarrek kantak proposatu ditzaten. «Saioko kantuei buruz hitz egingo diguten transmisoreak bilatzeko baliagarria izatea ere espero dugu». Transmisoreen bila ari direnez, deialdia egin dute ea honako herri hauetan nork ezagutzen dituen kanta hauek: Zugarramurdin (Nafarroa), Abenduaren hamarraz; Baigorrin (Nafarroa Beherea), Bazterretik bazterrera, Larretik etxera yin edo Espainia hortan; Bankan (Nafarroa Beherea), Sujet berri bat; Luzaiden (Nafarroa), Anderia gorarik; eta Senperen (Lapurdi), Arrosa xuriaren azpian.

Rusiñoli iruditzen zaio bigarren denboraldi bat egiteko aukera egon daitekeela, sare sozialetan herritarrek proposatutako kantak baliatuta.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Albiste gehiago

Eskoletako Urmaelen Sareko kideak, Ataungo Joxemiel Barandiaran herri eskolako urmaelean, atzo. ©JON URBE / FOKU

Mundu bat putzu eginda

Enekoitz Telleria Sarriegi

Eskoletako Urmaelen Sareak lehen topaketa egin du Ataunen. Urmael bat sortzeak eta kudeatzeak dituen onurez eta proiektuak saretzeko beharraz aritu dira. «Laborategi natural batzuk dira».
1 ©- / EZEZAGUNA

Baratzeak loratzen duen guztia

Enekoitz Telleria Sarriegi

Hiri baratzeek gero eta erabiltzaile gehiago dituzte. Eskariak gora egin du, eta eskaintzari neurria jarri nahian ari dira euskal hiriburuetako udalak. Onurak baino ez dizkiote ikusten nola teknikariek hala erabiltzaileek.

Aktore protagonistak Nicole Kidman eta Hugh Grant. ©BERRIA

Burbuila bezain hauskorra

Mikel Yarza Artola

David E. Kelley estatubatuarrak 'The Undoing' telesaila aurkeztu du, 'Big Litte Lies' goratuaren ostean

Itziar Atienza, Aitziber Garmendia, Getari Etxegarai, Leire Ruiz, Naiara Arnedo eta Sara Cozar, filmaren grabazioan, Bizkaian. ©ERLAUNTZA

Umorez blaitutako ziztada

Nagore Arin

Zinema aretoetara iritsi da 'Erlauntza' ekoizpena, bi urtez antzokiz antzoki ibili ondoren. Sei emakume ditu protagonistatzat, eta ostiralean estreinatuko da Hego Euskal Herrian

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna