Hamaikak denboraldia hasi du, eta gaur Diada emango du zuzenean

Aurreko ikasturtearen amaierako programazioa «egonkortzen» ahaleginduko dira udazkenean
Beñat Zarrabeitiak Diadari buruzko saio berezia aurkeztuko du gaur arratsaldean.
Beñat Zarrabeitiak Diadari buruzko saio berezia aurkeztuko du gaur arratsaldean. HAMAIKA

Urtzi Urkizu -

2018ko irailak 11
Albistegiak, aktualitatearen jarraipena, mahai inguruak eta analisi tarteak izango dira Hamaikaren programazioaren ardatza datozen hilabeteetan. Hala iragarri du Beñat Zarrabeitia telebistako komunikazio arduradunak. Horren erakusgarri, Hamaikak saio berezia emango du gaur arratsaldean, Kataluniako Diadaren inguruan, 17:00etatik 19:00etara —21:30etik 23:30era ikusi ahalko da berriro—. Zarrabeitiak berak aurkeztuko du zuzeneko programa, Bilboko platotik. TV3 kateko irudiak ikusi ahalko dira, eta, horrez gain, Saioa Baleztena Bartzelonako kaleetan ibiliko da elkarrizketak egiten. «Baleztena lore eskaintzan egongo da goizean, eta Euskal Herritik joandako ordezkariak elkarrizketatuko ditu», azaldu du Zarrabeitiak. «Bideoak bidaliko dizkigu Diadatik». Euskal Herriko errealitateaz ere mintzatuko dira saioan.

Hamaikak atzo hasi zuen denboraldi berria. «Aurreko ikasturtearen bigarren partean egin genuena egonkortzen saiatuko gara denboraldi honetan», azaldu du Zarrabeitiak. «Gurean gaur albistegia 20:30ean emango dugu; lehen blokean, Nekane Zinkunegi aurkezleak albisteen kontakizuna egingo du, eta bigarren blokean elkarrizketak eta erreportajeak emango ditugu». Bilboko, Iruñeko eta Donostiako erredakzioetan landutako albisteak sartuko dituzte albistegian. Ostiraletan, Gurean gaur-ekin batera, asteko kronika egingo dute.

«Jarraitutasuna» saioei

Aurreko denboraldiaren bigarren partean, Hamaikak hainbat saio berri jarri zituen martxan, eta Zarrabeitiak nabarmendu du horiei «jarraitutasuna» ematen saiatuko direla: astelehenetan, Hiriburuan saioa egingo dute, Bilbo Handia ardatz dutela —datorren astean jai ereduei buruz ariko dira—; astearteetan, Edurne Senisoainek Nafarroa gaur eztabaida saioa aurkeztuko du; asteazkenetan, Irati Elizaldek Bidegurutzea aurkeztuko du —bihar Diadaren biharamuna aztertuko dute, eta immigrazio gaiez ariko dira—; eta ostegunetan, kultur gaiak landuko dituzte Artekale-n —Iker Aginaga arituko da aurkezle—. Hamaikak Musika zuzenean saioa ere emango du, ostegunetan, Koldo Otamendiren eskutik. «Programa horrek jarraipen polita izan du musikagintzaren eremuan. Arreta lortu du, eta horretan jarraitu nahiko genuke», esan du Hamaikako kazetariak.

Zarrabeitiak iragarri du asteburuetan saio berezi dezente izango direla: Nafarroa Oinezi buruzkoa, Sareren urriko manifestazioa, Durangoko Azoka... «Aktualitateari jarraituko diogu datozen hilabeteetan», esan du Hamaikako komunikazio arduradunak. «Eduki bereziak prestatzen ari gara Euskaraldiari begira ere».

Donostiako Zinemaldiko egunetan Zurriolako butaka saioa emango du Hamaikak gauero — BERRIArekin eta euskarazko beste hedabide batzuekin elkarlanean egiten dute—.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna