Albistea entzun

Koldo Berasategi. Txistularia

«Musika eta ikuskizuna batu ditugu»

Txistularien alardeak, urtero, sanferminetako igandean egiten du bere ikuskizuna. Gaur, 56. aldiz egingo dute: Eskozia eta Irlandako musika euskal txistuarekin bateratuko dute.
IÑAKI BERASTEGI

Iñaki Berastegi -

2015eko uztailak 12

Irailean prestatzen hasi ondoren, gaur egingo du ikuskizuna txistularien alardeak, San Jose plazan. Koldo Berasategi txistulariak (Zegama, Gipuzkoa, 1958) uste du 56 urtean alardeak bizi izan duen aldaketa txistuaren garapenari lotuta dagoela. Inoiz baino jende gehiago espero dute aurten. Eguraldia lagun, joan den urtean zenbatutako 2.000 ikusleren marka gainditzea da helburuetako bat.

Ibilbide luzea duen ekitaldia da txistularien alardea.

1959az geroztik egiten da txistularien alardea. Lehenengo ekitaldi hartan ehunka txistulari bildu ziren, zezen plazan. Hala ere, San Jose plaza agertoki gisa egonkortu arte, Taconeran, Gazteluko plazan eta Sarasate pasealekuan ere egin izan da alardea, besteak beste. Aurtengoa 56. aldia da, baina XIV. mendera jo behar da txistularien lehen erreferentziak aurkitu ahal izateko. Sanferminak ospatzen hasi zirenean, bazeuden jada txistuarekin ospakizunak alaitzen zituztenak.

Musika zelta izango da aurtengo protagonista nagusia, ezta?

Musika eta ikuskizuna batu ditugu. Txistua jotzeaz gain, gaiarekin zerikusia duen antzerki bat ere antzeztu dugu. Antzerkiari buruz ezin dut askorik esan, sorpresa mantendu nahi dugulako. Gai bat aukeratzen dugu, eta horren inguruan antolatzen dugu ikuskizuna. Irlandak eta Eskoziak Euskal Herriarekin izan zuten harremana izango dugu aurtengoan oinarri. Printzesa zelta-ren izena oso egokia iruditu zitzaigun. Irlandatik etorri eta haurdun geratu zen printzesa bat izan zen. Itxuraz erabat irlandarra zen umea, Jaun zuria deitua; Bizkaiko lehen jauntxoa izan zen.

Euskal Herriko historiarekin zerikusia duten gaiak hautatzen dituzue, beraz?

Saiatzen gara, behintzat. 2013ko alardeko gai nagusia Zugarramurdiko sorginena izan zen. 2014. urtean, berriz, Amerikara emigratu behar izan zuten euskaldunen inguruan antolatu genuen ikuskizuna. Zaharrak diruditen arren, aukeratzen ditugun gaiek badute lotura pixka bat gaurkotasunarekin ere. Esate baterako, lan falta dela-eta gaur egun askok joan behar izaten dute atzerrira.

Nola uztartu duzue txistuaren erritmoa Irlanda eta Eskoziako musikarekin?

Proiektua edo ikuskizunaren gaia zehaztu eta gero, urrian, Euskal Herriko zenbait konpositorerekin biltzen gara. Gaiarekin lotura duten abestiak eskatzen dizkiegu. Urrian egiten dugu eskaera hori, nahikoa denbora izan dezaten abestiak ongi prestatzeko. Ikusi eta moldatu ondoren, ekain aldera, entseguak egiten hasten gara. Astebururo egiten ditugu entseguak, Iruñean.

Txistulari profesionalak bakarrik aritzen dira alardean?

Ez. Profesional bikainek parte hartzen duten arren, ekitaldi amateurra da gurea. Gutxieneko maila bat duenak eta entsegu kopuru batera joan den edozeinek parte har dezake, printzipioz. Hala ere, kontserbatoriotako jendea izaten da nagusiki. Euskal Herriko kontserbatorio ugaritako jendea biltzen du txistularien alardeak.

Ekitaldia antolatzeko orduan laguntza handia izaten duzue?

Egitarau ofizialean sartuta dago alardea. Iruñeko Udalak Euskal Herriko txistulari elkartearekin batera antolatutako ikuskizuna da. Babesleei dagokienez, berriz, helburua ez da soilik laguntzak lortzea. Babesle horiek laguntzaile edo kolaboratzaile izatea nahi dugu. Toti Martinez de Lezea idazlearen laguntza ere izan dugu.

Hiru keinu bereizgarri egin nahi izan ditu aurten alardeak.

Batetik, ekologia zainduko dugu tabernako edalontzi berrerabilgarriekin. Bestetik, elikadura osasungarria, hemengo kalitatezko elikagaiak eskainiz. Azkenik, Paris 365 jantoki solidarioa laguntzen saiatuko gara.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©MARISOL RAMIREZ / FOKU

«Kultur politikek mota guztietako interesei eman behar diete jaten»

Zihara Jainaga Larrinaga

Antzerkitik bizi ahal izateko, Euskal Herria utzi eta Suitzara joan zen Gomez, aukera hobeak aurkitu nahian. Hainbat urteren ostean, 'Makers' antzezlanarekin itzuli da. Gaur eta bihar Bilbon arituko da.
Trixertak egin aitzinetik, probak egin dituzte zenbait diseinutan. ©JAGOBA MANTEROLA / FOKU

Elastikoak albiste

Ainhoa Larretxea Agirre

Hiru hanka ditu Trixertak egitasmoak: Oninart, BERRIA eta hiru diseinatzaile. Apirilaren 26an hasi eta uztailaren 4ra arte izanen da martxan albisteak elastiko bihurtzen dituen proiektua.
 ©JON URBE / @FOKU

«Musika ariketa bat egin nahi dut, erakusleiho bat ireki»

Urtzi Urkizu

Asteazkenero hiru musikari edo talde elkartzen dituzte 'Bidegurutzean' saioan. Izagirrek esan du belaunaldi desberdinetakoak biltzen saiatu direla. «Ezusteko politak hartu ditugu».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna