Haurdunaldi subrogatuak kudeatzen dituzten agentziak ikergai

Auzitegi Nazionalak ikerketa bat abiatuko du, Espainiako Gobernuak eskatuta. Delgadok esan du ez diela eragingo gurasoei eta haurrei.

Erredakzioa -

2019ko abuztuak 14

Espainiako Auzitegi Nazionaleko Fiskaltzak kasu egingo dio Dolores Delgado jarduneko Justizia ministroari, eta Espainian haurdunaldi subrogatuak kudeatzen dituzten agentziak ikertuko ditu. Delgadok gogora ekarri du Espainiako legediak debekatuta dauzkala haurdunaldi subrogatuak —Frantziako legediak ere galarazia du jardun hori—, eta salatu du agentzia batzuek dirua irabazten dutela «legez kanpoko jarduera horiek beste herrialde batzuetan eginez». Halere, ministroak esan du ikerketak ez duela eraginik izango umeak horrela izan dituzten gurasoentzat, ezta haur horientzat ere.

Espainiako Justizia Ministerioak astelehenean eskatu zion Fiskaltza Nagusiari ikertzen hasteko, agentzia batzuen jardunean «delitu zantzuak» antzeman dituelakoan. Espainiako debekuaz gain, gobernuak argudiotzat hartu du haurdunaldi subrogatuak egiten diren herrialdeetako jarduna ere: besteak beste, prozesuan emakumeen eskubideak urra ditzaketela, edo seme-alaba genetikotzat iragan ditzaketela halako loturarik ez duten haurrak. «Oso-oso gai larria da», berretsi du Delgadok. Adingabeen trafikoan aritzea, talde kriminal baten parte izatea, dirua zuritzea edo dokumentuak faltsutzea aipatu ditu delitu posibleen artean.

Agentzia horiek bitartekaritzan aritzen dira: haurdun geratuko den emakumearen eta umea jasoko duten gurasoen arteko kontratua kudeatzen dute. Jardun hori debekatuta duten estatuetako herritarrek batez ere Ukrainiara, Amerikako Estatu Batuetara eta Indiara jotzen dute. Delgadok argitu du ez duela eskatu agentzia guztiak ikertzeko, baizik eta «batzuk», baina ez du zehaztu zeintzuk.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna