«Palestinarren kontrako apartheid sistema bat» izatea egotzi dio AIk Israeli

AI Amnesty International GKE gobernuz kanpoko erakundeak Israeli egotzi dio bere kontrolpeko eremuetan bizi diren palestinarren kontrako «apartheid sistema bat» erabiltzea: «Gure txostenak argitara ematen du Israelen apartheid sistemaren hedadura. Palestinarrak azpiko arraza talde gisakotzat dauzkate, eta eskubideak sistematikoki debekatzen dizkiete».

Israel's apartheid against palestinians (Palestinarren kontrako Israelen apartheida) txostena aurkeztu zuen atzo AIk, eta 2017tik honako kasuak bildu ditu horretan. GKEaren idazkari nagusi Agnes Callamarden arabera, dokumentu horrek azaltzen du «Israelek nola erabiltzen duen mendekotasunean eta zapalketan oinarrituriko sistema bat palestinarren eskubideen kontrola duen eremuetan»; azalpen horrek kontuan hartzen ditu okupaturiko lurraldeetako herritarrak eta Israelen bizi diren palestinarrak.

AIk honako gertakari hauek zerrendatu ditu Israelena «apartheid sistema bat» dela argudiatzeko: palestinarrei beren lurrak eta horien jabetza kentzea, legez kanpoko hilketak egitea, mugimendu askatasuna murriztea eta herritartasuna debekatzea. «Nazioarteko legediaren arabera, horiek apartheid sistema baten ezaugarriak dira», dokumentuan jaso dutenez.

Callamarden ustetan, «agintari israeldarrek kontuak eman behar dituzte apartheidagatik»: «Gizateriaren kontrako krimen bat da, eta mendekotasunean oinarrituriko sistema bat. Txostena osatzeko Israelgo Atzerri Ministerioarekin harremanetan jarri ginen, baina ez dugu erantzunik jaso».

Egoera hori ikusirik, AIk Nazioarteko Zigor Auzitegiari eskatu dio «apartheid krimena kontuan hartzeko» iaz abiatu zuen ikerketan; Nazio Batuen Erakundeko Segurtasun Kontseiluari, berriz, Israeli armak kentzeko. «Zigor ekonomikoak ere agindu beharko lituzkete apartheidarekin zerikusia duten agintarien aurka», dio Amnestyk bere txostenean.

GKEak bere dokumentua argitara eman ondoren, Palestinako Aginte Nazionaleko Atzerri Ministerioak pozez hartu zuen txostenaren edukia, ohar baten bidez adierazi zuenez: «Errealitate krudelaren baieztapen zehatz bat da. Nakbaz geroztik [hondamendia esan nahi du arabieraz, eta 1948ko arabiarren eta israeldarren arteko gerrak eragindako palestinarren exodoa definitzeko erabiltzen da] palestinarrek jasaten duten [...] baztertzea, arrazakeria, apartheida eta zapalketa erakusten ditu».

Israelgo Gobernuak bestelako iritzia helarazi zuen. Atzerri Ministerioko bozeramaile Lior Haiaten ustetan, AIren txostenak «egitate batzuk aukeratu ditu, horietako batzuk testuingurutik kanpo, eta elkarrekin jarri ditu beste informazio batzuk kontuan hartu gabe».

Hau da, gobernuko ordezkariaren arabera, dokumentua Israelen kontrako taldeek «antolaturiko kanpaina baten» parte da, eta «antisemitismo modernoaren ezaugarriak» ditu. AIk erantzun zion ez direla antisemitak, eta gobernuaren adierazpen horiek atentzioa aldentzeko saiakera bat direla.

Iaz, Human Rights Watch giza eskubideen aldeko erakundeak ere «apartheidtzat» jo zuen Israelen sistema. GKE horren ustetan, Israelgo agintariek «neurrigabeko politikak» aplikatzen dizkiete palestinarrei, eta horiek «gizadiaren aurkako apartheid eta jazarpen krimenak eragiten dituzte». B'Tselemek ereapartheid hitza erabili zuen Israel deskribatzeko, iazko urtarrilean.

Ruiz, baldintzapean aske

Juana Ruiz Palestinaren aldeko lan humanitarioa egiten duen Espainiako ekintzaileari baldintzapeko askatasuna ematea erabaki zuen atzo Nazareteko auzitegi batek (Israel). Orain, fiskaltzak astebeteko epea du helegitea aurkeztu ala Ruizen askatasunaren eguna finkatzeko.

Ekintzailea iragan apirilean atxilotu zuten, eta «erakunde ilegal bateko kide» izatea egotzi zioten; Ruizek errugabetasun itun bat onartu zuen, eta auzitegi militar batek hamahiru hilabeteko kartzelaldia ezarri zion joan den azaroan.

Ekintzailea Health World Committees Palestinako gobernuz kanpoko erakundeko langilea da, eta urteak daramatza Zisjordanian bizitzen. Haren kontrako akusazioaren arabera, erakunde horrek dirua ematen zion PAHF Palestina Askatzeko Herri Fronteari, zeina «erakunde terroristatzat» daukan Israelek.