Albistea entzun

Eskutik da, eta hordago joko du

Realak Atletico Madrilen zelaian jokatuko du gaur. Ustez, geratzen zaizkion hiru partidetatik zailena da. Irabaziz gero, ondo bideratuko du bosgarren postua eskuratzea
Robin Le Normand, Luis Suarezekin lehian, Realak eta Atletico Madrilek denboraldi honetan Anoetan jokatutako partidan.
Robin Le Normand, Luis Suarezekin lehian, Realak eta Atletico Madrilek denboraldi honetan Anoetan jokatutako partidan. JUAN HERRERO / EFE Tamaina handiagoan ikusi

Jon Ander De la Hoz -

2021eko maiatzak 12

Sasoi luzea arrastoa uzten ari da Espainiako ligan, eta azken jardunaldietan kartak ondo jokatu nahi dituzte talde guztiek. Zer esanik ez jokoan asko dutenek. Reala da denboraldia sari bat eskuratuz amaitu nahi duten talde horietako bat, Europa ligarako sailkatuta, eta akidurak akidura, helburua lortu arteko bakerik ez du.

Txuri-urdinek abantaila dute Vila-real eta Betis aurkari zuzenekiko. Bosgarren dira sailkapenean, eta beren eskura dute postu horretan amaitzea. Horretarako, hiru partidatan besteek baino puntu gehiago biltzea du xede, gaur bertan hasita. Atletico Madrili irabazi nahi dio horretarako; liga irabazteko lehia betean dagoen taldea da, eta haien etxean ariko dira, gainera. Ez du axola: Realak handira joko du hordagoa, gaur gailenduz gero birtualki sailkatuta legokeelako.

Gaurgero, bederatzi puntu banatuko dituzte txapelketa amaitu artean, eta, haietako hiru lortzeko bidean, hezur gogorra da Atletico Madril. Etxean jokatu dituen hamazazpi neurketetatik hamahirutan gailendu da, eta bakarra galdu du. Bada Wanda Metropolitano estadioko nagusitasuna ageriago uzten duen beste datu bat, ordea: hamar aldiz utzi du atea hutsean. Ez alferrik, Jan Oblak baita ligan gol gutxien jaso dituen atezaina: 35 partidatan 22 gol egin dizkiote. Batez beste, gol bat baino gutxiago neurketako.

Estatistikek espainiarrak jotzen dituzte faborito, baina donostiarren «gogoa» baliatu nahi du Imanol Alguacil teknikariak: «Ez da zelai erraza, ezta talde erraza ere. Urtean zehar orekatuena izan da. Partida bakarra galdu du etxean, eta bederatzi gol besterik ez du jaso. Dena aurka dugu, baina ilusioa, gure alde».

Irabazteko, baina, bere kartak ondo jokatu behar ditu Realak. Zelaiko errege izan den Mikel Merino min hartuta dago, eta Carlos Fernandez zaldun gerlaria ere ez dago jokatzeko. Bai, ordea, taldearen artilleriako beste zenbait jokalari: Asier Illarramendiren eta David Silvaren kasua da. Prest dituen jokalarien zerrenda luzeagoa da orain aste batzuetakoarekin alderatuta, eta horri zukua atera nahi dio Imanolek: «Madrilera doazenak, ondo daude. Orain, nekea badago, eta batzuei kosta egin zaie suspertzea. Azkenera arte itxarongo dut hamaikakoa erabakitzeko».

Imanolek 24 jokalari eraman ditu, eta haien artean da Jon Pacheco erdiko atzelaria. Merinok eta Fernandezek ez ezik, Aihen Muñozek eta Luca Sangallik ere ez dute gehiago jokatuko sasoi honetan, eta etxean geratu dira.

«Jokatzeko erari adi»

Atletico Madril gorengo koskara eraman duen Diego Pablo Simeonek oso berea du ezaugarri bat: taldea beharretara egokitzen daki. Neurketaren atarian nahiz hura jokatzen ari den bitartean, aurkariaren eta unearen arabera antolatzen du multzoa, eta horrek zail jartzen du haien arrastoari segitzea.

Hala uste du Imanolek ere: «Talde bikaina dute, eta entrenatzailea ere halakoxea. Lan handia egin dute, bestela ezinezkoa litzateke horren ondo aritzea. Entzun nion Simeoneri; beti dago lehen aldi bat. Ea, bada. guretzat oraingoan den».

Haien jokoari adi egotea garrantzitsua izango da iluntzean, beraz, eta hori azpimarratu du Imanolek: «Urtean zehar boladak izan dituzte. Batzuetan, jokoaren zama beren bizkar hartu dute, eta, besteetan, ez zaie horrenbeste axola izan, aurkariei baloiaren gidaritza utzi baitiete. Modu ezberdinetan jokatzeko gai dira, eta era guztietan indartsuak dira. Horregatik daude hor goian. Bestela, ez lirateke lehen postuan egongo».

Jadanik, iazkoaren pare

Realak hamasei garaipen eskuratu ditu jada, eta 56 puntu zakuratu. Iazko kopuru berberak dira, eta haiek hobetzeko aukera badu oraindik. Horrek adierazten du txuri-urdinen jardun ona: «Izugarrizko sasoia egiten ari gara, eta ginga jarri nahi diogu. Eta hori bosgarren eginda eta Europa ligan sartuta lortzen da. Kluba ondo dago, eta amaiera ona eman nahi diogu». Conference ligarako aukera bermatuta, Europa ligakoa nahi du orain: «Esan nuen: azken partidan erabakiko da guztia», azpimarratu du Imanolek. Horren aurretik, baina, lorpena bideratu nahi du gaur. Kontrarioak karta hobeagoak baditu ere, hordagoa joko du. Sari handia eskuratu dezake.

ATLETICO MADRIL-REALA
Atletico Madril. Oblak; Trippier, Savic, Felipe, Hermoso, Carrasco; Kondogbia, Llorente, Koke; Correa eta Luis Suarez.
Reala. Remiro; Gorosabel, Aritz, Le Normand, Monreal; Gebara, Zubimendi, Silva; Portu, Isak eta Oiartzabal.
Epailea. Cuadra Fernandez.
Lekua. Wanda Metropolitano.
Ordua. 22:00etan (Mov. La Liga).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Suediako jokalariak, Emil Folsbergek egindako gola ospatzen, atzo, Poloniaren aurka. ©KIRILL KUDRYAVTSEV / EFE

Aurreneko galbahea, igarota

Mikel O. Iribar

Ukraina, Espainia, Alemania eta Portugal sailkatu dira Eurokopako final-zortzirenetara

Etxetik kanpo sartzen diren golek ez dute balio bikoitza izango kanporaketetan

Etxetik kanpo sartzen diren golek ez dute balio bikoitza izango kanporaketetan

Ainara Arratibel Gascon

UEFAk 1965tik indarren zegoen araua ezabatzea erabaki du. Datorren denboralditik aurrera egongo da indarrean neurria.

Jone Ibañez, baloiarekin, Nerea Eizagirre eta Gemma Giliren artean, Realak eta Athleticek denboraldi honetan Zubietan jokatutako derbian. ©JON URBE / FOKU

Deitura ponpoxotik praktikara

Jon Ander De la Hoz

Emakumezkoen futbol liga nagusia profesionalizatzeko erabakia hartu du Espainiako Kirol Kontseilu Gorenak. Dena den, asko dira oraindik airean dauden gaiak. Sheila Elorzaren eta Ane Etxezarretaren ustez, «aurrerapausoa» da, baina «abiapuntua» baino ez: «Idatziz ikusi arte, adi egon behar dugu».

 ©IBON ERRAZU

«Horixe nahi genuen: 30 minutu igaro baino lehen bukatu»

Jon Ander De la Hoz

Emakumezkoen lehen pentatloia irabazi dute Arrutik eta Orbek. Haien esanetan, «lan gogorrak» dira, baina lagun gehiago animatu nahi dituzte: «Pentatloian segitu nahi dugu».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.