Zorigaitzari ihes egin ezinik

Buruz Buruko Txapelketako finala ez da jokatuko hilaren 13an; astebete geroago jokatuko da, hilaren 20an, hain zuzen. Iñaki Artolak eskuin sorbaldaren atzealdeko muskulu zabaleko lesioa du, eta finala astebete atzeratzeko eskatu zuen atzo. Borja Oses Eskuz Pilotako Enpresen Ligako (EPEL) epaile bakarrak onartu egin zion eskaera, txapelketaren araudiak horretarako aukera ematen baitu.

Artolak Beñat Rezustaren aurkako finalerdietako partidan hartu zuen min; hain zuzen, Alegiko (Gipuzkoa) aurrelariak egindako hamazazpigarren tantoan. Hala ere, jokatzen jarraitu zuen, ondo jokatu ere: 22-16 irabazi zuen, eta aurreneko aldiz sailkatu zen Lehen Mailako final baterako. Neurketa amaitzean etorri zen mina, handia. Ordutik, hainbat proba egin dizkiote, eta, horien arabera, eskuin sorbaldaren atzealdeko muskulu zabaleko lesioa du. Ikusteko dago garaiz osatuko den, eta, osatuta ere, zer baldintzatan jokatuko duen. Onetan ez, ziur. Erronka latza bazen sasoi betean egonda Jokin Altunari irabaztea, zer esanik ez bete-betean egon gabe.

Eta osatuko ez balitz, zer? Araudiak dio finalean ariko diren bi pilotarietako batek ezin badu jokatu hirugarren eta laugarren posturako partidako irabazleak ordezkatuko duela finalean. Igande honetan jokatuko dute norgehiagoka hori Beñat Rezustak eta Jose Javier Zabaletak, Irunen (Gipuzkoa), Urantzu frontoian (17:00, ETB1). Ezer gutxi egon ohi da jokoan hirugarren eta laugarren posturako partidan, baina, Artolaren lesioaren ondorioz, garrantzi handia izango du neurketak. Irabazleak saria lor dezake. Egoera deserosoan lortutakoa litzateke, lankide baten zorigaitzaren ondorioz, baina saria litzateke azken finean. Rezustaren eta Zabaletaren kasuan, gainera, handia litzateke, biek ala biek lehenbiziko aldiz jokatuko bailukete Buruz Buruko Txapelketako finala.

Inoiz ez da momentu ona lesionatzeko, baina nekez egon daiteke une okerragorik final bat jokatu baino egun batzuk lehenago baino; are gehiago kirolari baten ibilbideko partidarik garrantzitsuena baldin bada. Eta halaxe da Artolarentzat, lehen finala baitu Lehen Mailan; zein, eta buruz burukoarena, txapelketarik garrantzitsuenarena; eta, nola, eta aspaldiko jokorik onena eginda iritsita. Bazirudien baietz, azkenean izkin egin ziola zorigaitzari, makina bat alditan gora egitea eragotzi dion zorte txarrari. Duela gutxikoa zuen mina eta ezina: koronabirusaren gaitzak azken buruz burukoa jokatu gabe utzi zuen, eta eskuin izterrean izandako lesio batek zeharo baldintzatu zuen haren jarduna azkeneko binakakoan. Baina iraganeko kontuak ziruditen horiek guztiek. Gozatzen ari zen buruz burukoan. Baina ez. Berriz ere itzuli zaizkio iraganeko mamuak, eta modu oso krudelean.

Zorte txarra Artolarena, baina baita Baikorena ere. Kolpe gogorra jaso zuen buruz burukoa aurkeztu bezperan: enpresara iritsi berriak, Erik Jakak, uko egin zion parte hartzeari, perikarditis batengatik. Jakak, beraz, ezin izan du defendatu azken buruz burukoan era ikusgarrian irabazitako txapela.

Mikel Urrutikoetxea izan da banakako final bat jokatu duen Baikoko azken pilotaria. Buruz burukoa jokatu zuen duela bi urte, Iker Irribarriaren aurka, eta orduan ere astebete atzeratu zen finala, Urrutikoetxeak hala eskatuta. Joseba Ezkurdiari irabazitako finalerdietako norgehiagokan ezker eskuan min hartu zuela argudiatu zuen, eta EPELeko epaile bakarrak onartu egin zion eskaera, eta finala astebete geroago jokatu zen. Zaratamoko (Bizkaia) aurrelariak 22-20 galdu zuen finala.