Albistea entzun

Donostiako 69. Zinemaldia. Donostia saria

«Erosoago nago protesien atzean, ni neu izaten baino»

Johnny Depp aktoreak jaso du aurtengo bigarren Donostia saria. Tratu txarren akusazioari buruzko galderei ez die erantzun, eta babesa eskertu dio Zinemaldiari
Johnny Depp aktorea, atzo, arratsaldean prentsaurreko agerraldia egin baino lehen.
Johnny Depp aktorea, atzo, arratsaldean prentsaurreko agerraldia egin baino lehen. JAGOBA MANTEROLA / FOKU Tamaina handiagoan ikusi

Andoni Imaz -

2021eko irailak 23 - Donostia

Pertsonaia ikonikoak antzeztu dituzten aktoreekin gertatzen da ikusleek filmetako pertsonak ikusten dituztela benetan, benetakoen ordez. Johnny Depp aktoreak (Owensboro, AEB, 1963) pertsonaia aski ezagun ugariren rola jokatu du zineman, eta berak ere sentitu izan du nahasmendu hori: «Pertsonaia bat izatearen ustea edukitzen duzu; arraroa da». Batzuen txalo eta besteen isiltasun artean jaso zuen Donostia saria atzo iluntzean, eta aurretik, Kursaalean prentsaren aurrean egindako agerraldian, haren inguruko polemikaren mamua airean zebilen, lehen hitza nork ebakiko.

Donostiako Zinemaldiak saria Deppi emango ziola esan orduko hasi ziren kritikak: Amber Heard emazte ohiak tratu txarrak leporatu izan dizkiola-eta, hainbat eragilek jaialdiari eskatu zioten ez ziezaiotela saririk eman. Zinemaldiak nabarmendu zuen aktorearen ibilbide artistikoari egin nahi diotela aitortza, eta errugabetasun presuntzioari eutsi zioten erabakia justifikatzeko.

Kursaaleko prentsa aretoa bete-beteta zegoela iritsi zen Depp hara, eta esan zituen lehen hitzekin argi geratu zen zer tonutan hitz egingo zuen gai horri buruz: «Beldurtu egin nauzue momentu batean; uste nuen bota egin nahi ninduzuela». Prentsaurrekoaren gidariak ere hasieratik ezarri zituen mugak: «Mesedez, egin Depp jaunari bere ibilbide profesionalari buruzko galderak, horregatik baitago hemen, bere karrerari omenaldi bat egiteko». Kazetari batek zuzenean galdetu zion hainbat eragilek saririk ez emateko egindako eskaeraz, eta gidariak berak adierazi zuen Deppek ez ziola horri erantzungo.

Muga horiei itzuri eginez, aktorearen inguruko zalapartak bere ibilbide artistikoari nola eragingo dion galdetu ziotenean, Deppek barrenak husteko baliatu zuen erantzuna: «Kantzelazioaren kultura kutsatutako airea bezalakoa da. Egia esan, uste dut orain seguru nagoela. Hala ere, egoera gure kontroletik aterata dago, eta inor ez dago seguru; zuetako inor ere ez. Baldin eta norbait prest badago esaldi bat esateko, hori nahikoa da. Jende askok sufritu du horregatik».

Deppek 1980ko hamarkadako film ezagun batean egin zuen debuta: Wes Cravenen A Nightmare on Elm Street filmean (1984). 1990eko hamarkadan, AEBetako film independenteetan aritu zen lanean, eta ezaguna da Jim Jarmuschen Dead Man (1995), baita Tim Burtonekin egindako lanak ere: Edward Scissorhands (1990) eta Ed Wood (1994). Burtonekin harreman oparoa izan du hasiera hartaz geroztik, eta maiz egin dute lan elkarrekin. Pertsonaia gogoangarriak dira Charlie and the Chocolate Factory-ko (2005) Willy Wonka eta Alice in Wonderland-eko Mad Hatter (2010).

Akaso Pirates of the Caribbean sagako Jack Sparrow kapitaina izango da Deppek antzeztutako pertsonaiarik bereziena ikusle askorentzat. Hearden salaketaren ondorioz, Disneyk Depp filmetatik kanpo uztea erabaki zuen. Atzo, esan zuen edozein unetan dela «Sparrowrekin bidaiatzeko gai». «Ez dut enpresarik behar Jack Sparrow izateko eta irribarreak ateratzeko».

Deppek fantasiazko zineman lan egin du batez ere. Prentsaurrekoan esan zuenez, umetatik gustatzen zaizkio beldurrezko film mutuak, eta, Burton ezagutu zuenean, «berehala konektatu» zuten. Fantasiazko rolak egitean, zera interesatzen zaio gehien: «Maskarak makillajearen atzean ezkutatzeko aukera ematen dizu. Ihes egin dezakezu zure zamatik. Ni erosoago sentitzen naiz protesien atzean, neure burua izaten baino. Arraroa da, ezta?».

Aktorea izatez gain, ekoizlea ere bada. Gogor kritikatu zuen atzo Hollywoodeko estudio sistema: «Ez da lehen zena, ezta inola ere». Aktoreak eta ikusleak gutxiesten dituzte, haren ustean: «Erabili eta botatzekoak garela uste dute. Gainera, ikuslea ez dute aintzat hartzen, modu irrigarrian tratatzen dituzte. Uste dut Hollywooden arrakalak begien bistan daudela, eta ni pozik nago arrakala horiek lehenago ikusi izanaz».

Zinemaldiari eskerrak

Deppek atzo iluntzean jaso zuen saria, Kursaalean egindako gala batean. Saria jasotzean norengan pentsatuko zuen galdetu ziotenean, Donostiako Zinemaldiari eman zizkion eskerrak: «Batez ere gogoan izango dut Zinemaldiak nola babestu nauen; Jose Luisek [Rebordinos, zuzendaria], Donostiako alkateak... Usteko banu ni hemen egoteak inor mindu lezakeenik, kezkatuta egongo nintzateke. Baina argi nuen etorriko nintzela, atsegin nuela leku hau. Errespetu handia diot zinemaldi honi, ez dagoelako itxurakeriatan oinarrituta, filmetan eta zinemagileetan baizik».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Vincent Bestaven, Jurgi Ekiza, Xan Bidegain eta Felix Buff, Willis Drummondeko kideak. ©GUILLAUME FAUVEAU

«Ez dago itxaropena beste biderik»

Julen Korkostegi Elortza

Willis Drummond musika taldeak «garai askotako soinuaren konbinazio bat» bildu du 'Hala ere' disko berrian. Kontraesanen ideiak inguratzen du lana, izenburutik hasi eta azalean ageri den mandarinaraino.
<b>Txomin Urriza, Camille Dizabo, Annelise Arnaud-Cazamayou eta Alan Billi, Orbel taldeko kideak.</b> ©FANNY MAILLARD

Orbel, isiltasunari plaza eskainita

Ainize Madariaga

'Lur hezea' diskoa jalgi berri du taldeak. Hirugarren obra honetan, giro «mistiko» eta «berezia» landu dute taldekideek

Rafael Moneok bere ibilbidean ondutako arkitektura proiektuen marrazkiz eta planoz josia da Nafarroako Artxiboko erakusketa aretoa. ©JAGOBA MANTEROLA / FOKU

Rafael Moneo, garabirik gabe eraikitzea

Uxue Rey Gorraiz

‘Rafael Moneo Nafarroan’ erakusketa zabaldu dute Nafarroako Artxiboan. Arkitektoaren ibilbidearen atzera begirakoa egiten du bildumak, eta haren bizitza pertsonalari ere egiten dio so

Kepa Altonaga, atzo, <em>Axularren gerizapean</em> liburuaren aurkezpenean. ©JON URBE / FOKU

Itzalekoak, argitara

Jone Bastida Alzuru

Axular Egunaren «misterioa» argitu nahi izan du Altonagak bere azken liburuan: 'Axularren gerizapean'. Itzalean geratutako idazleei buruzko datuak bildu ditu

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...