Albistea entzun

«Iraultzaile» goiz batez

Donostiako Basque Culinary Centerrek udako goizetan, astean hiru egunez, sukaldaritza zaleentzat ikastaroak eskaintzen ditu. Ondo pasaz, puntako sukaldaritzan trebatzen dira
Talde lanean eta giro onean ikasi dute plater abangoardistak kozinatzen, Laura Tamayo eta Elena Olaran sukaldariek gidatuta.
Talde lanean eta giro onean ikasi dute plater abangoardistak kozinatzen, Laura Tamayo eta Elena Olaran sukaldariek gidatuta. JON URBE / FOKU Tamaina handiagoan ikusi

Mikel Elkoroberezibar Beloki -

2018ko abuztuak 9 - Donostia

«Honek zer egiten duen? Edozein saltsa edo likido apar bihurtzen du, gasaren bitartez». Harrituta begiratu dio ikasleak Laura Tamayo sukaldariari, 2.0 tortilla kozinatzeko erabiliko duten sifoiari begira. Bere lagunari begiratu dio, eta aldi berean esan dute: «It's amazing!». Bi emakume estatubatuarrak Coloradon bizi dira, eta Euskal Herria ezagutzeko aprobetxatu dituzte oporrak. Donostiako Parte Zaharreko tabernetan pintxoak jatea motz geratu, eta Re-evolution: Izarren Abangoardia ikastaroan parte hartu dute, beste bost lagunekin batera, Donostiako Basque Culinary Centerren (BCC).

BCCn, formakuntza eta ikerketaz gain, sukaldaritzazaleak direnentzako zenbait ikastaro eskaintzen dituzte, ikasturtean zehar eta udan. Udako astelehen goizetan Arzak, Berasategi eta Atxaren platerak kozinatzen dituzte izena ematen dutenek; astearte goizetan, «pintxogintzan» aritzen dira; eta asteazken goizetan, «iraultza» egiten dute. 120 euro balio du ikastaro bakoitzak, eta gazteleraz eta ingelesez irakasten dira.

Basque Culinary Centerreko sukalde dotore eta argitsu batean sartu berri diren zazpi zaleek eta bi sukaldariek iraultzaile itxura handirik ez badute ere, sukaldaritza iraultzeko gogotsu eta grin handiarekin ekingo diote asteazken goizari. Re-evolution: Izarren Abangoardia ikastaroan lau plater kozinatzen ikasiko dute, Laura Tamayo eta Elena Olaran sukaldarien eskutik: oliba esferifikazioak, txipiroizko kroketa likidoak, 2.0 tortilla, eta almendra sifoizko bizkotxoa txokolatezko izozkiarekin. Lau plater berezion izenak entzutean, ia zorabiatu egin dira, baina benetan ikasteko eta ondo pasatzeko gogoarekin etorri direnez, jo eta su hasi dira txipiroizko kroketa likidoa prestatzen.

Txipiroi tinta eta nata nahasi, eta irinarekin batu dute kroketentzako bexamel berezia egiteko. Bitartean, txipiroiak txikitzen ari da beste ikasle bat: «euskal-venezuelarra» da, eta kozinatzen iaioa. «Gaztetan, Ingalaterrako sukaldaritza eskola batean ikasi nuen, baina ezkondutakoan etxean geratu nintzen, nire lau semeak hezten. Orain, helduak dira, eta berriro ekin diot sukaldaritzari. Hau nire momentua da», dio, irribarre batez. Euskal Herrian bizi da orain denboraldi batez, eta ikastaroak egiteko aprobetxatu du. «Oso erabilgarriak zaizkit gustuko dudanean trebatzeko eta ondo pasatzeko, sukaldean», kontatu dio gelatina orriak ur hotzetan jartzen ari den lagun hondarribiarrari.

Kroketa berezion masa izozkailu moderno batean sartu eta gelifikazio delakoari ekin ostean, berrikuntzarako bidaia: 2.0 tortillaren txanda. Kokteleko kopatxo batean tipula karamelizatua, patata aparra, arrautzaren gorringoa, antxoa bat eta perrexil apur bat: hori da etorkizuneko patata tortilla. Tipulak karamelizatzeari ekin dio Donostian oporretan dagoen txiletarrak: «Azukrea pasatuko didazu, mesedez?». Ondokoak, ezetz: «Tipula bera gozoa da, ez du azukrerik behar karamelizatzeko!».

Oporretan etorri da Txiletik, eta, sukaldean aritzea gustuko duenez, plater «iraultzaileak» prestatzen ikasteko aukera aprobetxatu nahi izan du. Baina iraultzaileak, zergatik? Ikastaroan erabilitako teknikek sukaldaritza modernoa irauli zuten duela hamarkada batzuk, sukaldea laborategi bihurtuz ia: gaurkoan, gelifikazioak, esferifikazioak eta aparra egin dituzte. Bai, aparra. Patatak txikitu ostean, natarekin nahasi eta likido homogeneo lodi bat osatu da, eta sifoian sartu dute. Sifoia aparatu metaliko bat da, barruan sartzen den likidoa apar bihurtzen duena gas konprimatuarekin.

Arrautzaren zuringoa eta pralinea eltzean nahasten hasi da donostiarra, norabide bakar batean, etxean ikusi bezala. «Zuk ere mitoa sinetsi duzu. Edozein norabidetan nahas daitezke nahasketa likidoak, ez da lapatsik sortuko!». Nahasketa sifoiarekin apar bihurtu ostean, emaitza mikrouhinean sartu, eta esponja itxurako bizkotxo goxo batzuk prest! Txokolate izozkiarekin jan dituzte.

Ferran Adriaren abangoardiarik ezagunenetariko bat aplikatu dute, amaitzeko: esferifikazioa. Oliba txikituak glukoarekin eta xantanoarekin nahasirik, ur alginatodunetan borobiltxoetan sartu dituzte, esferak osa zitezen. Ur puruan garbitu eta oliotan zenbait belarrekin eduki ostean, gustura jan dituzte mokadutxoak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JON URBE / @FOKU

«Askotan, baimena eskatzea baino hobe da barkamena eskatzea»

Naroa Torralba Rodriguez

Munduko muralik onenetan hirugarrena Ondarroan dago, Kamiñazpin. Lian Monserrate da egilea, eta gaztetatik ari da gizarte gaiak hormetara eramaten. Memoria ariketa bat egin nahi izan du obra horrekin.
1 ©LABAYRU FUNDAZIOA / EZEZAGUNA

Itsasoko ezkutuko lana

Amaia Jimenez Larrea

Emakumeek itsasoan egindako lanaren balioa aldarrikatzeko, Labayru fundazioak 'Geu be bagara itsasoa' liburua argitaratu du. Zenbait belaunalditako hogei emakumeren testigantzak bildu dituzte.
<em>Irabazi arte</em> telesaileko bigarren denboraldiko aktore gazteak. ©EITB

'Irabazi arte'-ren bigarren denboraldia, ostiraletan ETBn

Urtzi Urkizu

Dorleta Urretabizkaia, Nahia Lacalle eta Joan Bailador dira aktore berriak. Zetak, Bengo eta Bulego taldeen kantak entzungo dira

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.