Ostiralean, Itsas Market merkatua jarriko dute martxan, Bermeoko portuko Olatu kaian. 18:00etan irekiko dute, eta, iluntzera bitarte, askotariko produktuak eta jarduerak uztartuko dituzte: tokiko produktuak, artea, uretako kirolak, birziklatze tailerra... 19:00etan, aurpegia margotzeko tailerra izango da umeentzat; margo ekologikoekin egingo dute. Horretaz gain, eskulangileen eta diseinatzaileen azoka ere prestatu dute, baita jan-edanetarako lekua ere. 21:00etan, Tximino taldeak kontzertua emango du.
Larunbatean, 11:00etan irekiko dute Itsas Market, eta, ordu berean, belaontzien estropada egingo dute. Haurrek ere izango dute aukera txalupen artean ibiltzeko; izan ere, Txalupak egiten kortxoa birziklatzeko tailerra prestatu dute haientzat, 12:00etarako. Arratsaldean, beste tailer bat izango da: Piratak sukaldean. Izenak adierazten duen moduan, umeak pintxo sortzaile bilakatuko dira, Serrats kontserba enpresaren eskutik.
Larunbatean beteko dira 105 urte galernatik, eta, horren harira, omenaldi bat prestatu dute gauerako. 21:00etan, itsasontzien prozesio isila egingo dute, Xixilirantz. Aldi berean, lehorrean, herritarrak Baztarretik Portuzaharrera joango dira, Kankinkabara txistulariekin. Han, kandelak banatuko dituzte, eta, 21:30ean, lore eskaintza egingo dute, Izaro abesbatzarekin batera.
Gainera, larunbatean doan bisitatu ahal izango dira Aita Guria baleontzia eta Bermeoko Arrantzaleen Museoa, «Bermeok itsasoarekin duen lotura eta historia zabaltzeko».
Abuztuaren 13an, igandean, Itsas Market merkatuak zabalik jarraituko du, eta beste bi tailer egingo dituzte: 12:00etan, aurpegia margotzekoa; eta, 18:00etan, kutxatilak, diru zorroak eta bestelakoak egitekoa.
Galernaren 105. urteurrena
Ostiraletik igandera, egun osoan, Bermeon (Bizkaia).
