San Vicenteren hitzetan, aurtengoa «gogoangarria» izatea espero dute, inoiz izan den Euskal Encounter «jendetsu eta arrakastatsuena». Hori dela eta, pabiloi bat gehiago izango du jaiak. 5.024 leku eskaini dituzte Euskal Party gunean parte hartzeko, eta beteta daude aspalditik —lehenengo 4.000 lekuak 5,8 segundotan amaitu ziren—.
Parte hartzaileen batez besteko adina 28 urte izango da, eta gehiengo nabaria gizonezkoa (%87). Horretaz gain, Interneteko konexio abiadura segundoko 40 gigabit simetrikokoa izango da. Horrek «munduko topaketa azkarrenetarikoa» bihurtuko du BECekoa.
Inoiz baino mamitsuago
Euskal Party gunearen barruan egongo dira, besteak beste, jokoen gunea, software librearen gunea eta hardwarearen gunea. Kanpin gune bat ere egongo da. Bestalde, Euskal Party-a ez ezik, Opengunea ere arrakastatsua izatea espero dute. Gune hori publiko guztiari egongo da irekita. Han, hamaika hitzaldi eta tailer eskainiko dituzte, eta topaketako kideentzat zein publiko orokorrarentzat izango da. Bideo jokoekin, robotikarekin eta errealitate areagotuarekin lotutako ekintzak egongo dira, adibidez. San Vicenteren arabera, «inoiz egin den ekitaldirik mamitsuena izango da aurtengoa».