Ibarrolaren 'Gernika', Bilbora

Pablo Picassoren obraren omenez, Agustin Ibarrolak (Bilbo, 1930) 1977an margotu zuen Gernika, hamar mihisek osatu eta alturan bi metro eta zabaleran hamar hartzen dituen obra erraldoia. Urte hartan, hainbat artista eta eragilek eskatu zuten Picassoren obra enblematikoa Gernikara (Bizkaia) ekartzeko, eta eskaera hari bultzada bat emateko egin zuen obra Ibarrolak. 1977an bertan Bilboko Arte Ederren Museoan erakutsi zuen artelana Ibarrolak, eta bi urte geroago berriro jarri zuten ikusgai museo berean, artistaren beraren beste lan batzuekin batera. Ordudanik, ordea, Ibarrolaren Gernika artistak lantegi gisa erabili izan duen Gametxoko (Ibarrangelu, Bizkaia) baserri bateko biltegian izan da, harik eta Jose de la Mano galeristak katalogo batean aurkitu, eta artistaren familiarekin harremanetan jarri ostean, Arco azokan erakusgai jarri duten arte. Han erosi du obra Bilboko Arte Ederren Museoak 300.000 euroan. Horma irudia museoa sustengatzen duten hiru erakundeen —Eusko Jaurlaritza, Bizkaiko Foru Aldundia eta Bilboko Udala— ekarpen berezi bati esker erosi ahal izan dute.

Museoak adierazi du Gernika «euskal artearen obra enblematikoa» dela, eta gogorarazi 1979an erakutsi izana museoaren hurbileko historiako une garrantzitsuenetako bat izan zela. Galeristak eta museoak jakinarazi dutenez, obra kontserbazio egoera bikainean dago. «Picassoren obraren motibo figuratiborik ikonikoetako batzuk ditu irudikatuta, Ibarrolaren sormenezko unibertsoaren berezko elementu batzuekin batera; esate baterako, diktadurako jazarpen giroaren salaketa eta askatasunaren aldarrikapena sinbolizatzen duten burdin sare geometrikoak», adierazi du museoak, ohar baten bidez.

Ibarrolaren familiaren helburua zen obra erakunde publiko baten esku gelditzea, edo, hori ezinezkoa balitz, publikoarentzat ikusgai jarriko lukeen museo bat izango lukeen erakunde pribatu baten esku. Gernika erostearekin batera, Bilboko Arte Ederren Museoak Ibarrolaren beste bi obra jaso ditu dohaintzan, 1973 eta 1979an margotutakoak. Margolariak 1979an museoaren areto grisean egin zuen erakusketarako sortutako muntaketa bereziaren parte dira bi koadroak. Erakusketa hark Gernika bera eta urte haietako beste obra batzuk zituen abiapuntu.