Eleiz enparantza izango da gaztagileen topagune, eta han jarritako postuetan ikusgai izango dira gaztak. 10:00 aldean hasiko da ekitaldia. Ordu erdian, ekoizleek euren gaztak aurkezteko tartea izango dute. Antolatzaileek azaldu dutenez, Ā«Idiazabalgo jatorri izenari atxikitako gaztandegiek har dezakete parte bakarrik, dagokien kaseina plakarekin identifikatutako piezekinĀ». Eta, 11:00etan, aurkeztutako gazta guztiak dastatzen hasi ahalko dira epaileak. Hiru epailez osaturiko hiru mahaitan banatuko dute lana, eta hortik aterako dira finalistak.
Dastatzea 12:30 inguruan amaituko da, eta, ordu erdi batez, ahoratutakoaren inguruan pentsatzeko eta gazta bakoitzari nota jartzeko tartea izango dute epaileek. Ondoren, irabazlearen izena iragarriko dute, eta, irabazleek ospatzeko denbora hartu eta gero, sariak banatuko dituzte. Lehen hiru sailkatuek trofeo bana eramango dute etxera, eta, horrekin batera, 300 euro jasoko ditu lehenengoak, 150 bigarrenak eta 50 hirugarrenak.
Ez dira epaileak izango gazta dastatzeko pribilegioa izango duten bakarrak. Izan ere, 11:00etan,hamasei postu zabalduko dituzte, lehiaketarako jarritakoez aparte, eta bisitariek gazta erosi eta probatu ahalko dute. Gaztari laguntzeko, txakolina zerbitzatuko dute plazan.