Arratsaldean izango da berdelaren bueltako ekitaldi nagusia; berdel pintxoen dasta egingo dute 18:00etan, herriko portuan. Jatetxeek pintxo hauek egingo dituzte: berdela ziza saltsarekin, pikilloekin, berdura saltsarekin eta berdelaren pizza. Elkarteek, berriz, berdelarekin egindako txaka, budina, marmitakoa eta piperrada prestatuko dituzte. Berdel errea ere jan ahal izango dute tokian bildutakoek.
1.500-2.000 berdel kilo erabiliko dituzte guztira. 20.000 mokadu inguru prestatuko dituzte horrekin. Ospe txarra zuen arrainari izen ona emateko eta harenezaugarriak ezagutarazteko asmoz hasi ziren gaurko eguna antolatzen. San Pedro kofradiak eta Mutrikuko Udalak antolatu zuten lehenengo Berdel Eguna. 23. edizioa da aurtengoa.
Eskulangileen eta sortzaileen azokak irekiko du egitaraua. Txurruka plazan egingo da, 10:30etik eguerdira arte, Eixu artisau elkarteak antolatuta. Belaontzien hamahirugarren txapelketa jokatuko dute 12:00etan, Kalatxori Elkartearen eskutik. Berdel-pintxo poteoa egiteko aukera ere izango da herriko tabernetan, ordu berean. Trikitilarien kalejirak girotuko du. 13:00etan, herriko abesbatzaren kontzertua egongo da, Zubiel plazan.
Ikastolaren aipamena
Portuko saioak jarraipena izango du iluntzean; 20:00etan Guda dantza taldeak kontzertua joko baitu han. Berdel txapelketako zesta-punta partida ere jokatuko dute ordu berean, Danok Bat Elkarteak antolatuta.
Herritarren parte hartzea du oinarri Berdel Egunak; «Herriaren jaia da», Marta Amonarriz Mutrikuko turismo teknikariak azaldu duenez. Herriko hainbatelkarte eta norbanako aritzen dira lanean. «Mutrikuko jairik ezagunenetakoa bihurtu da; inguruetako urteko lehenengo jaia da», esan du Amonarrizek.
Berdel aipamena ematen diote urtero antolatzaileek herriko elkarte edo norbanakoren bati. Goizeko Izarra ikastolak jaso du aurten, bere 50. urteurrenean. Hezkuntzaren, euskararen eta kulturaren bueltan egindako ekarpena aitortu diote. Aurten, gainera, herritarren parte hartzea izan du oinarri aipamenak. Mutrikuarrek proposatu dituzte berdel aipamenerako hautagaiak, eta haiexek aukeratu dutebozketa bidez Goizeko Izarra ikastola.