Italiako Giroa

Bere zigilua ezarri du

O'Connor ihesaldiko indartsuena izan da Maddona di Campiglio mendatean. Almeida liderrak ez du ahulezia zantzurik erakutsi
Ben O'Connor, atzo Maddona di Campiglio mendatean helmugaratzen garaipena ospatzen.
Ben O'Connor, atzo Maddona di Campiglio mendatean helmugaratzen garaipena ospatzen. LUCA ZENNARO / EFE Tamaina handiagoan ikusi

Mikel O. Iribar -

2020ko urriak 22

Madonna di Campigliok bere garaipen zerrendan bi irabazleren izenak besterik ez zituen orain arte. 1999an, Marco Pantanik altxa zituen lehendabizikoz bi eskuak; eta 2015ean, berriz, Mikel Landa izan zen indartsuena. Bada, hirugarren txirrindularia batu da zerrenda horretara. Ben O'Connorrek (NTT) bere zigilua ezarri dio Madonna di Campiglio mendateari, hura izan baitzen ihesaldiko indartsuenetan indartsuena, atzoko Italiako Giroko 17. etapan.

Herenegun, australiarrak garaipena harramazkatu egin zuen; biharamunean, ordea, behetik erasoa jo, eta bikain errematatu zuen. Atzetik, Hermann Pernsteinerrek (Bahrain) erraiak bota zituen lasterketa burura iristeko, baina hutsala izan zen.

Oilarren artean, berriz, Sunwebek, Wilco Keldermanen mesedetan, erritmo bizia jarri zuen azken igoeran, harik eta herbeheretarrak atzoko zalaparta apurrena sortu zuen arte. Joao Almeida (Deceuninck) liderra, berriz, txapeldunak egin behar duen eran defendatu zen. Bistan geratu zen Keldermanek lana erruz egin beharko duela portugaldarrari maglia arrosa kentzeko. Faboritoak multzo berean helmugaratu ziren, eta sailkapen nagusiko lehen hamarretan ez zen aldaketarik egon.

Bassano del Grappan hasi zen Giroko 17. etapa, eta txirrindulariek 203 kilometro egin behar izan zituzten. Madonna di Campigliora iritsi aurretik, ibilbidean lehen mailako Forcella Valbona eta Bondone eta hirugarren mailako Durone mendateak kateatu zituzten. Tropelak kalitate handiko hemeretzi txirrindulariri eman zien ihes egiteko baimena. Multzo horretan ziren, O'Connorrekin batera, besteak beste, Pernsteiner, Oscar Rodriguez (Astana), Victor De la Parte (CCC), Thomas De Gendt (Lotto Soudal), Ilnur Zakarin (CCC), Rohan Dennis (Ineos), Diego Ulissi (UAE) eta Ruben Guerreiro (Education First). Guerreirok, bi mendate nagusietan lehena izan zenez, mendiko sailkapenean Giovanni Viscontiri (Vini Zabu) lehen postua kendu zion, eta, horrenbestez, elastiko urdina bereganatu du.

Kilometroak egin ahala, ihesaldikoek tropelarekin zuten aldea handituz zihoan, eta, oker handirik ezean, garaipena bertan zegoen. Lasterketa buruko txirrindulariak Durone mendatean gora zihoazela, taldetxoa bitan banatu zen, eta indartsuenek egin zuten aurrera; horien artean ziren O'Connor, Zakarin eta enparauak. De la Parte eta Rodriguez, berriz, zertxobait atzeratu ziren, baina jaitsierako tartean eta Madonna di Campiglio igo aurretik zuten sasiordekan aurreko multzora batzea lortu zuten. Igoera hasi orduko, lasterkariek elkarlanerako asmo handirik ez zuten erakutsi, bai baitzekiten garaipena euren artean erabakiko zela. Hala, inondik ere ez zuten indar xahuketa handirik egin nahi erreleboetan.

Taldetxoari tiraka aritu zen txirrindulari bakanetako bat De la Parte izan zen, haren taldekide Zakarinen mesedetan. De Gendtek, bestalde, ez zuen zuhurkeriaz jokatu, beste behin ere; bai eskuzabalegi, ordea. Izan ere, flandriarrak indarrak ez zituen ongi neurtu, eta azken kilometroetan garesti ordaindu zuen. Bitartean, O'Connorrek azti jokatu zuen. Aurkarien egoera aztertu, eta erasora jo zuen etapa amaitzeko zortzi kilometro falta zirenean. Herenegungo arantza kendu nahi zuen, kosta ahala kosta, baita lortu ere. Pedal kolpe onarekin zihoan maldan gora; hori izan zen australiarraren giltzarrietako bat. Ez zitzaion ezinaren sufrimendua ikusi, gaitasunarena baizik. Haren gurpila hartzeko benetako ausardia erakutsi zuena Pernsteiner izan zen. Dena den, azken hiru kilometroak eramangarriagoak zituztenez, O'Connorri garaipenak ez zion ihes egin. Maglia arrosaren multzoan, berriz, urduritasunaren zantzurik ez zuen erakutsi Almeida liderrak. Zuhaitza astintzeko ardura Sunwebek hartu zuen, Keldermanek, handik edo hemendik, Almeidarekiko zuen atzerapena laburtzeko xedez. Haren taldekide Jai Hindley mugitu zen lehendabizi, eta herbeheretarra ondoren. Liderrak, baina, taldekiderik gabe maglia arrosa zaintzeko gai zela soberan erakutsi zuen. Faboritoen artean ez zen indar erakustaldirik egon, nekearen seinale.

Gaur, Stelvio

Etapa menditsua izango da gaurkoa. Ez nolanahikoa, gainera. 207 kilometro egin beharko dituzte txirrindulariek, eta Cancanoko Lakuan izango du etapak helmuga. Aurretik, ordea, aurtengo Giroko mendirik garaiena igo beharko dute: Stelvio —2.757 metro. Zirt edo zart egiteko tenorea iritsi zaie oilarrei.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Erik Jaka, txapeldun

Erik Jaka, txapeldun

Jon Eskudero

Hasieratik aurrea hartu ondoren, aldea ongi kudeatu eta bizitzan estreinakoz buruz buruko txapeldun izan da Erik Jaka. Bukaeran sufritu arren, 22 eta 20 irabazi dio Jokin Altunari. 

Jaka eta Altuna, pilota aukeraketan. ©Gorka Rubio / Foku

Txapela, sentimenen gainetik

Julen Etxeberria

Jokin Altunak eta Erik Jakak buruz buruko finala jokatuko dute gaur, Bilbon. Lagun minak dira, baina kantxan alde batean utziko dute euren adiskidantza, saririk handiena baitute jokoan
Ante Budimir Osasunako aurrelaria. ©Jesus Diges / EFE

Dorreen jiran eraikia

Eñaut Agirrebengoa

Osasunak aurrelari garaien alde egin du apustu, eta, horren ondorioz, bestela jokatzeari ekin dio. Esentzia berbera da, baina joko zuzenak garrantzi handiagoa du orain, 4-4-2 sistemaren barruan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna