Haien arrastoa, baina, desagertu egin zen urteen joanean, eta baita futbol ikusgarri hura ere. Duela gutxi berreskuratu duen arte, Ricardo Gareca entrenatzaile argentinarrak selekzioaren ardura hartzearekin batera. Hiru urte dira Perun lanean dela, eta 1982tik lortu gabea zena eman dio herrialdeari: selekzioa Munduko Kopan aritzea. Zeelanda Berria gainditu zuen azken kanporaketan, eta horrela lortu zuen aukera Errusian izateko.
Jokalari gazteekin eta beterano onekin osatu du taldea Garecak, eta, guztien gainetik, Paolo Guerrero dago. Lortu du, azkenean, txapelketan izatea, positibo eman bazuen ere dopin kontrol batean iazko urrian, Argentinak eta Peruk sailkatze fasean jokaturiko partidaren ondoren. Perurekin ez du inork hark hainbeste golik sartu.