Albistea entzun

Hezkuntza-akordioari buruzko gutun irekia Eusko Legebiltzarrari

Maggy Barrere Unzueta, Alex Gurrutxaga Muxika, Beñat Sarasola Santamaria - Hurrenez hurren: Zuzenbidearen Filosofiako katedraduna eta EHUko Zuzenbide Fakultateko Justizia Sozialaren aldeko Klinika Juridikoko zuzendaria; Hizkuntzaren eta Literaturaren Didaktika Saila, EHUko Hezkuntza eta Kirol Fakultatea; Hizkuntzaren eta Literaturaren Didaktika Saila, EHUko, Hezkuntza, Filosofia eta Antropologia Fakultatea

2022ko ekainak 1

Gutun hau sinatzen dugunok kezka handiz jaso dugu Hezkuntza lege berrirako Euskal Autonomia Erkidegoko hainbat legebiltzar-taldek sinatutako akordioa.

Akordioaren ustezko helburua «gaur egungo eta etorkizuneko hezkuntzaren erronkei» erantzungo dien lege berria idaztea da. Baina, itunaren testua irakurrita, egungo hezkuntza sistema duala sendotzen duela ikusi dugu. Izan ere, Euskal Autonomia Erkidegoa ikastetxe itunduen portzentaje handiena duen Europako eskualdeetako bat da, ikastetxeen erdiak kudeaketa pribatukoak baitira, baina publikoki finantzatuak. Sistema dual horrek, ebidentziak erabat frogatu duen bezala, gero eta bereiziagoa den eskola-sistema bat sortu du Euskal Autonomia Erkidegoan. Eskola publikoak ia esklusiboki hartzen du babes gutxien duten ikasleak (klase-arrazoi, jatorri, nazionalitate, etnia eta abarrengatik) eskolatzeko ardura. Itunduek, aldiz, babesleku gisa funtzionatzen dute klase ertain-altuko bertako familientzat. Beraz, nahiz eta akordioaren ustezko asmoetako bat eskola segregazioaren aurka borrokatzea den, itunpeko eskolen egoera indartzen den bitartean porrota baino ez du ekarriko.

Ildo beretik, Abidjango printzipioek diotena oroitu behar da. Printzipio horiek hezkuntza eskubidearekin lotutako giza eskubideen nazioarteko zuzenbidearen araudia xehatu eta jaso egiten dute. Honekin batera, hori aurrera eramateko orientabideak ematen dituzte, sektore pribatuak hezkuntzan duen parte hartzea gero eta handiagoa den errealitate honetan. Jakina denez, Abidjango printzipioak giza eskubideetan eta hezkuntzarako eskubidean adituak diren nazioarteko 57 jakitunek jaso eta idatzi zituzten, eta gaur egun ezinbesteko erreferentzia dira hezkuntzarako eskubideaz arduratzen diren erakundeentzat, hala nola, NBEko Giza Eskubideen Kontseiluarentzat, NBEko Giza Eskubideetarako Goi Komisarioaren Bulegoarentzat eta Giza Eskubideen Amerikarteko Batzordearentzat edota Gizarte Eskubideen Europako Batzordearentzat. Abidjango printzipioek adierazten dutenez «hezkuntza-erakunde pribatuekiko finantzaketa publiko oro iraupen jakineko neurritzat hartu behar da». Beste era batera esanda, finantzatze hori aldi baterako neurri berezitzat ulertu behar da, betiere aukera publikorik egon ezean (65. printzipioa). Hori ez da, noski, Euskal Autonomia Erkidegoko egungo errealitatea.

Beste esperientzien alderatzeak agerian jarri du hezkuntza akordio berriak eta ondoren etorriko den hezkuntza lege berriak egungo eredu duala areagotuko duela, bereizitako eskola sistema bultzatuz eta ondorioz, gizarte segregatu bat eraikiz. Gizarte eredu edo errealitate honetan, hiritarrek (bereziki dirudunek / klase sozial altuko hiritarrek) gero eta konfiantza gutxiago dute desberdintzat hartzen direnengan, eta gero eta gehiago isolatzen dira beraien pribilegiozko burbuiletan. Euskal Autonomia Erkidegoan ez dugu hori nahi eta horregatik dei egiten diegu Eusko Legebiltzarreko kideei, lege berriaren ardatz nagusiak eskola publikoaren indartzea eta eskola-segregazioaren aurkako borroka izan daitezen.

OHARRA: Eskutitz hau Eusko Legebiltzarreko kide guztiei bidali zaie, eta EHUko hiru hezkuntza fakultateetako hainbat irakaslek, Espainiako hezkuntza fakultate desberdinetako beste hainbatek eta hezkuntzaren arloan nazioarteko erreferentzia diren hainbat erakundek sinatu dute, hala nola Hezkuntza Eskubidea eta Eskubide Ekonomiko, Sozial eta Kulturalen aldeko Ekimen Globala. Sinatzaileen zerrenda osoa hemen kontsulta daiteke: http://www. plataformaeskolapublikoa.eus.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Arrosarioa
 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...