«Dena aldatzera etorri gara»

Bizitza erdigunean duen eredua aldarrikatuko du mugimendu feministak martxoaren 8ko greban. Kapitalismoa, patriarkatua, heteroaraua, kolonialismoa eta kapazitismoa gaitzetsiko dituzte
Euskal Herriko Mugimendu Feministako kideen agerraldia, atzo, Bilboko Areatzako pasealekuan.
Euskal Herriko Mugimendu Feministako kideen agerraldia, atzo, Bilboko Areatzako pasealekuan. MARISOL RAMIREZ / FOKU

Ibai Maruri Bilbao -

2019ko otsailak 27
«Kaleak berriro ere era masibo, aldarrikatzaile eta alaian hartuko ditugu. Zutik dauden Euskal Herriko emakumeak ikusiko ditugu, beste eredu politiko, ekonomiko eta sozial baten alde oihu eginez». Martxoaren 8an greba egitera deitu dituzte Euskal Herriko «emakumeak, bollerak eta transak». Bigarren urtez jarraian andreen grebara deitzeko arrazoiak zeintzuk izan diren azaltzeko agerraldia egin zuen atzo Euskal Herriko Mugimendu Feministak, Bilboko Areatzako pasealekuan. «Dena aldatzera etorri gara», ohartarazi zuten Karmele Ozaitak eta Iraide Lejarretak, mugimenduaren izenean.

Bost ardatz izango ditu grebak: zaintza, enplegu eta kontsumo greba izango da; baita pentsiodunena eta ikasleena ere. Bizitza erdigunean jarriko duen gizarte eredu berria aldarrikatuko dute. Helburu hori lortzeko, 28 eskaera zehatz jaso dituen agiria adostu dute. Besteak beste, emakumeek sufritzen duten prekaritatea desagerrarazteko eskatu dute. Indarkeria matxistarik eta heteroaraurik gabeko bizitza defendatu dute. Baita arrazakeriarik eta gerrarik gabekoa ere. Horregatik, greba egunean planto egitera dei egin dute: kapitalismoari, patriarkatuari, heteroarauari, kolonialismoari eta kapazitismoari. Lanaren esplotazioa, kapazitismoa, arrazakeria eta sexu-generoaren arteko bereizketa gainditzeko agenda garatu nahi dute.

Martxoaren 8an Euskal Herriko bost hiri nagusietan egingo diren protesten berri ere eman zuten atzoko agerraldian. Bakoitzean bi mobilizazio egingo dira: 12:00etan elkarretaratzea, eta 19:00etan manifestazioa. Bilbon kasu bietan manifestazioa izango da, eta biak Jesusen Bihotzetik abiatuko dira; Bulebarrean eta Antiguako tuneletatik izango dira Donostian; Gazteluko plazan eta Golem zinemetatik, Iruñean; Plaza Berrian eta Iparralde zentro zibikotik, Gasteizen; eta Merkatu plazan eta Errepublika plazatik, Baionan. Herri, auzo eta eskualdeetan egingo diren ekintzetan parte hartzeko ere eskatu dute.

Greba antolatzen ibili diren andreen artean «aniztasuna» dagoela esan du Ozaitak. Baina elkarrekin «lurzoru komun batean sustraituriko borroka» egituratu dute. Oinarri ideologiko eta helburu politiko konpartituak dituen lurzorua dela zehaztu du: «Feminismo antikapitalista, antikolonialista, eta heteroarauaren kontrakoa». Euskal Herriko 50 herri baino gehiagotan osatu dira batzarrak. «Errealitate lokalei egokien erantzuten dion markoa osatzeko, deszentralizazioa lehenetsi da». Sortu den sare horrek martxoaren 9tik aurrera «ehuntzen jarraituko den eraldaketaren oinarria» jarri duela uste dute.

Aliantzak ere osatu dituzte greba antolatzerakoan. Oso garrantzitsuak izan direla esan du Ozaitak, «estrategikoak». Besteak beste, honako mugimendu hauekin izandako elkarlana goraipatu du: pentsiodunak, etxeko langileak, emakume baserritarrak, emakume migratzaileak, kolektibo antirrazistak, errefuxiatuen aldeko Herrien Besarkada mugimendua, ikasleen eta gazteen kolektiboak, aniztasun funtzionala duten emakumeen kolektiboa, emakumezko euskal presoak eta gehiengo sindikala. «Denak izan gara beharrezkoak greba feministak aurrera egin dezan».

Iazko martxoaren 8an egindako grebak «historia egin» zuela gogoratu dute. «Hala ere, indarra dugun arren, oraindik erailtzen gaituzte, esplotatu eta kriminalizatu». Horregatik, instituzio publikoen inplikazioa eskatu du, egungo egoeran «ardura berezia» dutelakoan. Eta bultzatu gura duten aldaketan parte izatea nahi dute. «Politika feminista ausartak nahi ditugu, behar besteko aurrekontu publiko errealekin».

Gizarte itun berria

Mugimendu feministako kideen esanetan, kolektiboa izan behar da bizitza sostengatzeko ardura. «Gure jendartean, bizitza batzuek beste batzuek baino balio handiagoa dute», gaitzetsi du Lejarretak. Zaintza berrantolatzeko eskatu du: «Politika publikoen zeharkako ardatza izan dadila; pertsonen zaintza ez dadila zapaldutakoon eskubideen bizkar egon. Emakumeok planto egiten badugu, dena gelditzen da».

Herritartasun eredu «inklusibo» bati ateak irekiko dizkion itun sozial bat eskatu du mugimenduak. «Gure lurraldeetan eta gorputzetan burujabe izateko. Lana eta aberastasuna modu justuan birbanatzeko. Bazterreko subjektuok, gure aurkako indarkeriarik gabe, aske izan ahal izateko».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna