Iñigo Cabacasen auzia. Epaiketa

Cabacasi «horizontalean» tiro egin zioten, auzi medikuen ustez

Ez dute zalantzarik izan pilota batek eragin zuela haren heriotza. Cabacasen gurasoek, oso hunkituta, epai aretotik joan behar izan dute audio grabazioak jarri dituztenean
Iñigo Cabacasen guraso Fina Lizeranzu eta Manu Cabacas, Jone Goirizelaia abokatuak lagunduta, epaitegira iristean, atzo, Bilbon.
Iñigo Cabacasen guraso Fina Lizeranzu eta Manu Cabacas, Jone Goirizelaia abokatuak lagunduta, epaitegira iristean, atzo, Bilbon. LUIS TEJIDO / EFE Tamaina handiagoan ikusi

Gotzon Hermosilla -

2018ko azaroak 7

Iñigo Cabacasen hilketari buruzko epaiketa azken astean sartu da, eta, lekukoen deklarazioen txanda amaituta, auzi mediku, aditu eta frogen garaia iritsi da. Cabacasen heriotzaren inguruko txostena egin zuten hiru auzi medikuek deklaratu dute, eta azaldu dute gaztearen burua jo zuen objektua «horizontalean» jaurti zutela, eta Cabacasen burua «perpendikularrean» jo zuela.

Auzi medikuen arabera, abiada handiz jaurtitako «objektu borobil eta trinko batek» ekarri zuen Cabacasen heriotza. Gainera, objektu hori zer abiaduratan zihoan kontuan hartuta, ondorioztatu dute «mekanismo» batez bidez jaurti zutela —pilotak botatzeko eskopeta bat, adibidez—. Datu horiek guztiak «bateragarriak» dira hipotesi nagusiarekin, hots, objektu hori Ertzaintzak botatako gomazko pilota bat izan zela. Iñigo Cabacasen heriotza gertatu zenean plazaratutako beste hipotesiak —erori egin zela, harri bat edo botila bat bota ziotela edo Poza kalean aurkitutako borra luzagarri batekin jo egin zutela— baztertu egin dituzte autopsiaren datuen arabera.

Akusazio partikularraren galderei erantzunez, auzi medikuek argitu dute pilotak Cabacas saiheska jo izan balu —adibidez, pilota airera bota eta nonbait errebotatu ondoren— zauriaren ezaugarriak beste batzuk izango ziratekeela; horregatik ondorioztatzen dute «modu horizontalean» jaurtikitako pilota izan zela.

Auzi medikuek esan dutenez, Cabacasen heriotza «indarkeriazkoa» izan zen, «izaera homizidakoa». Kolpea «hilgarria» izan zen; eragindako zauriak oso larriak izan ziren, eta, anbulantzia lehenago iritsi izan balitz ere, ezinezkoa izango zen gaztearen bizia salbatzea. Bestalde, pilota jaurti zuena Cabacasen eskuinetara zegoela zehaztu dute.

Basurtuko ospitalean (Bilbo) Cabacasen heriotzaren inguruko txostena egin zuen medikuak ere deklaratu du. Esan duenez, Cabacas «kontziente» iritsi zen erietxera, «baina norabidea galduta», eta zaurien ondorioz laster galdu zuen kontzientzia. Auzi medikuek esandakoa berretsi du: bere ustez, zauriak «hilgarriak» ziren, odol jarioaren ondorioz burezurraren barruan eragindako presioa ez zelako «bateragarria» biziarekin.

Bideoak eta grabazioak

Espainiako Poliziaren hiru adituren deklarazioaren ostean, hainbat froga erakutsi dituzte: grabazioak, bideoak eta argazkiak, batez ere. Akusazio partikularrak eskatuta, gau hartan ertzainen artean izandako barne komunikazioen grabazioa jarri dute.

Grabazio horretako zati gehienak epaiketan entzun dira lehenago ere, batez ere lekukoei horien inguruan zerbait galdetu behar izan dietenean. Oraingoan, baina, lehenengo aldiz jarri dute osorik, gertaeren segida nolakoa izan zen ikusteko.

Berriro egon dira entzungai zeresan handia eman duten hainbat pasarte: ofizialaren azalpenak inguruan istilurik ez zegoela adierazteko, Ugarteko ezizeneko ertzainburua kalezuloan «denarekin» sartzeko aginduz eta abar. Biktimaren guraso Fina Lizeranzu eta Manu Cabacasentzat oso gogorra izan da berriro segida osoa entzun behar izatea, eta grabazioa amaitu aurretik epai aretotik joan dira, oso hunkiturik.

Epaiketan orain arte entzun gabeko pasarte batzuk ere entzun dira; esaterako, herritarrek SOS Deiak larrialdi zerbitzura eta Ertzaintzara egindako zenbait telefono dei. Horietako batean, neska batzuen oihuak entzuten dira, eta horietako batek «tiro egiten ari zaizkigu!» egiten du garrasi. Beste batean, herritar batek azalpenak eskatzen dizkio telefonoaren beste aldean dagoen ertzainari: «Nola liteke herri honetan hau gertatzea? Ertzainak jendearen kontra ari dira tiro egiten. Azalduko al didazu zergatik?». Grabazioan entzuten da nola ertzainak «nik ez dut hau jasan beharrik» esan eta telefonoa eskegitzen duen.

Gaur, ondorioak

Gaurko saioan jarraituko dute adituen deklarazioekin, eta, besteak beste, Espainiako Poliziako balistika adituek azalpenak emango dituzte, baina, horretaz gain, alde bakoitzak bere ondorioak ere aurkeztuko ditu.

Pentsatzekoa da akusazio partikularrak orain arteko ondorioei eutsiko diela, eta zigor eskaerak ere bere horretan utziko dituela —launa urteko kartzela zigorra eskatzen dute sei akusatuentzat, eta seina urteko inhabilitazioa—. Gauza bera esan daiteke defentsei dagokienez, eta, seguru asko, absoluzio eskaerari eutsiko diote.

Zalantza nagusia fiskaltzaren jarreran egongo da. Hasieratik, fiskaltzak ez zuen akusaziorik egin, «deliturik» ez zegoelakoan, baina epaiketan ikusi eta entzundakoaren arabera jarrera alda lezake, eta zigorren bat eskatu. Gaur argitu daiteke hori.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Raiundo Berri taberan izan zirenak PCR proba egiteko zain, Okendu kultur etxean gaur goizean. ©Gorka Rubio/FOKU

500 positibotik gora atzeman dituzte Hego Euskal Herrian

Berria

Atzo baino 119 kasu gehiago izan dira. Ospitaleratzeak areagotu egin dira azken orduetan.

Lasarte-Oriako klasururako konbentua itxita, gaur. ©Javier Etxezarreta / EFE

Lasarte-Oriako klausurako komentu bateko moja guztiek positibo eman dute

Berria

Hamar izan dira positiboak guztira. Alkateak adierazi du agerraldia kontrolpean dagoela.

Kutsatze kopuruen azken datuek gora egin dutela ikusita zientzialariak gaineratu du gaitzak “arazo bat” izaten jarraitzen duela. ©Gorka Rubio / FOKU

Bengoak uste du egoera «larria» dela

Aloña Beraza Peña

Ikuskaritza independente bat eskatu dute gertatu dena ikertzeko, egin diren hutsegiteak berriz ere egin ez daitezen, eta aurrera begira ikasteko.

PCR proba egiten gaur, Donostiako Okendo kultur etxean. ©Gorka Rubio/FOKU

Gasteizko Kilimanjaro diskotekan eta Xixilu jatetxean, eta Galdakaoko Muguru tabernan egon zirenei proba egiteko eskatu die Jaurlaritzak

Berria

Gasteizko diskotekan uztailaren 17tik abuztuaren 6ra izan zirenek egin beharko dute testa, eta uztailaren 31tik abuztuaren 4ra jatetxean egondakoek. Galdakaon, tabernan uztailaren 27tik abuztuaren 4ra egon zirenek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna