«Urrats esanguratsua» egin nahi dute galdeketa Donostiara eramanda

Gipuzkoako hiriburuan ez ezik, Irunen, Zallan, Balmasedan eta Alonsotegin ere egingo dituzte herri galdeketak. Antolatzaileek diote «herri gisa erabaki nahi izateak» batu egiten dituela
Nora Garcia, galdeketa egingo duten herrietako ordezkariek inguratuta, atzoko agerraldian.
Nora Garcia, galdeketa egingo duten herrietako ordezkariek inguratuta, atzoko agerraldian. JON URBE / FOKU

Gotzon Hermosilla -

2018ko azaroak 13
Herri galdeketen olatuak beste goraldi bat izango du datorren igandean: Gipuzkoako bi lekutan —Donostian eta Irunen— eta Bizkaiko beste hirutan —Zallan, Balmasedan eta Alonsotegin, denak Enkarterrin— Euskal Herriko estatus politikoari buruzko herri galdeketak antolatuko dituzte. Olatua lehenengo aldiz hiriburu batera iristeak kutsu berezia emango dio azaroaren 18ko galdeketari, eta, antolatzaileen izenean Nora Garcia eta Xabier Martinez bozeramaileek esan dutenez, «urrats esanguratsua» eta «ekarpen garrantzitsua» egingo dute.

«Ura bere bidera doa. Hasieran ibaia ginen, eta tantaz tanta itsaso bihurtu gara», esan dute Garciak eta Martinezek. Gogoratu dute GED Gure Esku Dago dinamikak bost urteko ibilbidea baino ez duela egin, eta duela bost urte «ezinezkotzat» jotzen zutena «posible» bilakatu dutela, «herritarrok sortutako olatua inork espero ez zuen lekuetara iristea» barne.

Galdeketen antolatzaileen esanetan, «borondateak» bildu ditu: «Herri izan nahi dugu, eta herri gisa erabaki nahi dugu». Asmo horrekin aritu dira lanean galdeketak prestatzen, eta lantegi horretan «urteetan iraun duten hamaika horma eraitsi eta beste horrenbeste sasi alboratu» egin dituzte. Horregatik pentsatzen dute prozesu honek aldaketa sakonak ekarriko dituela: «Honen ostean gure herrietan ezer ez da bera izango».

Orotara, 221.679 lagunek izango dute botoa emateko aukera bost galdeketetan, 09:00etatik eta 20:00etara. Galderak desberdinak izango dira leku batetik bestera. Donostian, Zallan eta Balmasedan, euskal herritarrek «etorkizun politikoa» aukeratu ahal izatearekin ados ote dauden galdetuko diete herritarrei; Alonsotegin, berriz, ea «euskal estatu independente bateko herritar» izan gura duten. Azkenik, Irunen, hiru aukeraren artean bat hautatu ahal izango dute herritarrek: egungo estatusa, estatus berria Espainiako Estatuaren barruan edo «euskal estatu burujabe eta independentea».

Antolatzaileek esan dutenez, sistema informatiko bat erabiliko dute saihesteko inork botoa ematea behin baino gehiagotan, eta, horretaz gain, berme batzorde bat ere egongo da, «protokoloa zorrotz errespetatzen dela eta galdeketak berme guztiekin egiten direla ziurtatzeko».

Nazioarteko begirale talde bat ere egongo da: gehienak Kataluniatik etorriko dira, baina egongo da Eskoziako eta Argentinako begiralerik ere.

Azaroaren 18an botoa zuzenean ematerik izango ez dutenek bozka postaz bidaltzeko aukera dute, eta horretarako epea urriaren 29az geroztik dago zabalik.

Bost toki horietako herritarrei prozesuan parte hartzeko deia egin diete Garciak eta Martinezek. «Ikusi dugu erabakitzeko beharrak batu egiten gaituela adin, pentsamolde eta jatorri askotariko herritarrak», esan dute; horregatik pentsatzen dute azaroaren 18an «demokrazia» gailenduko dela eta, horrekin batera, «herritar guztiak».

Quim Torra Donostian

Giroa berotuz joateko, GEDek hainbat ekitaldi antolatu ditu Donostian aste honetarako, eta horietatik garrantzitsuena izango da Quim Torra Kataluniako Generalitateko presidenteak bihar Donostiako Kursaal jauregian emango duen hitzaldia.

Ekitaldia 19:00etan hasiko da, eta Katalunia: burujabetza, demokrazia, askatasuna izango du goiburu. Bidaia baliatuta, Torrak bilera izango du eguerdian Iñigo Urkullu Eusko Jaurlaritzako lehendakariarekin, Gasteizen.

Bestalde, galdeketaren bezperan, azaroaren 17an, beste solasaldi bat egongo da Donostian, 19:00etan, Aquariumean. ANC Biltzar Nazional Katalaneko presidente Elisenda Paluzie eta Marcel Mauri Omnium Culturaleko presidenteordea Kataluniako egoeraz mintzatuko dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Gotzon Hermosilla

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna