Suak erabat kiskali du Aldanondo gaztandegia

Suteak ia osorik hondatu ditu korporazioaren Aguraingo lantegia eta han zeuden bi milioi gazta kiloak. Langilerik ez zegoen ezbeharra gertatu denean
Gaztandegiaren barneko egitura guztia jausi zen sutearen ondorioz, eta lantegiaren gune gehienak azpian hartu zituen.
Gaztandegiaren barneko egitura guztia jausi zen sutearen ondorioz, eta lantegiaren gune gehienak azpian hartu zituen. JAIZKI FONTANEDA / FOKU

Irune Lasa -

2018ko abuztuak 14
Litutxipi industrialdeko gaztandegian garrek eragindako galera ekonomikoak «oso handiak» izango direla uste dute Aldanondo korporazioan. Egunak beharko dituzte kalteak zenbatzeko; besteak beste, segurtasun arrazoiengatik gaur arte behintzat ezinezkoa izango delako lantegian sartzea. Dena den, Mikel Aldanondo zuzendari nagusiaren ustez nahiko argi dago lantegia erabat suntsituta gelditu dela: «Makineria, fabrikazio gunea, biltegia... dena dago hondatuta», azaldu zuen atzo eguerdian. Gaztandegian, gainera, bi milioi kilo gazta zeuden.

Enpresaburuak argitu zuen langilerik ez zegoela sutea piztu zenean —01:15ean—, «zorionez». Gaztandegiak 50 langile inguru ditu. Lehen garrak, dirudienez, horretarako ezarritako sentsoreek atzeman zituzten, gaztak biltzeko plastiko eta abarrak gordetzen zituen biltegian. Alarmak ikusita, suhiltzaileak bertaratu egin ziren, eta azkenean hainbat parketako 30 bat suhiltzaile jardun ziren sua kontrolpean hartzeko lanetan, baita garrak ondoko pintura fabrikara iristea eragozten ere. Suteak gaztandegiaren bi heren suntsitu ditu, eta, Mikel Aldanondoren arabera, bulegoen zati bat soilik libratu da garretatik. Atzo arratsaldean, oraindik ere garretan zeuden gaztak gordetzen dituzten ganberak, sutea kontrolatuta egon arren.

Aldanondo Korporazioak Aguraingo (Araba) gaztandegian egiten ditu gaztak, nahiz eta Quesos Aldanondok beste planta bat duen Olaberrian (Gipuzkoa) eta beste bat Galdakaon (Bizkaia). Berrogeita hamar urtetik gorako enpresa horrek hainbat elikagai ekoizten eta banatzen ditu, baina gaztengatik da ezaguna. Idiazabalgo gaztaren sor-markako ekoizlerik handiena da, Aitzgorri eta Lana markekin. Erronkari gazta ere egiten du —Poliki eta Onkizu—.

Suak Aguraingo gaztandegian eragindako hondamenaren neurria ikusirik, Arabako Aldundiak adierazi du kezkatuta dagoela enpresaren eta bertako 55 langileen etorkizunarekin, eta egoerari aurre egiteko laguntza eskaini dio Aldanondo taldeari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna