Ez da makala enpleguaren datu hori, besteak beste, taldea banaketan desinbertsioak egiten ari zela, industriako kooperatibak gai izan direlako 2.691 lanpostu berri sortzeko, balio erantsi handiagoko sektorean.
Hain zuzen, enpleguak Mondragoneko industria kooperatibetan izandako ibilbidea nabarmendu du Iñigo Uzin korporazioko lehendakariak: «Azken bi urteetan 4.000 lanpostu baino gehiago sortu dira industrian».
INDUSTRIA
Mondragonen industria kooperatibek 2.691 lanpostu gehiagorekin, 37.020 langilerekin, itxi dute iazko urtea. Azpimarratzekoa da kooperatiba horiek azken bosturtekoan 7.000tik gora lanpostu sortu dituztela, «horietatik %55 gure inguruan». Mondragonen arabera, «gainera, kooperatibek ondo asmatu dute Fagor Etxetresnak itxi izanak eragindako 1.895 bazkideetatik ia guzti-guztiei enplegu irtenbideak ematen, batez ere beste lanpostu bat emanez eta aurretiko erretiroen bidez».Alor industrialak iazko urtea 5.547 milioi euroko fakturazioarekin amaitu du, aurreko urteko kopurua %8,1 hobetuta. Hala ere, emaitzetan beherakada izan dute kooperatiba industrialek. Aurreko urtean baino %9 gutxiago irabazi dute, 233 milioi euro, «batez ere lehengaien prezioak gora egin duelako, euroaren balioaren handitzeagatik eta atzerrian plantak ireki direlako ere».
Nazioartekotzearen apustuarekin jarraitu dute iaz Mondragoneko industria kooperatibek. Dagoeneko, arloaren salmenten %70 egiten dira Euskal Herritik eta Espainiatik kanpo. Filial berriak ere zabaldu dituzte iaz, Txinan, Mexikon eta Norvegian.
EZAGUTZA
Berrikuntzan ahalegina egiten ari da Mondragon, eta, gaur egun, 1.928 pertsona ditu ikerketan eta garapenean lanaldi osoz jardunean taldearen hamabost teknologia zentroetan eta I+G unitateetan. Produktu eta zerbitzu berrien salmentak 255 milioi eurora iritsi dira iaz, eta Mondragonek indarrean dituen patente familien kopurua 498 da.BANAKETA
Langile gehien banaketaren alorrean ditu Arrasateko korporazioak: 40.368 pertsona. Eroskiren eta Erkop elkartearen salmentak 5.733 milioi eurorenak izan dira iaz, aurreko urtekoak baino zertxobait txikiagoak. Jaitsira horren zati handi bat, dena den, Eroskik bere dendetan egindako desinbertsioak esplika dezake. Iazkoa, irabazietan behintzat, datu positiboetara itzultzeko urtea izan daEroskirentzat, 33,2 milioi euroren etekinekin.FINANTZA
Laboral Kutxak ere mozkinak hobetu egin ditu iaz, %9,1 gehiago irabazita, hots, 121,4 milioi euro. Era berean, entitateak hobetu egin ditu bere errentagarritasuna (%7,5) eta bere berankortasun ratioa (%5,9), likidezia eta kaudimen ratio zabalei eutsiz.Lagun Aro Borondatezko Gizarte Aurreikuspeneko Erakundeak 27.986 mutualista aktiborekin eta 6.477 milioi euroko ondare funtsarekin itxi du 2017a.
Iñigo Uzinek Mondragon taldeak azken urteetan egindako inbertsioak azpimarratu nahi izan ditu korporazioaren iazko emaitzen harira. Azken bosturtekoan 1.963 milioi euroren inbertsioak egin ditu korporazioak. Iaz, zehazki, 451 milioi eurorenak izan dira, eta horietatik 169 milioi ezagutzaren arloa indartzera joan dira.
Urteko lehen hilabeteetako bilakaera ikusita, aurtengo ekitaldian ere gorantz egingo duela uste du Mondragon taldeak. «Gizarteari gure aletxoa eskaintzen diogu oraindik ere. Jakin badakigu etorkizuna erronkaz josita izango dugula, eta horiek proban jarriko dituztela gure gaitasunak, baina konfiantza osoa dugu gure ereduan, eta, gure pertsonen ekarpenari esker, gizarte hobea eta bidezkoagoa sortzen laguntzenjarraituko dugu», esan du Mondragoneko Kontseilu Nagusiko lehendakariak.
