Albistea entzun

Kataluniako prozesu subiranista. Epaiketa

Erasora eginez defendatu dute beren burua

Cuixartek eta Forcadellek oinarrizko eskubideak aldarrikatu dituzte. Omniumekoak esan du behar beste galdeketatara deituko dutela. Legebiltzarreko presidente ohiak ezbaian jarri du Konstituzionala.

Carme Forcadell Kataluniako Parlamentuko presidente kargugabetua, atzo, fiskalaren galderei erantzuten.
Carme Forcadell Kataluniako Parlamentuko presidente kargugabetua, atzo, fiskalaren galderei erantzuten. EFE Tamaina handiagoan ikusi

Igor Susaeta -

2019ko otsailak 27

Carme Forcadellek eta Jordi Cuixartek ez dute, beharbada, aurreko bi asteetan Auzitegi Gorenean deklaratu duten akusatu gehienen gaitasun diskurtsiboa. Kataluniako Parlamentuko presidente kargugabetuaren eta Omnium Culturaleko presidentearen jendaurreko ibilia ez da gainontzekoena bezain luzea. Baina atzo, matxinada egotzita Kataluniako prozesu subiranistaren epaiketan deklaratzea tokatu zitzaienean, izkin egin zieten fiskalek jarritako tranpei, eta onik atera ziren; are, gainontzeko akusatuek egin moduan, erasora egin zuten, Espainiako Estatuaren izaera demokraziaren kontrakoa dela zuzenean salatuz, edo hori iradokiz, adibidez. Cuixartek desobedientzia zibila jarri zuen bere deklarazioaren erdigunean, eta Forcadell 2017ko irailean eta urrian ganberako presidente zenak behin baino gehiagotan azpimarratu zuen Parlamentuko Mahaiak ez duela «tramitazio parlamentarioen konstituzionaltasuna» baloratzeko «eskumenik», eta bera, horrenbestez, ganberako bere egitekora «mugatu» zela. «Ez nuen inongo estrategiatan parte hartu». Biek oinarrizko eskubideak aldarrikatu zituzten.

Arratsaldeko saioan deklaratu zuen Forcadellek, 16:20etik 19:50era. Manuel Marchena epaimahaiburuak askotan esan du gertakariak ari direla epaitzen, baina Consuelo Madrigal fiskalak ganberako presidente kargugabetuari egin zion lehen galderak zerikusia zuen Forcadell ANC Biltzar Nazional Katalaneko presidente izan zen garaiarekin —2012tik 2015era—. Eta, horrekin lotuta, zera nabarmendu zuen Olga Arderiu bere abokatuaren galderei erantzuten ari zela: «Ez dut ulertzen zergatik epaitzen nauten hemen, tramiteak Mahaiko nire kideek onartutako berak badira». Horiek Kataluniako Auzitegi Nagusian epaituko dituzte, desobedientziagatik. «Tira, ulertzen dut», gaineratu zuen. Arderiuk BERRIAri adierazi zionez, fiskalek ANCko presidentetza hori ordainarazi nahi diote.


Fiskaltzak leporatzen diona da, batik bat, zilegitasuna eman ziola erreferenduma antolatzeko legeari, Auzitegi Konstituzionalaren eskaerei muzin eginez. Horri buruz hamaika galdera egin zizkion Madrigalek, baina Forcadellek parlamentuaren «subiranotasuna» aldarrikatu zuen. «Eskubideen urraketa gisa ulertzen dut Konstituzionalak eskatutakoa. Zentsura zen; ezin genuen hori egin». Horrekin lotuta, gehitu zuen «beti» defendatuko dituela «oinarrizko eskubideak eta legebiltzarreko araudia». Erasora pasatuz, jopuntuan jarri zuen, gainera, Konstituzionala bera: «Irizpide judizialak ez baizik irizpide politikoak erabili izan ditu Konstituzionalak lurraldetasunari buruzko gaietan». Mugimendu independentistaren izaera baketsua jarri zuen mahai gainean.

Cuixartek ere, gainontzeko akusatuek aurreko bi asteetan bezala, jokabide hori azpimarratu zuen. Jaime Moreno fiskalaren galderei erantzun zien goizeko saioan, eta Estatuko abokatuari erantzuteari uko egin zion. 2017ko irailaren 20an Ekonomia Kontseilaritzaren eraikinaren parean egindako mobilizazio masiboaren ustezko bultzatzaile gisa dago akusatuen aulkian Omnium Culturaleko presidentea. Egun hartan ez zela «biolentziarik» egon adierazi zuen. «Tensioa bai, baina biolentziarik ez». Horren harira, galdera bat plazaratu zuen, gainera: «Frantziar gizarteak nola erreakzionatuko zuen bere finantza autonomia baliogabetuko baliote? Hori egin zen irailaren 20an». Cuixarten defentsak froga gisa erakutsi zituen egun hartako irudi batzuk, agerian uzteko Omniumekoak jarrera baketsua izan zuela, eta hori transmititzen ahalegindu zela.


Urriaren 1eko gertakariei dagokienez, Espainiako polizien «ankerkeria» salatu zuen. «Biolentzia bakarra Espainiako Poliziak eta Guardia Zibilak gauzatutakoa izan zen». Fiskalarekin tentsio une dezente izan zituen, eta hark galdetu zion ea ba ote zekien zazpi agente zauritu zituztela egun hartan: «Dakidana da hamazazpi agente ikerketapean daudela», erantzun zion Cuixartek. Haren ustez, U-1ean gertatutakoa «duintasun kolektiboko ariketa bat» izan zen. Desobedientziaren bidea ibiltzera deitu zuen —«erreferendumak egiten segituko dugu, harik eta Poliziaren biolentziarik gabeko bat egin eta emaitza ezarri arte»—, eta plazaratu zuen auzia elkarrizketa bidez soilik konpondu ahal izango dela. «Estatuko botere gehienek ez dute hori ulertzen oraindik». Eta fiskalak aipatu zionean Twitterreko txio batean «asalto batez» mintzo zela, Cuixartek hori baliatu zuen estatuari leporatzeko sasoi hartan webguneak «sistematikoki» ixten zituela. «Turkian bezala», errematatu zuen.

Politikari presoa ez baizik «preso politikoa» dela nabarmendu zuen, eta gaineratu iazko urtarrilean Pablo Llarena auziaren instrukzio epailearen aurrean deklaratu zuenean bere helburu bakarra zela kartzelatik ateratzea. «Orain ez da nire lehentasuna. Preso politiko bat naiz, eta nire lehentasuna da Kataluniako gatazka politikoa konpontzea».

4.000 bazkide gehiago

Omnium Culturalek jakinarazi zuenez, Cuixartek deklaratu zuen orduetan 4.000 bazkide gehiago erregistratu zituen elkarteak. Bestalde, Forcadellen abokatuek demanda bat aurkeztu zuten atzo Europako Giza Eskubideen Auzitegian, iritzita neurriz kanpokoa izan dela beren bezeroari ezarritako behin-behineko espetxealdia. Datozen bi egunetan, politikariek deklaratuko dute. Gaur, Mariano Rajoyren txanda izango da (16:00).

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Fernando Grande-Marlaska Espainiako Barne ministroa, gaurko agerraldian, Espainiako Kongresuan ©J.C. Hidalgo / EFE

Grande-Marlaskak berriz esan du Espainian ez zela inor hil Melillako hesia igarotzeko ahaleginean

Ander Perez Zala

Espainiako Barne ministroak Guardia Zibila defendatu du, argudiatuta segurtasun indarren erantzuna «proportzionala» izan zela. Ikerketa batzuen arabera, gutxienez lagun bat hil zen Espainian sartzean.

 ©JAGOBA MANTEROLA / FOKU

«Gerra apartekoa da antolaketa sozial bat ezartzeko»

Igor Susaeta

Gerra erregimenaren eskema gobernatzeko eredu gisa aplikatzeak eragiten dituen egoerez eta ondorioez ohartarazi du Sanchez Cedillok 'Esta gerra no termina en Ucrania' liburuan.
NATOk berretsi du «behar beste denboraz» lagunduko diola Ukrainari

NATOk berretsi du «behar beste denboraz» lagunduko diola Ukrainari

Mikel O. Iribar - Igor Susaeta

Aliantzaren helburuetako bat da Putinek «irabazten ez duela bermatzea». G7ko herrialdeek adostu dute Ukrainako gerra krimenen ikerketak koordinatzeko sare bat egitea
Jiang Zemin, 2007ko argazki batean. / ©MICHAEL REYNOLDS, EFE

Jiang Zemin hil da, 1993tik 2003ra Txinako presidente izandakoa

Jon Ordoñez Garmendia - Maddi Iztueta Olano

Tiananmen plazako protesten ostean hartu zuen kargua, eta Alderdi Komunistan merkatu ekonomia sozialista kontzeptua txertatu zuen.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...