Torrak xingola horiak kenduko ditu, arartekoaren gomendioak jarraituz

Kataluniako Gobernuak arartekoaren esanari jarraituko dio, eta eraikin publikoetatik kendu egingo ditu «preso politikoei» erreferentzia egiten dieten sinboloak: pankartak eta xingola horiak. Nola egingo duen, hori dago argitzeko. Rafael Ribo Kataluniako arartekoak atzo azaldu zuen bere txostena —izatez, ostiralerako aurkeztu zion gobernuari—, eta Generalitateari gomendatu zion ikur horiek guztiak kentzea, hauteskunde garaian «neutraltasun politikoa» mantentze aldera. Ñabardura egin zuen: izan dadila «salbuespenezko» neurri bat, datorren maiatzaren 26an Europako Parlamenturako hauteskundeak egin artekoa. Torra bere gertukoekin bildu zen, eta iluntzean jakinarazi zuen arartekoaren aholkua errespetatuko duela, nahiz eta berez ez den loteslea.

Baina segidan erantsi zuen ez duela berak emango ikurrak kentzeko agindua, eta, gainera, aztertzen ari direla ikur horiek ordezkatzeko zer beste aukera dauden. Espainiako hauteskunde batzordea gaur 17:00etan elkartuko da, eta espero da Generalitateak hori baino lehen argituko duela, zehazki, zer egingo duen. Atzo gauean, Generalitateko jauregiko pankartak betiko balkoian jarraitzen zuen, eta dozenaka herritar bilduak ziren eraikinaren aurreko Sant Jaume plazan, hauteskunde batzordearen agindua salatzeko.

Gobernuak xingola horien defentsa egin du, nolanahi ere. Iluntzean zabaldutako oharrean hala adierazi zuen: «Katalunian eta munduan, beren gizarteetatik injustuki urrutiratutako pertsonak gogoratu eta aitortzeko ikurrak dira xingola horiak». Ez direla ikur partidista bat berretsi zuen, eta beti adierazpen askatasunaren alde egingo duela erantsi.

Espainiako hauteskunde batzordeak ikur horiek kentzeko eskatu zion Generalitateari martxoaren 11n; 48 ordu eman zizkion. Ezezkoan egon da Torra orain arte, eta batzordea gaur da biltzekoa, aztertzeko Torrari isun ekonomiko bat ezarriko dion —300 eta 3.000 euro artekoa— edo auzia fiskaltzaren esku utziko duen. Ikurrak gaur kentzen badituzte zer gertatuko den ere ikusgai dago.

Joan den asteko ultimatumaren ondoren, bere kabuz hasi zen auziari buruzko ebazpen bat osatzen, Rafel Ribo ararterkoak berak berak atzo azaldu zuenez. Eta zehaztu zuen ostiralerako Generalitateak bazuela txosten horren berri. Torrak, baina, puntu argitzeko eskatu zion arartekoari herenegun. Adibidez, zeintzuk diren eraikin publikoak, noiz arte irauten duen «hauteskunde garaiak», eta ea Generalitateari dagokion jendeak eraikin publikoetan jarritako sinboloak kentzea. Arartekoaren ebazpena beteko zuela esan zuen Generalitateak atzo; arartekoaren ebazpena zein zen jakinik, beraz.

Ribok azpimarratu nahi izan zuen iazko irailean auziari buruz azaldutakoari eusten diola, hala ere. Ciudadanosek xingola horiak kentzeko kanpaina bat hasi zuen orduan, baina arartekoak adierazpen askatasuna mugatzearen kontra egin zuen: «Harrigarriak edo artegagarriak izan arren, sinbolo horiekin adierazteko erabateko askatasuna dago».

Casado eta 155.a

Xingola horiak eraikinetatik kendu nahi ez izatea jokabide «elektoralista» da, Isabel Zelaa Espainiako Gobernuaren bozeramaileak atzo goizean adierazi zuenez. Gaineratu zuen Generalitateko presidentea desobedientziaren «marra» igarotzetik gertu zegoela. Pablo Casado PPren liderrak, berriz, Katalunian konstituzioaren 155. artikulua ezartzeko eskatu zion atzo berriro Espainiako Gobernuari. Carmen Calvo Espainiako presidenteordearen ustez, baina, 155.a era «iraunkorrean» ezartzea ez da konstituzionala.