Albistea entzun

Epaileek kanpaina betean argituko dute Kataluniako bozetarako data

Kataluniako Auzitegi Nagusiak otsailaren 8a baino lehen emango du hauteskundeak atzeratzeari buruzko epaia. Horrez gain, Generalitateko Atzerri kontseilaria inhabilitatu du, desobedientziagatik
Meritxell Budo Generalitateko bozeramailea eta Pere Aragones presidenteordea, asteartean, Bartzelonan.
Meritxell Budo Generalitateko bozeramailea eta Pere Aragones presidenteordea, asteartean, Bartzelonan. R. MORENO / EFE Tamaina handiagoan ikusi

Gorka Berasategi Otamendi -

2021eko urtarrilak 22

Baliteke Katalunia oso egoera bitxian egotea hurrengo asteburuan. Posible da alderdiak hauteskunde kanpaina betean murgilduta egotea jakin gabe ea kanpaina horren amaieran bozak egingo diren ala ez. Izan ere, Kataluniako Auzitegi Nagusiak atzo adierazi zuen otsailaren 8ra arteko epea emango diola bere buruari Generalitateak hauteskundeak atzeratzeko onartu zuen dekretua legezkoa den ala ez argitzeko. Bitartean, indarrean jarraituko du hauteskundeak egiteko hasierako datak, otsailaren 14ak, eta gobernuak bozetarako prozesuarekin segitu beharko du egun horretan herritarrek parlamenturako ordezkariak bozkatu ahal izateko.

Kataluniako Gobernuak hauteskundeak maiatzaren 30era atzeratzeko dekretua onartu zuen joan den ostiralean, pandemiaren eraginez osasun egoerak okerrera egingo duela argudiatuta. Osasun Kontseilaritzaren txosten baten arabera, otsailaren 14an 100.000 eta 200.000 herritar artean egon daitezke kutsatuta edo konfinatuta, eta COVID-19ak kutsatutakoen kopuruak eta ZIU zainketa intentsiboetako unitateen okupazioak goia joko dute egun gutxi batzuk lehenago. Eguneko 3.000-4.000 positibo izango direla iragarri zuen, eta 620-750 paziente ZIUetan.

Egun aldaketak alderdi guztien babesa jaso zuen, PSCrena salbu, eta adostasun politiko zabal bat lortu izanari balioa aitortu dio Generalitateak. Bestalde, atzeratzea defendatzeko gogora ekarri du Eusko Legebiltzarrerako eta Galiziako Parlamenturako bozen aurrekaria ere. Bi kasuetan, hauteskundeak atzeratu egin ziren, pandemiarengatik. Baina Auzitegi Nagusiak dekretu hori indargabetu zuen behin-behinean, joan den asteartean, herritar batek neurriaren kontra aurkeztu zuen helegitea aintzat hartuta.

Auzitegiak kautela neurriak justifikatu zituen, esanez hala egin ezean «ziurgabetasun juridiko larria» sortuko litzatekeela. Izan ere, azkenean bozak otsailaren 14an egin behar direla ebatziz gero, ez legoke nahikoa tarterik hauteskunde prozesurako legedian jasotzen diren epeak betetzeko. Arrazoi horiekin bat dator fiskaltza. Generalitateak, berriz, behin-behineko neurrien kontrako alegazioak aurkeztu zituen atzo goizean.

Auzitegiak horiek jaso ondoren berretsi zuen bozei otsailaren 14an eusteko erabakia, auzia argitu artean, eta lau eguneko epea eman zien aldeei atzeratzearen aldeko ala kontrako argudioak aurkezteko. Beraz, datorren astearen erdian izango ditu eskuan erabaki bat hartzeko elementu guztiak. Epaia otsailaren 8a baino lehen emango duela adierazi zuen.

Egoera «ziurgabeak»

Auzitegiak kautela neurrien bidez egoera «ziurgabe bat» saihestu nahi izan badu, paradoxikoki, beste bat sortu du. Izan ere, epaileek auziaren muinari buruzko erabakia hartzeko otsailaren 8ra arteko epea amaitzen badute, eta hauteskundeen atzerapena ontzat ematen bada, Katalunia kanpainako 11. egunean izango da. Egoera aldatzen ez bada, urtarrilaren 29an hasi beharko du kanpainak, eta hilaren 27ra edo 28ra arte itxaron beharko du alegazioak aztertzen hasteko.

Bozak atzeratzearen kontrako beste sei salatzaileren helegiteak ditu zain Kataluniako Auzitegi Nagusiak. Helegiteak aurkeztu dituztenen artean dira Liga Demokratikoa, Ezkerreko Federalistak, Ezkerra Positiboan eta Bultzada Herritarra elkarteak. Auzitegiak tramiterako onartu duen lehena, bozen atzerapena indargabetu duena, Josep Asensio abokatuak aurkeztu du: aurretik mossoa izan zen, 21 urtez.

Hauteskundeak atzeratzeko dekretua behin-behinean indargabetu izanari «arduragabekeria» deritzo Pere Aragones Kataluniako jarduneko presidenteordeak, «ziurgabetasunera» bultzatuko duelako bozen prozesua eta «bozkatzeko eskubidearen eta osasunerako eskubidearen artean erabakitzera» behartuko dituelako herritarrak.

Hauteskunde egunaren auziarekin bakarrik ez, Kataluniako Auzitegi Nagusiak jokaleku politikoa aztoratu zuen atzo beste erabaki batekin ere. Bernat Sole Generalitateko Atzerri kontseilaria zigortu zuen, desobedientziagatik. Urtebeteko inhabilitazioa eta 16.800 euroko isuna ezarri zizkion, 2017ko urriaren 1eko independentzia erreferenduma antolatzen laguntzea egotzita. Erreferenduma egin zenean, Agramunt herriko alkate zen Sole.

Kataluniako Gobernuak Auzitegi Nagusiaren epai hori ere salatu du. Aragonesen esanetan, Espainiako justizia «politika baldintzatzeko» ahaleginetan ari da «beste behin ere». ERCko ordezkaria izan da urriaren 1a babestu zuten ehunka alkateen artean galdeketa antolatzen laguntzeagatik zigor epaia jaso duen lehena.

Epaiak dio Solek baimendu egin zuela Agramunteko udal areto batean erreferendumean parte hartzera deitzeko hitzaldi bat egitea, eta bera hizlari aritu zela. Urriaren 1eko erreferenduma antolatzeko «ardura logistikoak» bete zituela gaineratu du, eta «babesa eta laguntza» eman ziela antolatzaileei, Espainiako Poliziak eta Guardia Zibilak beste herri batzuetan egin zituzten esku hartzeei buruzko informazioa helarazi zielako, besteak beste.

Solek karguan jarraituko du, epaia ez baita irmoa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©BERRIA

«Ekialde Hurbileko emakumeak duela mende batetik ari dira hobekuntza eske»

Joan Cabases Vega

Egoerarik «ilunenean ere», eskualdeko emakume aktibistak gai izan dira disidentzia espazioak sortzeko, eta hori lortu izana «itxaropentsua» da, Tahmasebiren iritziz.
Abdul Hamid Mohammed Dbeibah jarduneko lehen ministroa, otsailean, 2011ko protestak gogoratzeko ekitaldi batean. ©STR

Libiako trantsizio gobernuari buruzko konfiantza mozioari ekin diote parlamentuan

Julen Aperribai

«Aukera historiko hau» pasatzen ez uzteko eskatu du Dbeibah lehen ministro kargurako izendatuak. NBEren txosten batek dio botoak erosi zituela Tunisian
Debekuaren aldeko kanpainak erabilitako karteletako bat. ©URS FLUEELER / EFE

Burka erabiltzea debekatu du Suitzak

Iosu Alberdi

Herritarren %52k babestu dute, erreferendum bidez. Erabakiaren aurkako mugimenduek «musulmanen kontrako erasotzat» jo dute
Lula da Silva Brasilgo presidente ohia, 2019an espetxetik atera zenean. ©Sebastiao Moreira

Lula da Silvaren aurkako zigorrak baliogabetu ditu epaile batek

Julen Aperribai

Brasilgo presidente ohiari ustelkeriagatik ezarritako zigorrak bertan behera utzi ditu Brasilgo Auzitegi Goreneko epaile batek, auzitegiko plenoak horren inguruan erabaki bitartean. 2022ko hauteskundeetara aurkezteko moduan legoke, berretsiko balitz.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.