Albistea entzun

Krimeara ontzi militarrak bidaltzeko eskatu dio Ukrainak NATOri

Itsaso Beltzean presentzia handia duela erantzun du NATOk. Poroxenkok laguntza eskatu dio Alemaniari. Merkelek elkarrizketa aldarrikatu du. Auzia dela eta, Trump ez da Putinekin bilduko
Poroxenko Ukrainako presidentea herenegun, armadaren entrenamendu gune batean.
Poroxenko Ukrainako presidentea herenegun, armadaren entrenamendu gune batean. MYKOLA LAZARENKO / EFE Tamaina handiagoan ikusi

Igor Susaeta -

2018ko azaroak 30

Oraingoz ezin izan dute baretu joan den igandean Errusiaren eta Ukrainaren artean sortutako gatazka militarraren sua. Alde bakoitzak bere argudioak hauspotzen jarraitzen du. Mendebaldeko potentziek eskatu diote Errusiako Gobernuari aska ditzala kartzelatuak eta epaituak izan zain dauden 24 soldadu ukrainarrak, baina Vladimir Putin ez dago horretarako prest. Errusiaren eta Ukrainaren arteko muga «legez kanpo gurutzatzea» leporatuta atxilotu zituzten marinelak Krimeako penintsulan, Itsaso Beltzeko uretan, eta, «segurtasuna bermatzearren», hara ontzi militar gehiago bidal ditzala eskatu dio NATOri Petro Poroxenko Ukrainako presidenteak. NATOk astelehenean adierazi zuenez, ezin dira justifikatu atxiloketak, baina ez du hartu ontzi gehiago bidaltzeko konpromisorik. «NATOk presentzia handia du Itsaso Beltzean, eta eskualdean dugun presentzia ebaluatzen jarraituko dugu», esan zuen Oana Lungescu erakundearen bozeramaileak, atzo.

Poroxenkok laguntza eske jarraitzen du, eta Alemaniarengana jo du zuzenean. Ukrainako presidenteari egindako elkarrizketabat argitaratu zuen atzo Bild Alemaniako egunkariak, eta Poroxenkok horretan azpimarratu du Berlin Ukrainaren «lagun handia» dela, haien «aliaturik gertukoenetako bat». NATOren erabakietan eragin dezala eskatu dio Angela Merkel kantzilerrari. Poroxenkoren iritziz, gertatu zena gertatu zen igandean, Azoveko itsasoa «okupatzea» beste asmorik ez duelako Putinek. Areago joan zen presidentea bere adierazpenetan: «Putinek inperio errusiarraren garaira itzuli nahi du».

Merkelek «elkarrizketa» aldarrikatu du batik bat, «gertakariak mahai gainean jartzera» deitu du, eta adierazi dio Errusiari aska ditzala Ukrainako armadako soldaduak. Hori bai, tentsioa baretze aldera, Ukrainari «buruargitasuna» eskatu dio, iritzita gatazkak «zuhurtasunez» konpondu behar direla.

Horrez gainera, 2003an Kievek eta Moskuk sinatutako hitzarmen bat izan zuen gogoan. Horren arabera, Azoveko itsasoa parteka dezakete bi aldeek, eta bai Errusiako ontziek, baita Ukrainakoek ere, Kertxeko itsasartea gurutza dezakete. Merkel «arduratuta» azaldu zen Ukrainak duen egoera ekonomiko «oso zailagatik». Horregatik, eta kontuan hartuta Errusiak itsasoko trafikoa blokea dezakeela, Mariupol hirirako itsaso bidezko sarbidea «ziurtatu» beharra dagoela nabarmendu zuen.

Berlinen egin zituen adierazpen horiek atzo, Alemaniak eta Ukrainak elkarrekin antolatutako foro ekonomiko baten barruan. Buenos Aireserako hegaldia hartu zuen gero, G20koen taldearen goi bileran parte hartuko baitu, beste hainbat estatutako agintariekin batera. Putinekin topo egingo du han, eta harekin biltzekoa da.

Kremlinek ez du gogo onez hartu Ukrainak NATOri egindako eskaera, eta, gertatutakoa azaltzeko, Moskuk azken egunotan darabilen tesiari eutsi zion Dmitri Peskov bozeramaileak, atzo. «Probokazioen politikarekin jarraitzen dute». Bestalde, «inongo bitartekaritzaren beharrik» ez dagoela iruditzen zaio Moskuri. «Lagundu nahi dutenek lagundu dezakete Kieveko agintariengan eraginez».

Putinek azalpenak eman beharko ditu Buenos Airesen, baina azkenean ez da Donald Trumpekin bilduko. AEBetako presidenteak uko egin dio Errusiakoarekin batzartzeari. Etxe Zuriko maizterrak herenegun jakinarazi zuen bertan behera uztekotan zegoela ia-ia baieztatuta zegoen bilera, ez zitzaiolako gustatu Errusiak Ukrainari egindako «erasoa». Moskuk, halere, bilduko zirela pentsatzen zuen. Trumpek, baina, bilera baztertu zuen atzo, argudiatuz ez duela merezi, soldadu ukrainarrak atxilotuta baldin badaude.

Ukrainarrak soilik

Azoveko itsasoan gertatutakoa dela eta, Ukrainako hamar eskualdetan salbuespen egoera ezarri dute. Horren harira, Ukrainak erabaki du atzerritarrei Krimearako sarbidea blokeatzea. Ukrainarrak soilik sartu ahal izango dira Errusiak de facto kontrolpean duen penintsulan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Raila Odinga presidentegaiaren jarraitzaileak, Nairobin. / ©Daniel Irungu, EFE

William Rutok irabazi ditu Kenyako presidentetzarako hauteskundeak

Arantxa Elizegi Egilegor

Hauteskunde Batzordeko zazpi kideetatik lauk uko egin diote emaitzak onartzeari. Raila Odingaren jarraitzaileek protesta egin dute batzordeko kideak bilduta dauden hotelaren atarian.

Nicola Sturgeon lehen ministroa, Eskoziako Parlamentuan. ©FRASER BREMNER/SCOTTISH DAILY MA

Hilekoarentzako produktuak doan banatuko ditu Eskoziak gaurtik aurrera

Berria

Gaur sartu da indarrean Hilekoarentzako Produktuen Legea, Eskozian. Udalek eta eskolek banatuko dituzte tanpoiak eta konpresak, eta eskatzen dituen ororentzat eduki beharko dituzte eskuragarri, doan.

Guayaquil hirian igande goizaldean izandako atentatua. ©Guayaseko gobernua.

Bost lagun hil dituzte Ekuadorren, lehergailu batekin egindako atentatuan

Hodei Iruretagoiena

Ekuadorko Gobernuak salbuespen egoera ezarri du Guayaquil hirian, 30 egunerako, «hiria babesteko eta kontrola berrezartzeko beharrezko neurri guztiak» hartzeko.

Israelgo Polizia, atzo, Jerusalem ekialdean. / ©Abir Sultan, EFE

Palestinar bat hil du tiroz Israelgo armadak

Arantxa Elizegi Egilegor

Jerusalem ekialdean egindako sarekada batean hil dute 21 urteko gizonezkoa.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.