Albistea entzun

Athleticeko hauteskundeak

Jon Uriarte da Athleticeko 33. presidentea, eta Valverde hurrengo entrenatzailea

Hautagai berritzaileenak nagusitasunez irabazi ditu Athleticeko hauteskundeak. Atzetik geratu dira Iñaki Aretxabaleta eta Ricardo Barkala. Parte hartzea handia izan da bozetan: %56,36.
Jon Uriarte botoa ematen, atzo goizean, San Mamesen. Hura izango da Athleticeko presidentea datozen lau urteetan.
Jon Uriarte botoa ematen, atzo goizean, San Mamesen. Hura izango da Athleticeko presidentea datozen lau urteetan. MONIKA DEL VALLE / FOKU Tamaina handiagoan ikusi

Ainara Arratibel Gascon -

2022ko ekainak 25

Athleticek 125 urte beteko ditu datorren urtean. Tradizioei katigatuta dagoen klub bat da, eta bere filosofia eta balioak ukiezinak dira. Baina, oraingo honetan, bazkideek Jon Uriarte (Bilbo, 1978) egin dute presidente: Athleticeko presidente izateko zeuden hiru hautagaien artean, proposamen berritzaileenak dituena.

Gauerdia pasatuta izendatu dute presidente Uriarte. 23.506 bazkidek eman dute botoa, eta ia erdiak eman dio babesa: 10.979 bazkidek, zehazki. Aretxabaleta izan da bigarren 7.927 botorekin eta Barkala hirugarren, 4.262 botorekin. Uriarte zen hiruetan euskaldun bakarra.

Bazkideek hari eman diote aginte makila, eta lau urte izango ditu bere proiektua gauzatzeko. «Bazkide askok argi dute aldaketa behar dela. Beste bi zerrendek ez diete bermatzen hori», adierazi zion BERRIAri hauteskundeen aurretik. Bazkideek arrazoia eman diote. Hark lortu zuen hautagai izateko berme gehien, eta hark lortu du boto gehien hauteskundeetan.

Bazkide zuri-gorriak 09:00etatik 21:00etara aritu ziren botoa ematen. Estreinakoz, San Mamesen jarri zituzten hauteskunde mahaiak; guztira, 24. Giro onean egin zen bozketa. 40.320 bazkidek zuten bota emateko aukera, eta parte hartzea oso handia izan zen. 22.689k eman zuten boza, eta parte hartzea %56,36koa izan zen, duela lau urte baino %10 gehiago. Uriartek lortu zituen boto gehien, eta atzetik geratu ziren Iñaki Aretxabaleta eta Ricardo Barkala.

Uriarte euskaraz dakien hautagai bakarra zen, eta duela 25 urtetik da Athleticeko bazkide.Enpresa mundutik iritsi da Ibaiganera. Ticketbis enpresa sortu zuen, sarrerak berriz saltzeko plataforma bat.Gainera, All Iron Group konpainian ere aritu da. Dena den, ez du bide erraza izan Ibaiganera iristeko: kanpaina bete-betean zela, hautagaitza erretiratzear egon zen. Joko zikina salatu zuen. «Gezurrak pairatu ditugu sare sozialetan, kritikak komunikabideetan, eta ikusi ez diren eta kontatu ezin daitezkeen erasoak». Aurrera segitzea erabaki zuen.

Baina beste kolpe bat hartu zuen, bere kirol proiektua aurkeztu zuen egunean. Carlos Aviña mexikarra zen proiektuaren ardatz nagusietakoa. Hark izan behar zuen futbol zuzendaria. Baina haren izena iragarri eta ordu gutxira, kendu egin behar izan zuten, duela hamar urte idatzi zituen txio homofobo eta sexista batzuk zabaldu baitziren. Kanpaina amaitzeko hiru egun falta ziren, eta ez zuen argitu nor izango den haren ordezkoa. «Ez dugu presaka ibili nahi izan, eta dirutza bat ordaindu izen bat emateagatik. Burugabekeria bat izango zen. Zerrenda bat dugu, eta datozen asteetan erabakiko dugu». Dena den, bere ametsa bete du, Athleticeko 33. presidentea izango baita.

Valverderen hirugarren aroa

Kirol arloan, Ernesto Valverde izango da gizonezkoen lehen taldeko entrenatzailea. «Egokiena da aurrera eraman nahi dugun eraldaketa proiekturako. Izan ere, hori gauzatzeko, klubak egonkortasuna behar du, eta Ernestok hori emango dio. Azken 25 urteetan Athleticen arrakasta gehien izan duen teknikaria da; kluba ondo ezagutzen du, eta beti jakin izan du dituen jokalarien araberako joko estiloa ezartzen». Apustua taldeak joko zuzen eta bizi-bizia egitea da.

Emakumeen lehen taldearen aulkian Iraia Iturregik jarraituko du. Xabi Arrieta izango da kirol zuzendaria. Arrietak 15 urte egin ditu Bizkerren, eta gakotzat jo du Bizkaiko klubekin elkarlana.

Gauzatuko duten kirol proiektuaren oinarriak hiru dira: errendimendua, exijentzia eta profesionalizazioa. «Zaleak berriz katigatuko dituen talde bat nahi dugu, helburu handiak lortzeko borrokatuko dena eta hemengo futbolaren hegemonia berreskuratuko duena».

Ardatza jokalaria izango da, eta, big data eta futbol datuen analisiari lotutako teknologia baliatuz, jokalari bakoitzaren errendimendua aztertu, eta dituen beharrei erantzuteko planak jarriko dituzte martxan. «Gure filosofia kontuan hartuta, hemen dugunari atera behar diogu etekina». Bide horretan, errendimendu arduradun bat eta utzitako jokalarien lana aztertuko duen zuzendari bat egongo da. Gainera, Lezamako entrenatzaile multzoan dauden profesionalen baldintzak hobetu nahi dituzte. Lezamako arduraduna, hain zuzen, Sergio Navarro izango da, Betisen, Castellon, Rubin Kazanen, Vila-realen eta Levanten lan egindakoa.

Negoziorako bide berriak

Ekonomiari dagokionez, Uriartek argi du klubak ezin dituela sasoi bakoitzean 15 milioi euro galdu, orain egoera ona izan arren. Hala gertatzen zaio Europarako sailkatzen ez den denboraldi guztietan. Egoera iraultzeko, bi dira aurrera eramango dituzten neurriak: beste negozio bide batzuk abiatzea, eta jokalari eta entrenatzaileei kirol helburuen araberako kontratuak egitea.

Negozio bide berri horiek izateko, hau bultzatuko du:San Mames batez beste %85 betetzea, bazkide kopurua handitzea, Athletici lotutako turismoa sustatzea, Athleticen marka nazioartekotzea, ikus-entzuneko edukia sortzea eta Athletic unibertsitatea sortzea. Helburuen araberako kontratuen inguruan ondorengoa esan zuen hauteskunde kanpainan: «Jokalariek ulertu behar dute ez duela esan gura gutxiago irabaziko dutenik. Anbiziotsua bada, gehiago irabaz dezake, kluba arriskuan jarri barik».

Arlo sozialean argi dute. «Klubaren eta zaleen arteko harremanak partidetatik harago joan behar du. Izan ere, ero eta eragin sozial txikiagoa dugu». Fundazioaren bidez bideratu dituzte zaleen eta bazkideen ideiak, ekarpenak eta proposamenak. Gainera, egoitza sozial bat jarriko du, nagusien parte hartzea sustatu, eta Athleticen memoria jasoko duen batzorde bat eratu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Amaitu da euskal selekzioen aldeko azken mendi martxa

«Euskal selekzioen aldeko aldarria oso apalduta dagoela ikusi dugu»

Paulo Ostolaza

Euskal selekzioen aldeko mendi martxa azken aldiz egin dute aurten. Atzo amaitu zen, Getarian (Gipuzkoa). Iturriaren iritziz, gizarte mugimenduak nahiko garai kritikoan daude orain, «baina ziklo kontua da».

Gorka Aranberri Urdaibaiko patroia, gaur, Getarian irabazitako bandera astintzen. ©Idoia Zabaleta / Foku

Bandera eta lidergoa Urdaibairentzat, Hondarribiaren hutsegite bat tarteko

Paulo Ostolaza

Bigarren ziaboga barnealdetik hartu du Ama Guadalupekoa-k, Urdaibairekin lehian zebilela. Ligan zuen sei punturen aldea galdu du. Euskotren Ligan, Orio gailendu da beste behin ere, eta ia erabakita dago liga.

Mendizorrotza kiroldegiaren kanpoaldea, eraikin osoa ikusten dela. ©jaizki fontAneda / foku

Mendizorrotza kiroldegia, epikoa eta lirikoa

Aitor Manterola Garate

Kirola eta kultura. Saskibaloia eta musika, nagusiki. Baskonia, Araski... eta Gasteizko jazzaldia. 53 urteko eraikina xarmagarri bilakatu da urteen joanean, eta sinbolo bat ere bada.

Urdaibaiko trainerua eta eskifaia atzo Hondarribian, irabazi berri zuten banderarekin. ©MAIALEN ANDRES / FOKU

Lasaitasunaren bandera

Aitor Manterola Garate

Urdaibaik Hondarribia liderraren etxean irabazi du Eusko Label ligako bigarren bandera. Getaria laugarren izan da, eta ohorezko txandan ariko da gaur, etxean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.