Albistea entzun

Azpeitiko Antzerki Topaketak: 40 urteko eszena bat

Azpeitiko Euskal Antzerki Topaketak gaur hasiko dira, eta, hilaren 20ra arte, 11 antzezlan izango dira ikusgai, horietako hiru estreinaldiak.
Azpeitiko (Gipuzkoa) hainbat eragilek sortu duten <em>Herriye</em> antzezlanaren entsegua, igandean.
Azpeitiko (Gipuzkoa) hainbat eragilek sortu duten Herriye antzezlanaren entsegua, igandean. AZPEITIKO KULTURAZ KULTUR KOOPERATIBA Tamaina handiagoan ikusi

Jone Bastida Alzuru -

2022ko azaroak 1 - Azpeitia

Euskal kulturaren historian ez da sekula gertatu orain arte. 40. urteurrena ospatuko dute aurten Azpeitiko Euskal Antzerki Topaketek, eta 40 urtez jarraian euskarazko antzerkia taularatu duen jaialdi bakarra izango da. Azpeitiko Euskal Antzerki Topaketak gaur hasiko dira, eta, hilaren 20ra arte, 11 antzezlan izango dira ikusgai, horietako hiru estreinaldiak. Udalak antolatzen ditu topaketak, Azpeitiko Kulturaz kultur kooperatibaren laguntzaz. Orain arte lortutakoa nabarmendu du Aitor Bengoetxea kooperatibako kideak: «Beti euskara hutsean aritzea apustu handia izan da. Sendotuta iritsi gara urteurrenera. Eustea ez da gutxi, eta, azken hamarkadan, aukera izan dugu beste bultzada bat emateko ere: elkarlanean eta herrira begira».

Urteurrena aprobetxatu dute atzera begirako bat egin, egindakoa aztertu, eta etorkizunean zer egin hausnartzeko. 1983an egin ziren aurrenekoz antzerki topaketak Azpeitian, eta Bengoetxeak azaldu du bidean «askotariko etapak» egon direla. «Euskal antzerkigintzak plazak behar zituen, eta indar handia egin zen».

Ordutik, aldaketak izan dira programazioan, antolatzeko moduan, agertokietan... baina oztopoak oztopo, eutsi egin zaie, eta azken urteotan eguneratuz eta indartuz ere joan dira: «Erreferentzialtasuna lortu dute». Aurten, beste urrats bat egin, eta batez ere komunikatiboki egin dute jauzia: webgune bat sortu, sare sozialak martxan jarri eta topaketen historiaren inguruko orri bat egin dute Wikipedian.

Moduak «aldatu» egin dira, Bengoetxeak onartu duenez, baina hasierako helburuei eutsi diete, Bengoetxearen hitzetan: euskarazko antzerkigintza bultzatzea, sortzaileei plaza bat eskaintzea, egituratzea eta ikusgaitasuna ematea. Halaber, urte osoko kultur jardunaren «zirkulua» osatzen saiatzen dira, eta sormen egonaldietan jarri du azpimarra: antzerki konpainiek, musika taldeek eta bestek lanak sortzeko egonaldiak egiten dituzte Dinamoa sormen gunean eta Soreasu antzokian. Han ondutako lanen estreinaldiak ere biltzen dira topaketetan.

Hala, Bengoetxeak uste du topaketek «erreferentzialtasuna eta elkarrekin biltzeko lekua» eman dizkietela euskal antzerkilariei: «Babeserako gune bat eman die, makulu edo helduleku bat». Elkarlana eta kultura egiteko modua ere nabarmendu ditu; Eneritz Albizu udaleko Kultura batzordeburuak ere bide beretik jo du.

Memoria ariketa

Urtemuga ospatzeko, hainbat ekintza berezi egingo dituzte. Besteak beste, 40. Topa ekitaldia: azaroaren 12an, aitortza ekitaldi bat egingo diete 40 urteotan herriko antzerkigintza sustatzen ibili direnei, eta, hartan, eraikin bat bezain luze den horma irudi bat aurkeztuko dute. Beste mural bat ere badago Soreasuko pasabidean, topaketetako aldi guztietako kartelekin osatuta. Argazki erakusketa bat ere egingo dute. Albizu: «Orainaldiari eta etorkizunari begira bizi gara, baina gaur garena eta egiten ditugun gauzak ulertzeko, beharrezkoa da atzera begiratzea eta aurretik egindako lana aitortzea».

Horrez gainera, mediazio saioak egingo dituzte gazteekin: sormen egonaldietan garatutako obrak herriko ikastetxeetara zabalduko dituzte, antzerkiaren inguruko zaletasuna sustatzeko. Transmisioaren garrantzia azpimarratu du, hain zuzen, Albizuk: «Kulturaz ari garenean, askotan azken produktua izaten dugu buruan; baina, azken urteetan, sormenari eman diogu garrantzia; transmisioa hirugarren hanka da, eta guretzat oso inportantea da».

Aurtengo egitarauan ere igar daiteke antolatzaileen asmo hori. Programak biltzen dituen 11 antzezlanez gain, eskoletan sortutako beste zazpi obra ere taularatuko dituzte, eta ikasleak arituko dira horretan.

Programan, aipatzekoak dira Mairu antzerki taldearen Intxaurra eta Metrokoadroka sormen laborategiaren Zeozertan dabil baina ez dakit zertan antzezlanen estreinaldiak, baina badago nabarmendu beharreko beste obra bat ere: herritik eta herriarentzat sortutako Herriye antzezlan satirikoa. 50 azpeitiar baino gehiagok parte hartu dute pieza sortzeko lanean: gidoigintzan, antzezle, jantzitegian, komunikazioan, argiztapenean... Lau emanaldi egingo dituzte: egunean bat, gaurtik ostiralera bitarte.

Kabaret satiriko bat

Obrak zeresana eman du herrian, eta berehala bukatu ziren sarrera guztiak. Honela definitu du antzezlana Xanti Agirrezabala zuzendariak: «Azpeitiari buruzko parodia komiko-satiriko bat biltzen duen kabaret ikuskizun bat da». Azaldu duenez, nork bere buruari barre egitea proposatzen du, eta baditu azpeitiarrak batzen dituen txiste, kontu zahar eta zirtoak. Fikziozko trama ere badu. «Ez da gure txisteen batuketa soil bat, linea narratibo bat dago».

Zuzendariak garrantzia eman dio hainbeste herritarren parte hartzeari ere. «Hasieratik izan da herri produkzio bat, eta argi genuen herritar talde handi batek parte hartu behar zuela». Albizuren arabera, aurtengo topaketetako obrarik bereziena da: «Gure lan egiteko moduaren erakusgarri sinboliko bat da, baina baita praktikoa ere».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zugaza, Herraez, Gonzalez, Zupiria eta Ormazabal, gaur, Gasteizen. ©IREKIA

Euskal artisten 26 artelan erosi dituzte museoek, Jaurlaritzak diruz lagunduta

Aitor Biain

Artium museoak, Biboko Arte Ederren Museoak eta Tabakalerak elkarrekin erosi dituzte 18 euskal artistaren obrak, 200.000 euroko ezohiko diru laguntza bati esker.

2023ko Bertsoaoa zikloko irudia, Leire Urbeltzek egina. ©Nafarroako Bertsozale Elkartea

Iruñeko Bertsoaroa otsailaren 9tik martxoaren 2ra eginen dute

Berria

Nafarroako Bertsozale Elkarteak eta Iruñeko Udalak antolaturik, sei emanaldirekin osatu dute zikloaren egitaraua. Lehenbiziko aldiz, bertso afari bat ere izanen da.

Gorka Moreno, Amaia Ozerin eta Patxo Telleria, gaur goizean, 'Sormen Ola' proiektuaren aurkezpenean. ©OSKAR MATXIN EDESA / FOKU

Gazteentzako tailer sorta bat antolatu dute Loraldiak eta EHUk

Olatz Enzunza Mallona

Gazteen artean euskal kulturaren transmisioa sustatzeko asmoz, Sormen Ola programa abiatu dute Loraldiak eta EHUk. Parte hartzaileek formakuntza tailerrak jasoko dituzte hilean behin, sortzaile profesionalek gidatuta. Larunbatean egingo dute lehenengo saioa.

Slawka Grabowska eta Amaia Garcia antolatzaileak, Mari Jose Telleria Gipuzkoako Kultura diputatua eta Olatz Osa Elkar argitaletxeko zuzendaria, gaur goizean, jaialdiaren aurkezpenean. ©Jon Urbe / Foku

Otsailean egingo dute Lumafest jaialdia Donostian, bigarrenez

Naroa Torralba Rodriguez

Zabalik dago mikrokontakizunak bidaltzeko epea. Otsailaren 9tik 11ra tailerrak eta hitzaldiak izango dira Koldo Mitxelena kulturunean.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...