Ahal den guztia euskaraz egitea jarri du helburu gisa Gipuzkoako Foru Aldundiak

Diputazioko langileek euskaraz gehiago egitea da euskara planaren lehentasuna. Euskararen «zapalkuntza» irauli nahi dute: «Justizia soziala»
Markel Olano ahaldun nagusia eta Garbiñe Mendizabal Hizkuntza Berdintasuneko zuzendaria, atzo.
Markel Olano ahaldun nagusia eta Garbiñe Mendizabal Hizkuntza Berdintasuneko zuzendaria, atzo. GORKA RUBIO / FOKU

Garikoitz Goikoetxea -

2018ko uztailak 7
Ahal den guztia euskaraz egitea. Helburu hori jarri du Gipuzkoako Foru Aldundiak euskara plan berrian. Seigarren plana da. Orain arte ezagutzan egindako aurrerapausoa langileen erabileran islatu nahi dute. Diputazioak azaldu du herritarrei begirako jardunean lortua duela hizkuntza eskubideak errespetatzeko helburua, gai dela zerbitzua euskaraz emateko. Aldundi barruko jardunean, ordea, badauzkate hutsuneak: bileretan, harremanetan, barne agirietan... Hor eragitea izango da, hortaz, planaren helburua: «euskaraz funtzionatuko duen diputazioa» lortzea. Oinarri honi helduko diote: «Euskaraz egin daitekeena euskaraz egingo da».

Plan berria 2022ra arte egongo da indarrean. Lantzeko era aldatu egin dutela azaldu du Garbiñe Mendizabalek, Hizkuntza Berdintasuneko zuzendariak: parte hartze prozesu bat egin dutela langileekin, eta ekarpen gehienak aintzat hartu dituztela; besteak beste, prestakuntzarekin eta lidergoarekin lotutako eskariak egin dituzte. Sindikatuekin eta ordezkari politikoekin ere landu dute. Jarraipena elkarrekin egiteko asmoa agertu du zuzendariak.

Aldaketa behar dela, euskara «bidegurutzean» dagoela, ideia horri heldu dio Markel Olano ahaldun nagusiak: «Erabileran daukagu erronkarik handiena». Ezagutzaren ikuspegitik aukerak badaudela nabarmendu du: bost beharginetik lauk baino gehiagok badaukate dagokien hizkuntza eskakizuna edo handiagoa. Areago, espero dute datozen urteetan, belaunaldi aldaketarekin, guztiak izango direla euskaldunak.

Beste kontzeptu batzuk

Aurreko planen izpirituari jarraituko dio euskara planak. Euskara «lehenestea» aipatu zuen aurrekoak, Bilduren gobernuak ondutakoak. Beste kontzeptu batzuei heldu diete orain: «berdintasuna» aipatu du Olanok, euskara gaztelaniaren parean jartzea, eta, horretarako, «justizia soziala» hartzea argudio gisa: «Euskarak urteetan jasandako zapalkuntza orekatzeko beharra». Finean, Mendizabalen arabera, formetan, kontzeptuetan, dago aldaketarik handiena: «Edukia ez da aldatu».

Aurreko planaren aurka salaketa jarri zuen Espainiako Gobernuaren ordezkariak, eta epaitegiek bertan behera utzi zituzten artikulu batzuk. Ez dute halakorik espero oraingo planarekin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna