BERTSOKLIKA

Doinua: Gizona da zoroa

Ustez berria eta
euskaldun zaharra,
gaur urtebete heldu
zen arabiarra,
diasporan dabilen
baten irribarra:
motibazio asko
ta mezu bakarra.

Arratiko tranbian
iritsi zirenak,
errekaren lan deia
aditu zutenak.
Bilbo zeharkatu du
Korrikaren trenak,
euskaraz daki gure
hiri hirienak.

Diruaren sorleku
ta epizentroa,
BEC, Kutxabank, Guggenheim,
San Mames, Metroa.
Euskarari sortzeko
hiri balekoa
ez dezatela inoiz
erantzi petoa.

Korrikak biltzen gaitu
gero ta gehiago
ta helmuga ez dago lehen
baino hurbilago.
Korrika ez dadin izan
sprint bat, ta akabo!
Bidea egunero
egin beharra dago.