Albistea entzun

Ruto izango da Kenyako presidente, botoen %50,4 lortuta

Oposizioak iruzurra salatu du. Hauteskunde Batzordeko zazpi kideetatik lauk uko egin diote emaitzak berresteari, argudiatuta «zenbaketa iluna» izan dela. Protestak piztu dira Nairobin
William Ruto presidentegaia, joan den abuztuaren 8an, Uasin Gishu herrian bozkatzen.
William Ruto presidentegaia, joan den abuztuaren 8an, Uasin Gishu herrian bozkatzen. EFE Tamaina handiagoan ikusi

Arantxa Elizegi Egilegor -

2022ko abuztuak 16

Aste bat behar izan dute Kenyan presidentetzarako bozetako emaitza jakinarazteko, eta hura ere ez da izan gatazkarik gabea. Izan ere, hainbat orduz zain egon ostean, Hauteskunde Batzordeak iragarri zuen atzo William Rutok eskuratu zuela garaipena, baina batzordeko zazpi kideetatik lauk uko egin zioten emaitzak berresteari, «kontaketa iluna» izan zela argudiatuta. Ez zuten, ordea, azalpen gehiagorik eman. Emaitzen berri emateko prentsaurrekora joateari uko egin ziotenetako bat izan zen batzordeko presidenteordea, Juliana Cherera.

Elkarlanerako deia egin zuen orain arte gobernuko presidenteorde izandakoak emaitzen berri jakin eta berehala, eta nabarmendu zuen ez dela mendekurako garaia: «Ohartzen naiz gure herria ataka zailean dagoela, eta esku guztiak beharko ditugula hemendik irteteko». Garaipen estua izan da Rutorena: botoen %50,4 eskuratu ditu. Haren aurkari nagusiarentzat, Raila Odingarentzat, izan dira botoen %48,8.

Emaitzak jakinarazteko prentsaurrekoa hainbat orduz atzeratu izanak istiluak eragin zituen Hauteskunde Batzordeko kideak bilduta zeuden egoitzaren atarian. Zenbaketan «iruzurra» egon dela ere salatu zuten Odingaren kanpainako arduradunek. Izan ere, azken egunetako inkestetan hura zen irabazteko faboritoa. «Eskura dugun informazioaren arabera, Hauteskunde Batzordearen sisteman sartu dira, eta emaitzak manipulatu dituzte. Batzordeko kideren batek hauteskunde iruzurra egin du, eta atxilotu egin beharko lukete», salatu zuen Saitabao Ole Kanchoryk, Odingaren kanpainako arduradunak. Edizio hau ixtekoan, Odingak ez zuen adierazpenik egin, baina haren taldekideek eskatu zuten emaitzak bertan behera uzteko, argudiatuta ez zegoela adostasunik Hauteskunde Batzordeko kideen artean.

Mila hildako baino gehiago utzi zituzten 2007ko bozen osteko liskarrek, eta ehundik gora 2017koek. Hain zuzen ere, Nazioarteko Zigor Auzitegiak gizateriaren aurkako krimenak leporatu zizkion Rutori 2007ko liskarren ostean, baina haren aurkako karguak bertan behera geratu ziren 2016an.

Uhuru Kenyattak irabazi zituen azken hauteskundeak, eta Odingaren aldeko botoa eskatua zuen hark. Erabakiak ere eman zuen zeresana; izan ere, Kenyattaren gertukoek Rutori «insubordinazioa» egotzita azaldu zuten presidenteak oposizioko alderdi bateko hautagaia babestu izana. Baina, Konstituzioaren arabera, presidenteordea ezin denez kargugabetu agintean jarraitu zuen Rutok, nahiz eta onartu Kenyattaren eta bere arteko harremana ez zela ona. Presidenteordearen esanetan «modu desberdinean» ulertzen zuten biek politikagintza.

Emakumeen ordezkaritza

Estatuburua ez ezik, 47 gobernadore ere aukeratu behar zituzten herritarrek joan den astearteko hauteskundeetan, eta horietan nabarmen handitu da emakume kopurua. Oraingo legealdian, zazpi izango dira emakumezko gobernadoreak, aurrekoan baino lau gehiago. Batzar Nazionalean ere sei izango dira emakumezko ordezkariak —290 diputatu dira guztira—.

Kenyako hautesleen ia erdiak emakumezkoak badira ere, oso hautetsi emakumezko gutxi aukeratu dituzte azken urteetan. Kenyako Emakume Parlamentarien Elkarteak salatu duenez, gainera, hautagaiek erasoak jasan dituzte kanpainak iraun duen asteetan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Manifestari bat, hautetsontzi erraldoi bat garraiatzen, atzo, Bartzelonan, urriaren 1eko erreferendumaren bosgarren urteurreneko ekitaldian. ©ENRIC FONTCUBERTA / EFE

Independentisten frustrazioa plazaratu du U-1aren urteurrenak

Gorka Berasategi Otamendi

Puigdemontek U-1aren «agindu demokratikoa» betetzeko eskatu dio Aragonesi. Bete ezean, prozesua gidatzeko zilegitasuna aldarrikatu du. Forcadelli eta Rovirari txistu egin diete ekitaldian

Lularen jarraitzaileak, «Lula da irtenbidea» dioen kartel batekin. ©BRUNO ZANARDO / EFE

BI EREDU KONTRAJARRI

Arantxa Elizegi Egilegor

Elkarrengandik ezin urrunago dauden bi indar dira Luiz Inacio da Silva 'Lula' eta Jair Bolsonaro. Zentro-ezkerrean bata eta eskuin muturrean bestea, aurrez aurre egongo dira gaur Brasilen egingo dituzten presidentetzarako bozetan.
Emakume beltz bat haur batekin jolasten. ©BERRIA

Dena edo ezer ez

Cecilia Valdez

Emakume beltzak gutxiengoa dira Brasilgo Kongresuan, baina gehiengoa pobreziaren, desberdintasunaren, bazterketaren eta errepresioaren inguruko datuetan. Lularen garaipena beren eskubideak hobetzeko aukeratzat daukate.
 ©DANI CODINA

«Akordio bat behar dugu boterea nola ezarri argitzeko»

Gorka Berasategi Otamendi

Kataluniako Errepublikaren Kontseiluko kidearen esanetan, erreferendumaren bosgarren urteurreneko manifestazioaren helburua «herritarren mobilizazioa balioestea» izan da, eta gizartearen eta erakundeen arteko elkarlanari garrantzi estrategikoa aitortzea.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...