Jon Urdapilleta

Mila pasadizo, mila kontu, mila sentsazio eta mila burutapenez josita agertu nintzen Jon Urdapilleta (Bidania-Goiatz, Gipuzkoa, 1996) gaztearen piano errezitalera. Entzulearen aldez aurretiko jarrera funtsezkoa da jaso behar dugun mezua guztiz barreneraino sar dadin, denbora-pasa astun batean murgiltzeko arriskutik irteteko. Esan bezala, egun korapilatsu batek errezitaletarako hain aproposa den Viktoria Eugeniako Klub aretoan eseri ninduen. Urdapilletaren nondik norakoak gertutik jarraitu ditut azkeneko urteetan, eta Londresen ikasi duena jasotzeko irrikan nengoen. Appassionata sonataren lehenengo teklatu ukituak jardunaldi ero eta neketsu horretako sentsazio gaiztoak laster batean uxatu zituen. Musikari heldu baten pazientzia eta hoztasunarekin ekin zion sonata basatiari, suziri eta eztanda elektrikoak kontrolpean mantenduz. Partitura luzea da, eta ez daukazu hasieratik dena eman beharrik zure hiriko antzokian eskaini beharreko kontzertu arduratsu batean, urduritasunak baztertzeko erremediorik hoberena sonata ondo tratatzea baita, tekla bakoitzaren barreneraino eta une oroko kontuarekin.

Akorde handi beteetan indartsu aritu zen Urdapilleta —batzuetan gehiegi—, normaltzat har daitekeen tentsio puntuak soinu boteretsuari sorbaldatik hasten utzi gabe. 22 urte ditu gipuzkoarrak, eta, talentuzko hatz fin horiekin, Beethoven ziztu bizian irentsi zuen, horretarako prest dagoela frogatuz. Gazteriak dakarren etengabeko emate horretan lasaitasun apur bat lortzea, denborak eta agertoki orduak emango dizkio, baina emandako lehen arrasto garrantzitsu horiek zeresaneko musikaria dute bere barnean.

Segidako Franz Schuberten Fantasia sonatak musikariaren jakituria biluzik uzten du, eta emanaldiko sorpresarik zoragarriena izan zen, cantabile pasarteetan Urdapilleta zoragarri azaldu baitzen. Patxadaz, soprano inguratzaile bat atera zen bere eskuineko eskutik, Schubert delikatu, barrenkoi eta dotore bat biribildu arte. Hemen ez zituen 22 urte azaldu, oin arrasto egokiekin heldutasunerantz abiatu den musikari peto bat dela egiaztatu baitzuen. Zorionak, Jon!