Hurrengo lau urteetarako ildoak azaldu zituen atzo Jokin Bildarratz Eusko Jaurlaritzako Hezkuntza sailburuak Eusko Legebiltzarreko hezkuntza batzordean: esaterako, irakasleen egonkortasuna bermatzea, inbertsioak areagotzea eta Lanbide Heziketa duala indartzea. Hona gakoak:
Inbertsioak
Datozen lau urteetarako inbertsioen berri eman zuen Bildarratzek. Garrantzitsuenetakoa irakasleen kontratazioa izango da: datozen urteetan belaunaldi aldaketa handia izango da urtero, eta lan eskaintza publiko bat egin nahi du Jaurlaritzak: lau urtean 3.200 lanpostu. Ikasleen beketarako ehun milioi jarriko dituzte, eta ikastetxeetan inbertsioak egiteko 300 milioi izango dira.
Digitalizazioa
Digitalizazioari lotutako helburu irmo bat ezarri du Jaurlaritzak: ikastetxe guztiek digitalizazio plana edukitzea indarrean.
Hezkuntza legea
Hezkuntza legea aurrera ateratzea da legegintzaldiko gai zentraletako bat. Bildarratzen iritziz, elkarrizketak eta «konpromiso partekatuak» hezkuntzako aurrerapenen oinarri izan behar dute: «Hori da, besteak beste, datozen urteetan hezkuntzako euskal lege berri bat bultzatzeko oinarria». Aurreko agintaldian zuten proposamena aurkeztekoa, baina oraindik ez dute argitaratu. Bildarratzek dio legeak etorkizuneko «erronka handiei» erantzungo diela, eta «egonkortasuna eta kalitatea» ekarriko duela.
Euskara
Bildarratzek esan zuen euskara oinarri izango duen sistema eleaniztun batera jo nahi duela. EH Bilduk nabarmendu zuen garaia dela hizkuntza ereduak gainditu, eta murgiltze eredua sustatzeko.
Haurreskolak Partzuergoa
Bildarratzek onartu zuen Haurreskolak Partzuergoak «funtsezko» zerbitzua eskaintzen diela familiei, baina ez zuen doakotasuna aipatu. Hain zuzen, horixe eskatuzioten EH Bilduk eta Elkarrekin Podemosek.
Lanbide Heziketa
Konpromiso bat ere hartu zuen Hezkuntza Sailak: Lanbide Heziketako euskal plana diseinatzea eta garatzea. Lanbide Heziketa duala ere—ikasleek lana eta ikasketak uztartzen dituzte— bultzatu nahi dute, eta arlo industrialetan ari diren ikasleen erdiek hori aukeratzea nahi dute. Euskarari lotutako asmo zehatzak ere jakinarazi zituen: euskaraz ikastea ikastetxe publikoetako ikasleen %60k eta itunpeko sarekoen %55ek.
Unibertsitatea
Hezkuntzak «bikaintasunean, espezializazioan, nazioartekotzean eta talentuan» jarri nahi du arreta. Horretarako, hainbat konpromiso hartu ditu; esaterako, ikerketako, garapeneko eta berrikuntzako inbertsioak urtean batez beste %6 igotzea.
Bildarratzek 3.200 postuko lan eskaintza iragarri du
Eusko Jaurlaritzako Hezkuntza sailburuak urtero lan eskaintza publiko bat egin nahi du. Legealdiko helburu nagusiak zehaztu dituzte
Iruzkinak
Ez dago iruzkinik
Ordenatu