Albistea entzun

ELA: «Pentsioen erreformaren inguruko isiltasuna beldurgarria da»

Murrizketarik ez onartzeko eskatu die EAJri, EH Bilduri eta Podemosi: «Haien esku dago»

Imanol Magro Eizmendi -

2021eko irailak 21 - Bilbo

Espainiako Gobernuak egin asmo duen pentsioen erreformarako zuzenketak aurkezteko epea etzi amaituko da, eta EAJk, EH Bilduk eta Elkarrekin Podemosek zein aurkeztuko dituzten jakin nahi du ELA sindikatuak. Asmo horrekin, bilera bana eskatu die hiru alderdiei, bereziki erreformari marra gorriren bat jarri dioten jakiteko. Izan ere, Mitxel Lakuntza ELAko idazkari nagusiaren hitzetan, haien esku dago «murrizketak» geldiaraztea: «Kongresuko aritmetika ikusi baino ez dago: haiek gabe ezin da erreforma onartu».

ELA ez dago Madrilgo negoziazio mahaian, baina Lakuntzak grafikoki azaldu du haren inguruan dakitena: «Iristen ari zaigunak ez du itxura onik». Espainiako Gobernuak bilerak hasi ditu berriz CEOE enpresarien elkartearekin eta CCOO eta UGT sindikatuekin. Pentsioen erreformaren bigarren atala eztabaidatzen ari dira, eta bertan zehaztuko da, besteak beste, jasangarritasun faktorea delakoa ordezkatuko duen doikuntza sistema. Urtea amaitu aurretik adostu behar dute erreforma egitasmoa, eta ondoren Espainiako Kongresuan bozkatuko dute hura onartu ala ez. ELAk hor ikusten du «murrizketak» oztopatzeko abagunea.

Eta horregatik jakin nahi du zein den alderdien jarrera. Izan ere, gaiaren inguruan dagoen «isiltasuna» beldurgarria dela iritzi dio: «Jose Luis Escrivak [Espainia Gizarte Segurantza ministroak] zer nahi duen argi dago: gehiago lan egin edo gutxiago kobratu. Orain alderdiek zer asmo duten jakin nahi dugu». Bilera eskaerak iragan astean egin zituen, eta ez du ezezkorik jaso. Kasu honetan, Elkarrekin Podemosek ardura handiagoa du, Espainiako Gobernuko koalizioko kide baita, eta Lakuntzak gogoratu dio murrizketarik ez zutela onartuko iragarri zuela.

Eztabaida gero iritsiko da, erreforman onarturiko neurriak murrizketatzat jo daitezkeen ala ez epaitzean. Alde horretatik, ELAk argi du lehen fasean onarturiko hainbat erabaki murrizketak direla. Besteak beste, Belaunaldi Arteko Ekitate Mekanismoa ezartzea etorkizunean pentsioak murrizteko «txeke zuri bat» ematea dela uste du, eta erretiro aurreratuak gogor zigortu direla. Horren aurrean, sindikatuak ezagunak diren bere eskaerak jarri ditu mahai gainean. Tartean daude 1.080 euroko gutxieneko pentsioa, iraunkortasun faktorea eta haren ordezko mekanismoak indargabetzea eta ahalmen legegile osoa Euskal Herrira ekartzea.

Norabide horretan mobilizatzeko prest dago ELA, eta Lakuntzak berriz ere hauspotu du hurrengo hilabeteetan greba orokor bat deitzeko aukera. Abenduan izan daitekeela dirudi, Espainiak urte amaiera arteko epea baitu lan eta pentsioen erreforma egiteko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

KENKARIEN EZBAIA

Joxerra Senar

Kenkarien eta pizgarrien ondorioz, Hego Euskal Herriko ogasunek 544 milioi euro biltzeari utziko diote sozietate zergan aurten. Neurrion asmoa da enpresek xede batzuetara bideratzea, baina Nafarroan egin den txosten batek «zalantza handiak» azaldu ditu lau kenkariren eraginkortasunaz.
Fessenheim herriko zentral nuklearra, Alsazian. Iaz itzali zuten. ©CHRISTOPHE KARABA / EFE
Jaurlaritzako, aldundietako eta udaletako ordezkariak, atzo, bilera hasi aurretik, Gasteizen. ©JAIZKI FONTANEDA / FOKU

Jaurlaritzak inoizko gastu handiena egingo du zerga bilketa onari esker

Aitor Biain

Bilketa %9,6 handituko da aurten, eta %4,6 datorren urtean. Diru gehigarria zorra txikitzeko eta inbertsioak egiteko erabiliko dute. Aurrekontuak 13.000 milioiren langa gaindituko du lehen aldiz

Urnietako kiroldegiko berritze lanak, atzo; hor hil zen bi beharginetako bat. ©JAVIER ETXEZARRETA / EFE

Egun berean eraikuntzako bi langile hil dira, Urnietan eta Amurrion

Jokin Sagarzazu

Bata kiroldegia berritzeko lanetan ari zen, eta bestea, berriz, etxe berri baten eraikuntzan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna